Suta 1 - Tosi Tapu

Fakaalofa

¹ Suta, ko le tagata fakasausau a Sesu-Kilisito, ti ko le taina o Sakopo, kia latou ala kua kalagai, ala kua alofaina i le Atua ko le Tamana, ti kua taupau kia Sesu-Kilisito :

² Ko le manavaalofa, mo le tokamalie, ti mo le alofa ke liuga atu kia koutou !

Fakatokaga ki akonaki loi

³ Alofaina, na kau oli lasi ke fai tosi atu kia koutou o uiga mo lotatou saofaki fakatasi, kae na kau logoi se fakamaua ke kau fai atu kia koutou le tosi leinei ke ekenaki ai koutou ke tau ki le tui leia kua tuku tua tasi ki le kau sagato.

⁴ Talie kua ulu fakatolotolo mai kia koutou ni tagata, ala kua fualoa le tosi fakatomua o olatou tautea, ko ni tagata agaveveli ala kua fetogi ia le kalasia o lotatou Atua ki le mauli fakalaluvale, ti kua lotou fakafiti ki lotatou Pule e tasi mo Aliki ko Sesu-Kilisito.

⁵ E kau loto ke kau toe fakamanatu atu kia koutou, kia koutou ala e iloa ia a nea fuli ana, ko le Aliki, i le oki o lana saofaki le kakai ti mo lana fakamavae latou mei le fenua o Esipito, na tamate ia le kau tui gataa ;

⁶ ti na taupau e ia ki le aso lasi o le fakamaau, o sai o lee gato e le fakapouli, le kau aselo leia na leaise taupau ia olatou tulaga, kae na lotou tiaki lolatou nofoaga totonu ;

⁷ ti na tautea e ia ki le afi lee gato a Sotoma mo Komola ti mo kolo i tafatafa, ala na fai feauaki mo fai ia ni nea ala e fakafesagai ki le natula ofaipe laua.

⁸ Logo ai le nea lena, ko tagata foki ana e fai nea tatau : e lotou maua ni tio ala e taki ia latou ke lotou fakakelekele olatou tino, ti e lotou nukinuki ki le pule a le Aliki, ti e lotou lauveli ki kololia i le lagi.

⁹ Kae na leaise fai fua le nea lena e le alekaselo ko Mikaele. I lana fefele mo le Tiapolo ki le tino o Moisese, na leaise fai e ia se masau nukinuki ki le Tiapolo ; kae na pati a ia : ke lolomi a koe e le Atua !

¹⁰ Kae ko latou ana, e lotou masau veli ki le nea leia e leaise lotou matala ki ai ; ti ko le nea leia e lotou iloa fakakanofi, ofaipe ni manu kaikivao, e fakakelekele ia latou.

¹¹ Malaia kia latou ! Talie kua lotou muli i le ala o Kaino, ti kua lotou fakatau latou o tupu ko se totogi ki le sese o Palaame, ti kua lotou mamate i le agatuu a Kole.

¹² Ko ni fatu fakatupu agasala latou i akoutou kaitasi, ala e lotou kai fakavalevale ai mo fakalumaluma. Ko ni ao sala vai latou, ala e viligia i matagi. Ko ni laakau latou o le temi fakamamate, ala e sala fua, ti kua mamate tua lua, ti kua taaki mei le kele.

¹³ Ko ni galu itaita latou o le tai, ala kua laku ia le piau o olatou mauli fakakelekele ; ko ni fetuu lele latou, ala kua taofi ki ai le uli gaogao o le fakapouli lee gato.

¹⁴ Ko latou foki ana na folafola fakakikite ki ai Enoke, ko le fitu o le kau pateliaka meia Atama, o pati : Ko leinei, kua au le Aliki mo ana kau miliate maokioki,

¹⁵ ke fai se fakamaau ki tagata fuli, ti mo fakamaoki ki tagata agaveli fuli a gaoi veli fuli ala na lotou fai ti mo lauveli fuli ala na lau kiate ia e le kau agasala sala lotu.

¹⁶ Ko ni kakai gugu latou mo lauga, ala e leaise fiafia fua i se nea, ala e saele o fakalogo ki olatou oli fakavale, ala e maua ia i olatou gutu ni masau fia nealasi, ala e vikiviki ki tagata o tupu ke lotou maua ai se nea.

¹⁷ Kae ko koutou, alofaina, ke kotou manatui a nea ala na fakasa fakatomua atu kia koutou e le kau apositolo o lotatou Aliki ko Sesu-Kilisito.

¹⁸ Na lotou fakasa atu kia koutou, i temi fakamuli e i ai loa ni tagata gologolo, ala e saele o mulimuli ki olatou oli fakalialia ;

¹⁹ ko latou ala e fakatupu ia ni fakavaevaega, ko ni tagata aga fakamanu latou, ala e leaise maua ia le Laumalie.

Fakamakeke ki le kau kilisiteano

²⁰ Kae ko koutou, alofaina, ke kotou faufau koutou totonu i lakoutou tui maokioki, ti ke kotou faikole i le Laumalie Maokioki,

²¹ ke kotou nofo mau i le alofa o le Atua, o talitali ki le manavaalofa o lotatou Aliki ko Sesu-Kilisito o uiga mo le mauli lee gato.

²² Ke kotou manavaalofa kia latou ala e lotolotolua ;

²³ ke kotou fakamauli ni iki o taaki latou mei le afi ; ti ke kotou manavaalofa ki ni iki i le tuania, ti ke kotou vesia ki ni iki o kaku ki le kofu leia kua fakakelekele e le kakano.

²⁴ Ki leia e mafai ke taupau ia koutou mei sigaaga fuli ti mo fakasa ia koutou, i mua o lona kololia, lee mele mo apele i le fiafia,

²⁵ ki le Atua e tasi, ko lotatou Fakamauli, ia Sesu-Kilisito ko lotatou Aliki, ke tuku kiate ia le kololia, mo le pule, mo le makeke, ti mo le mafimafi, mei mua o temi fuli, mo le temi nei, ti mo sekulo fuli ! Amene !