Taagapati 1 - Tosi Tapu

Ko le aoga o taagapati

¹ Taagapati a Salomone, sau o Iselaele, vosa o Tavite,

² Ke iloa ai le poto mo le akonaki, Ke matala ai ki masau o le atamai ;

³ Ke maua ai ni akonaki o le poto, Mo le agatonu, mo le faitotonu, ti mo le maoki ;

⁴ Ke soli ai se malama ki le kau vale, Se iloa mo se fakakaukau ki le tama koi eva.

⁵ Ke fakalogo le tagata poto, ti e fakalasi loa e ia lona poto ; Ti ko leia e atamai e toe maua ia loa se tasi ake atamai,

⁶ Ke matala ki le uiga o se taagapati pe ko se masau fakapulipuli, Ki masau a le kau poto ti mo alatou manatu loloto.

⁷ Ko le i ki le Eteleno ko le kamataaga o le iloa ; E vesia le kau vale ki le poto mo le akonaki.

⁸ Ei loku vosa, fakalogo mai ki akonaki a lou tamana, Ti aua na ke tiaki le tokoi a lou tinana ;

⁹ Talie ko se pala a ia o le kalasia ki lou fa ulu, Ti ko se kasoa fakateuteu a ia ki lou ua.

Ke tokaga ki kausoa veli

¹⁰ Ei loku vosa, kapau e loto loa ni tagata agasala ke ave a koe ki le veli, Aua na ke tali latou.

¹¹ Kapau e lotou pati : Au mo matou ! tou mumuni, tou liligi le toto, Tou fai ni masele ki leia e malolo i lona saosaoa,

¹² Tou folo mauli latou, ofaipe le nofoaga o le kau mate, Tou folo katoa latou, ofaipe latou ala e ifo ki le popoko.

¹³ E tou maua loa a koloa kesekese fuli, E tou fakaapele loa otou fale ki koloa e tou maua.

¹⁴ E ke maua loa lou vaega mo matou, E tou fai loa se taga paaga e tasi kia tatou fuli !

¹⁵ Ei loku vosa, aua na ke ano i ala mo latou ; Maliu lou vae i lolatou ala ;

¹⁶ Talie e makape olatou vae ki le veli, Ti e lotou fakatavili o liligi le toto.

¹⁷ Pe maoki e leaise uiga o le tautau o le kupega I mua o mata o nea fuli e maua ia ni kapakau ;

¹⁸ Kae ko latou, e lotou fakatuu ni masele ki lolatou toto totonu ; E lotou lamalama fakafufu olatou laumalie totonu.

¹⁹ E soko le nea lena ki tagata fuli e manumanu koloa : E fakatupu e le manumanu le puli o latou ala e tuku ia latou ki ai.

E masau le poto

²⁰ E kalaga le poto i ala, E siki ake e ia lona leo i potu apiapi ;

²¹ E kalaga a ia i matapa o potu logoa, I matapa, i loto o le kolo, e fakasa e ia a masau anei :

²² Ei kau vale, e kaku loa kiafea lakotou oli ki le valea ? E kaku loa kiafea le fiafia a le kau fakagologolo i le gologolo ? E kaku loa kiafea le vesia a le kau vale ki le poto ?

²³ Kotou tafoki mai o fakalogo ki aku valoki ! Ko leinei e kau liligi loa loku Laumalie kia koutou, E kau fakasa loa kia koutou aku folafola…

²⁴ O tupu na kau kalaga atu kia koutou kae na leaise kotou tali mai ; O tupu na kau falo atu loku lima kae na leaise tokaga se tasi ki ai,

²⁵ O tupu na kotou tiaki aku akonaki fuli, Ti na leaise kotou loto ki aku valoki,

²⁶ Ko au foki, e kau kata loa mo ka kotou nofo loa i le malaia ; E kau gologolo loa mo ka too loa koutou e le i,

²⁷ Io, mo ka kaku loa le i kia koutou ofaipe se afa, Ti mo ka kofu loa koutou e le malaia ofaipe se sasataki, Mo ka vilo loa le tuania mo le mamae kia koutou.

²⁸ I le aso lena e lotou kalaga loa kiate au, kae e leaise kau tali loa ; E lotou afa loa au, kae e leaise lotou maua loa au ;

²⁹ O tupu na lotou vesia ki le iloa, Ti na leaise lotou filifili le i ki le Eteleno,

³⁰ O tupu na leaise lotou manako ki aku tokoi, Ti na lotou fakanoa aku valoki fuli,

³¹ E lotou kai loa ki le fua o lolatou ala, Ti e lotou makokona loa i alatou tokoi totonu,

³² Talie ko le fakatutuu a le kau sala atamai e tamate ia latou, Ti ko le fakalotonoa a le kau vale e maumau ia latou ;

³³ Kae ko leia e fakalogo kiate au e malolo loa i le tokamalie, E mauli loa a ia i le fimalie ti e leaise toe tuania loa e ia se nea veli.