Sosue 9 - Tosi Tapu

Kakai o Sosue e le kau Kapaone

¹ I le logo ki nea ana, ko sau fuli ala na nonofo i le fetuu esite o le Solotane, mo le mauga, mo le potu taulalo, mo fenua fuli o le mata tai o le tai lasi, o kaku ki Lipane, le kau Eti, mo le kau Amole, mo le kau Kanaane, mo le kau Pelesi, mo le kau Evi, ti mo le kau Sepusi,

² na loto tasi loa ke lotou taui fakatasi a Sosue mo Iselaele.

³ I lolatou fetuu, na logo foki le kakai o Kapaone, kakai Evi, ki le nea leia na fai e Sosue ki Seliko mo Ai,

⁴ ti na lotou afa loa se puleaki fakakaka, o lotou ano loa mo ni tokonaki ki le fanoga. Na lotou too loa ni taga popo o tau ki alatou asino, ti mo ni utele vino afea ala na masaesae ti na toe tui ;

⁵ na lotou tui loa ni taka maumau ki olatou vae mo ni kofu popo kia latou, ti na lotou too loa ni pane kua malo mo sekaseka.

⁶ Na lotou ano loa kia Sosue i le nofolaga o Kilikale, ti na lotou pati loa kiate ia ti mo le kakai katoa o Iselaele : E motou au mei se fenua mamao o kole atu kia koutou ke kotou fai se sai mo matou i le aso nei.

⁷ Kae na tali loa a tagata o Iselaele ki le kau Evi : E lagi kotou nonofo loa i loto malie o matou, ti e feaki loa ke motou fai se sai mo koutou ?

⁸ Kae na lotou pati loa kia Sosue : Ko matou ko au tagata fakasausau. Ti na pati Sosue kia latou : Ko ai ma koutou ti e kotou au meifea ?

⁹ Na lotou tali loa kiate ia : e au au tagata fakasausau mei se fenua mamao ai i le logo ki le logologona o le Eteleno lou Atua ; talie na motou logo masau kiate ia, ki nea fuli ala na fai e ia i Esipito,

¹⁰ ti mo le nea na fai e ia ki sau e lua o le kau Amole ala na nonofo i le fetuu esite o le Solotane : Sioni, sau o Eseponi, mo Oki, sau o Pasani leia na nofo i Asetaloti.

¹¹ Ti na pati mai loa omatou kau fakamatuatua mo le kakai katoa o lomatou fenua kia matou : Ke kotou too ni nea kai ki le ala ti ke kotou ano o fakafelavei kia latou. Kotou pati loa kia latou : Ko matou ko akoutou tagata fakasausau ! I le aso nei ke kotou fai se sai mo matou !

¹² Ko leinei lamatou pane ! Na vevela a ia i le temi leia na motou too ai a ia o mavae mei omatou fale, ti ko leinei kua malo a ia mo sekaseka !

¹³ Ko utele anei na foou i le temi na motou fakaapele ai latou ki le vino, ti ko leinei kua lotou masaesae. Kua popo omatou kofu mo omatou taka i le loa veli o le ala.

¹⁴ Na too loa e tagata o Iselaele se koga o lalatou nea kai o kai, kae na galo loa ke lotou afa le finegalo o le Eteleno.

¹⁵ Na fai loa e Sosue se sai o le tokamalie mo latou leia na tonu ai ke tuku loa e ia kia latou le mauli, ti na fakamaoki loa kia latou a pule o le fakatasiga.

Tuaa o le kau Kapaone

¹⁶ Na sili loa ni aso e tolu ki le sai leia na fai mo latou, ti na soko loa le nea leinei : Na logo loa a fanau a Iselaele na nonofo fua a kakai ana i olatou tafa, ti na lotou nonofo fua i loto malie o latou.

¹⁷ Talie na ano loa a fanau a Iselaele ti na lotou kaku loa ki olatou kolo i le tolu o aso ; ko olatou kolo ko Kapaone, mo Kefila, mo Peeloti ti mo Kiliate-Sealimi.

¹⁸ Na leaise lotou tamate loa latou, talie na fakapapau a pule o le fakatasiga i le Eteleno, le Atua o Iselaele, ke tuku kia latou le mauli. Kae na lauveli loa le kakai katoa o Iselaele ki le kau pule.

¹⁹ Ti na pati loa a pule fuli ki le fakatasiga katoa : Kua motou fai kia latou se fakapapau i le suafa o le Eteleno, Atua o Iselaele, ti e leaise feala ke motou fafa kia latou i le aso nei.

²⁰ Ko leinei le nea leia e tonu ke motou fai kia latou : e motou tuku loa kia latou le mauli, ke aua na tou aumai loa le sausau o le Eteleno kia tatou, o tupu ko le fakapapau leia na tou fai kia latou.

²¹ Na pati loa a pule, e lotou mauli loa. Kae e lotou tokaga loa ki le tuuti o le fafie mo le asu o le vai ki le fakatasiga katoa, o fai ki le nea leia na fakasa kia latou e le kau pule.

²² Na kalagai loa latou e Sosue ke lotou fakatasi ake kiate ia, ti na pati loa a ia kia latou : Kolea na kotou kakai ai matou, ti na kotou fakamaoki ai na kotou au mei se fenua mamao ai, kae na kotou nonofo fua i omatou tafa ?

²³ I le aso nei e kotou malaia loa, ti e leaise toe oki loa i se aso lakoutou nofo popula, o tuuti le fafie mo asu le vai ki le fale tapu o loku Atua.

²⁴ Na tali loa le kau Kapaone kia Sosue, o pati : Kua logo au tagata fakasausau ki fakatotonu a le Eteleno, lou Atua, ki lana tagata fakasausau ko Moisese, ke soli kia koutou le fenua katoa leinei, ti ke tamate ona kakai fuli i mua o koutou, ti na motou i lasi loa kia koutou ti na matou loto gaegae loa o uiga mo omatou mauli : ko le tupuaga a ia o lamatou fai le puleaki lena.

²⁵ I le aso nei, ko leinei matou i ou lima ; fai kia matou le nea leia e ke tio e malie mo totonu ke fai kia matou.

²⁶ Na fai loa e Sosue kia latou ofaipe lana fakasa ; na saofaki loa e ia latou mei fanau a Iselaele, ala na leaise tamate ia loa latou ;

²⁷ kae na tuku loa e Sosue kia latou, talu mei le aso lena, ke lotou tuuti ia le fafie mo asu ia le vai ki le fakatasiga mo le aletale o le Eteleno, i le ganea leia e filifili loa e le Eteleno. Na lotou fai loa le nea lena o kaku mai ki le aso nei.