Taagapati 11 - Tosi Tapu

Kesekese o le agatonu mo le agaveli

¹ E fakalialia le Eteleno ki le fua leia e sala, Kae e malie kiate ia le fua leia e totonu.

² Ka soko le fia nealasi, ti e toe soko foki mo le luma ; Kae e nofo le poto i le agamalu.

³ E taki le tagata agatonu e lona agatonu, Kae e maumaui le tagata agaveli e lana agaveli.

⁴ I le aso o le sausau, e leaise aoga le mou koloa ; Kae e fakamauli i le mate e le faitotonu.

⁵ E fakatokatoka e le faitotonu le ala o le tagata agatonu ; Kae e vilo le tagata agaveli i lana agasala.

⁶ E saofaki le tagata agatonu e lona faitotonu ; Kae e fakamauatoka le tagata agaveli e lana kaka.

⁷ I le mate o le tagata agaveli, e mate lana amanaki malie ; Ti e vaiga le amanaki malie a le kau agaveli.

⁸ E saofaki le tagata agatonu i le mamae ; Kae too e le tagata agaveli lona nofoaga.

⁹ E fakamalaia e le tagata kaka lona oloi ki lona gutu, Kae e saofaki le tagata agatonu e lona poto.

¹⁰ Ka fiafia le kau agatonu, e fiafia le kolo ; Ti ka mamate le kau agaveli, e fai ni kalaga fakafiafia.

¹¹ E mauiga le kolo i le tapuakina a le kau agatonu, Kae e maumau a ia i le gutu o le kau agaveli.

¹² E sala atamai leia e vesia ki lona oloi, Kae e fakalologo leia e atamai.

¹³ Ko leia e fakamafola ia ni fatufatu e fakasa ia a nea fakapulipuli, Kae ko leia e agatonu i lona loto e taupau ia latou.

¹⁴ Ka puli le fakakaukau, e siga le kakai ; Ti e nofo le mauli i le toka api o le kau fakakaukau.

¹⁵ Ko leia e fetogi ia se tasi e mauli veli ; Kae ko leia e fakafiti ki ai e fimalie.

¹⁶ E maua e se fafine fulumalie ni fakavikiviki, Kae maua e le tagata makeke ni koloa.

¹⁷ E fai e le tagata agamalie le nea e malie ki lona laumalie, Kae fai e le tagata agaveli le nea e veli kiate ia totonu.

¹⁸ E fai e le tagata agaveli ni koloa kaka ; Kae ko leia e muluki ia le faitotonu e maua ia se koloa maoki.

¹⁹ Ko le faitotonu e taki ia ki le mauli, Kae ko leia e muli i le veli e maua ia le mate.

²⁰ E vesia le Eteleno kia latou ala e loto pikopiko, Kae e malie kiate ia latou ala e saele i le ala totonu.

²¹ E maoki e leaise sao loa le tagata agaveli i le tautea, Kae e fakamauli loa le sakoga o le tagata agatonu.

²² Ofaipe se mama aulo i le isu o se uviki puaka, E fenaaki foki se fafine fulumalie kae sala atamai.

²³ Ko le oli o le kau agatonu, ko le fai o le malie fuai. Ko le talitali a le kau agaveli, ko le itaita fuai.

²⁴ Ko leia e soli lasi e asilisili mou koloa ; Ti ko leia e tanaki fakavale e asilisili mativa.

²⁵ Ko le laumalie leia e manava alofa e makona loa, Ti ko leia e fakavai e toe fakavai loa a ia totonu.

²⁶ Ko leia e taofi ia le fulumeto e fakamalaia e le kakai, Kae e ifo le tapuakina ki le ulu o leia e fakatau ia a ia.

²⁷ E ifo le kalasia ki leia e afa ia le malie ; Kae ifo le malaia ki leia e tuli ia le veli.

²⁸ E siga loa leia e fanaki ki ona koloa, Kae e sesega loa le kau agatonu ofaipe le lau o laakau.

²⁹ Ko leia e fakamaveuveu ia lona fale e maua tofiga ia loa le matagi, Ti ko le vale e popula loa ki le tagata poto.

³⁰ Ko le fua o le tagata agatonu ko se laakau o le mauli, Ti ko leia e fakamauli ia ni laumalie e poto.

³¹ Ko leinei, e maua e le tagata agatonu se fakapale i le malama nei ; Ti e feaki ake loa le tagata agaveli mo le tagata agasala !