Taagapati 13 - Tosi Tapu

Agatonu mo le agaveli (soko atu)

¹ E fakalogo le vosa leia e poto ki le akonaki a lona tamana, Kae e leaise fakalogo ki le akonaki le vosa gologolo.

² E fiafia le tagata malie i le fua o lona gutu ; Kae oli le kau tagata kaka ki le veli.

³ Ko leia e tokaga ki lona gutu e taupau ia lona laumalie ; Kae ko leia e fakamavaa fakalaulasi ona laugutu e makape ki le mate.

⁴ E maua e le laumalie o le tagata gasueveli ni oli ala e leaise mafai ke fakasoko ; Kae e makona loa le laumalie o tagata mafi.

⁵ E vesia le tagata agatonu ki le loi ; Ti e fai e le tagata agaveli ni nea fakalumaluma.

⁶ E taupau e le faitotonu leia e sako lona ala, Kae e fakatupu e le agaveli le maumau o le tagata agasala.

⁷ E mauli se tasi ofaipe se nea mou koloa, kae e leaise maua sana nea, Ti e mauli se tasi ofaipe se nea mativa kae nofo a ia mo ni koloa lalasi.

⁸ E feala ke totogi e se tagata lona mauli ki ona koloa, Kae e leaise logo le mativa ki le valoki.

⁹ E fiafia le malama o le kau agatonu, Kae e mate le malama o le kau agaveli.

¹⁰ E tupu fai a fefele mei le fia nealasi, Kae e nofo le poto mo latou ala e fakalogo ki tokoi.

¹¹ Ko le koloa leia na maua vave e toe puli vave, Kae ko leia e tanaki mamalie e fakalasi ia a ia.

¹² Ko le amanaki malie leia na leaise soko e fakatupu masaki ki le loto, Kae ko le amanaki malie leia na soko e faipe se laakau o le mauli.

¹³ Ko leia e vesia ki le folafola e puli noa, Kae ko leia e i ki le pelesepeto e fakapale.

¹⁴ Ko le akonaki a le poto ko se matapuna o le mauli, Ke saofaki ai i masele o le mate.

¹⁵ E tupu mei le fakakaukau malie le kalasia, Kae e faigataa le ala o le kau agaveli.

¹⁶ E fakakaukau le tagata poto i mua o le fai o lana gaoi, Kae e fakasa e le vale lona valea.

¹⁷ E fakatupu e se tagata avelogo agaveli le malaia, Kae e ave e le tagata avelogo agatonu le mauli.

¹⁸ Ko le mativa mo le luma ko le vaega o leia e vesia ki le akonaki, Kae ko leia e tali ia le valoki e fakamauiga loa.

¹⁹ E suamalie ki le laumalie le oli leia e soko ; Kae ko le nea fakalialia ki le vale lana tafoki mei le veli.

²⁰ Ko leia e nofo tuumau mo le kau poto e liliu loa o poto, Kae ko leia e fiafia i le nofo mo le kau vale e liliu loa o veli.

²¹ E tuli e le malaia latou ala e agasala, Kae e fakapale e le manuia le kau agatonu.

²² E tuku e le tagata agamalie se tofiga ki fanau o ana fanau, Kae na tanaki a koloa o le tagata agasala ki le tagata agatonu.

²³ Ko le faisaga leia e faala e tagata mativa e tuku ia se nea kai lasi, Kae e mamate ni iki talie e lotou fakakaka.

²⁴ Ko leia e leaise teki ia le laakau ki lona vosa e vesia ki lona vosa, Kae ko leia e alofa ki lona vosa e tautea a ia mo ka aoga ke fai.

²⁵ E kai le tagata agatonu o makona, Kae e pakupaku le manava o le kau agaveli.