Taagapati 10 - Tosi Tapu

Ko le poto mo le i ki le Eteleno

¹ Taagapati a Salomone. E fai e le vosa poto le fiafia o lona tamana, Ti e fai e le vosa valea le mamae o lona tinana.

² E leaise aoga a koloa fakapulipuli o le agasala, Kae e fakamauli e le faitotonu i le mate.

³ E leaise tuku e le Eteleno ke mamae le tagata agatonu i le fia kai, Kae e leaise soli e ia ki le kau agaveli le nea leia e lotou manumanu ki ai.

⁴ Ko leia e gaoi i se lima gasueveli e liliu o mativa, Kae ko le lima mafi e fakalasi ia a koloa.

⁵ Ko leia e tanaki i le temi vevela ko se vosa poto, Ko leia e moe i le temi tuuti ko se vosa fakalumaluma.

⁶ E maua ni tapuakina i aluga o le ulu o le tagata agatonu, Kae e apele a gutu o le kau agaveli i le fakamakeke.

⁷ Ko le fakamanatu o se tagata agatonu ko se tapuakina ; Kae e vilo le igoa o le kau agaveli o popo.

⁸ Ko leia e poto i lona loto e tali ia a pelesepeto, Kae ko leia e valea i ona laugutu e makape ki lona maumau.

⁹ Ko leia e saele i le agatonu e saele fimalie, Kae ko leia e saele i ni ala pikopiko e tapo loa i se aso.

¹⁰ Ko leia e fufu ia le maoki e fakatupu ia le mamae, Kae ko leia e valea i ona laugutu e makape ki lona maumau.

¹¹ Ko le gutu o le tagata agatonu ko se matapuna o le mauli, Kae e nofo le fakamakeke i gutu o le kau agaveli.

¹² E fakasolosolo e le vesia ni fefele, Kae e uufi e le alofa a sala fuli.

¹³ E maua le poto i laugutu o le tagata atamai, Kae tonu ke teki le laakau ki le tua o leia e sala atamai.

¹⁴ E tanaki e le kau poto le iloa, Kae ko le gutu o le tagata valea ko se maumau kua ofi fua.

¹⁵ Ko le koloa o le tagata mou koloa ko se kolo makeke kiate ia ; Kae ko le mativa o le kau fakaaloalofa ko lolatou maumau a ia.

¹⁶ E aoga le gaoi a le tagata agatonu ki lona mauli ; Kae e tuku le fua o le tagata agaveli ki le agasala.

¹⁷ Ko leia e tokaga ki valoki, e saele i le ala o le mauli ; Kae ko leia e tiaki ia le valoki e sese.

¹⁸ Ko leia e fufu ia le vesia e maua ia ni laugutu loi, Ti ko leia e fakamafola ia ni fatufatu ko se tagata valea.

¹⁹ Ko leia e masau lasi e vilo faigaofie ki le agasala ; Kae ko leia e taofi ia ona laugutu ko se tagata poto.

²⁰ Ko le alelo o le tagata agatonu ko se paaga mauiga ; Kae ko se nea noa le loto o tagata agaveli.

²¹ E fagai e laugutu o le tagata agatonu se toka api, Kae ko tagata valelea e mamate o tupu ko lolatou sala atamai.

²² Ko le tapuakina a le Eteleno leia e fakamoukoloa, Ti e leaise mulimuli i ai se mamae.

²³ Ko le fai o le veli ko se manogi ki le tagata valea, Kae ko le poto ko le vaega o le tagata atamai.

²⁴ Ko le nea leia e tuania ia e le tagata agaveli, e soko kiate ia ; Kae e tuku ki le kau agatonu le nea leia e lotou oli ki ai.

²⁵ Ofaipe le puli a le asesio, e puli felaaki foki le tagata agaveli ; Kae e maua e le tagata agatonu ni fakatafito lee gato.

²⁶ Ofaipe le makiti o nifo i le vinika, ti mo le ausia o mata i le afu, E fenaaki foki le tagata gasueveli ki le tagata leia e kakau ia a ia.

²⁷ Ko le i ki le Eteleno e fakalasi ia a aso, Kae e fakatoetoe a fetuu o le kau agaveli.

²⁸ Ko le amanaki malie a le kau agatonu ko le fiafia ata, Kae e vaiga le amanaki malie a le kau agaveli.

²⁹ Ko le ala o le Eteleno ko se paa makeke ki le agatonu ; Kae e soko le maumau kia latou ala e fai ia le veli.

³⁰ E leaise siga loa le tagata agatonu i se aso, Kae e leaise nofo loa le tagata agaveli i le fenua.

³¹ E au mei le gutu o le tagata agatonu le poto, Kae e motusi loa le alelo veli.

³² E iloa e laugutu o le tagata agatonu le alofa, Kae e masau le gutu o tagata agaveli ki le veli.