Taagapati 12 - Tosi Tapu

Agatonu mo le agaveli (soko atu)

¹ Ko leia e manako ki akonaki, e manako ki le poto ; Kae ko leia e vesia ki le valoki e sala atamai.

² E maua e le tagata agamalie le kalasia o le Eteleno, Kae e fakamaau e ia le tagata leia e apele i le kaka.

³ E leaise fakamakeke le tagata e le agaveli, kae e leaise toe siga loa le aka o le kau agatonu.

⁴ Ko se fafine agamalie ko le pala a ia o lona avaga, kae ko leia e fakalumaluma e tatau a ia mo le popo o ona ivi.

⁵ E totonu a manatu a le kau agatonu ; Kae kaka a fakakaukau a le kau agaveli.

⁶ Ko masau a le kau agaveli ko ni masele ke liligi ai le toto, Kae ko le gutu o le kau agatonu ko se saofakiaga.

⁷ Ka sisiga le kau agaveli, e leaise toe maua latou ; Kae e tuu makeke i aluga le fale o le kau agatonu.

⁸ E vikiviki ki le tagata o tupu ko lona atamai, Kae e vesiainai leia e loto veli.

⁹ E malie ake le fakataulalo mo se tagata fakasausau e tasi, I le fia mauiga kae e leaise maua se pane ke kai.

¹⁰ E tokaga le tagata agatonu ki lana kau manu, Kae e agaveli le loto o le kau agaveli.

¹¹ Ko leia e gaoi ki lana faisaga e makona i le pane, Kae ko leia e makape i muli o ni nea noa e sala atamai.

¹² Ko le tagata agaveli e manumanu ki nea ala e totogi e le kau agaveli, Kae e fua le aka o le kau agatonu.

¹³ E i ai se masele veli i le agasala o laugutu, Kae e sao le tagata agatonu i le mamae.

¹⁴ E feala ke logologona le tagata i masau o lona gutu, Kae e fakapale le tagata taki toka tasi o mulimuli ki le gaoi o ona lima.

¹⁵ E sako le ala o le vale ki ona mata, Kae ko leia e fakalogo ki tokoi e poto.

¹⁶ E iloa vave le ita o le vale, Kae ko leia e fufu ia se lauveli ko se tagata poto.

¹⁷ Ko leia e fakasa ia le maoki e fakasa ia le faitotonu, Kae ko le tagata fakamaoki loi e fakasa ia le kaka.

¹⁸ Ko se tasi, leia e masau fakafuanoa, e fakalavea ia le loto ofaipe se seleta, Kae ko le alelo o le kau poto e ave ia le faitoo.

¹⁹ E tuu o lee gato le laugutu leia e masau i le maoki, Kae e tuu le alelo loi i se ga temi noa fua.

²⁰ E maua le kaka i le loto o latou ala e fakakaukau ki le veli, Kae e tuku le fiafia kia latou ala e masau ki le tokamalie.

²¹ E leaise soko se malaia ki le tagata agatonu, Kae e fakaapele loa ki malaia le kau agasala.

²² E fakalialia le Eteleno ki laugutu loi, Kae e malie kiate ia latou ala e gaoi i le maoki.

²³ E fufu e le tagata poto lona poto, Kae e fakasa e le loto o le kau vale lona valea.

²⁴ E pule loa le lima o le kau mafi, Kae e popula loa le lima gasueveli.

²⁵ E fakagaegae e le tuania le loto o le tagata, Kae e fakapelepele a ia e se masau alofa.

²⁶ E fakasa e le tagata agatonu le ala malie ki lona kaukau nea, Kae ko le ala o le kau agaveli e fakasese ia latou.

²⁷ E leaise tao e le tagata gasueveli lana manu na kapu ; Kae ko le koloa mauiga o le tagata ko le gaoi.

²⁸ E maua le mauli i le ala o le faitotonu, Ti e leaise nofo le mate i le ala e tofa e ia.