Sosue 8 - Tosi Tapu

Too o le kolo ko Ai

¹ Na pati loa le Eteleno kia Sosue : Aua na ke i, ti aua na ke loto gaegae ! too a tagata tau fuli, ti ke tuu ki aluga o ano o taui le kolo ko Ai. Tio, e kau tuku ki lou lima le sau o Ai mo lona kakai katoa, mo lona kolo, ti mo lona fenua.

² Ke ke fai loa ki le kolo ko Ai mo lona sau le nea leia na ke fai ki le kolo ko Seliko mo lona sau. Kae ke kotou too loa ma koutou a koloa mo manu ala e kotou maua loa i ai. Ke ke teuteui se oso fakapunamauli ki le kolo mei ona muli.

³ Na tuu ake loa Sosue mo ana tagata tau o pale ki Ai. Na filifili loa e ia se tino tolu afe tagata toa, ti na kakau loa e ia latou ke pale ki Ai i le pouli,

⁴ ti na tuku loa e ia kia latou le fakatotonu leinei : Ke kotou ano loa o mumuni i muli o le kolo, kae ke aua na kotou fakamamao loa mei ai, ti ke kotou teuteu fuli ki le oso !

⁵ Ko au, e kau saele loa ki Ai mo tagata tau fuli. I le temi leia e ulu mai ai loa ki fafo a kakai o le kolo o tau mai kia matou, e motou sosola loa i olatou mua ofaipe le uluaki faiaga.

⁶ E lotou tuli loa matou ti e motou faiga loa ke fakamamao latou mei le kolo. Talie e lotou pati loa e motou sosola i olatou mua ofaipe le uluaki faiaga.

⁷ I le temi lena, e kotou malaga loa mei lokoutou mumuniaga o too le kolo. Talie e tuku atu loa a ia kia koutou e le Eteleno, lokoutou Atua.

⁸ Ka kotou too loa le kolo, ti ke kotou tutu loa a ia ki le afi o mulimuli ki le fakatotonu a le Eteleno. Ke kotou tokaga o mulimuli ki laku fakatotonu !

⁹ Na kakau loa latou e Sosue ke ano, ti na lotou ano loa ki le ganea leia na tonu ke lotou mumuni ai. Na lotou nonofo loa i le vasa o Petele mo Ai, i le fetuu esite o Ai. Kae na nofo loa a Sosue i le po lena i loto malie o lana kau solia.

¹⁰ Na tuu ake loa Sosue i le mafoata o tanaki lana kau solia, ti na saele loa a ia ki Ai, i mua o le kakai, a ia mo le kau fakamatuatua o Iselaele.

¹¹ Na kaku loa le kau solia fuli leia na ano mo ia ki mua o Ai. Ti na lotou nofo loa i le fetuu noleto o le kolo ; na tuu se vaivailiua i le vasa o latou mo Ai.

¹² Na filifili loa e Sosue se kau tagata tau ko tino afe e lima, ti na fakatotonu loa e ia kia latou ke lotou ano o mumuni i le fetuu uesite o le kolo, i le vasa o Petele mo Ai.

¹³ Na tuu le nofolaga tafito o le solia i le fetuu noleto o le kolo, ti na tuu le tasi a potu o le solia i le fetuu uesite. Na ano loa Sosue i le po lena i loto o le vaivailiua.

¹⁴ I le pogipogi usu, i le tio a le sau o Ai ki le kakai o Iselaele, na fakatavili loa a ia o ulu ki fafo o le kolo mo lana solia katoa, ke taui a ia. Na ano loa le sau mo lona kakai katoa, ki se ganea leia kua fakatotonu ki ai, i le fetuu o le toafa, ti na leaise iloa e ia le solia leia kua mumuni i ona muli.

¹⁵ Na sola loa Sosue mo le kakai katoa o Iselaele i mua o le sau o Ai mo lona solia i le ala leia e ano ki le toafa.

¹⁶ Ti na tanaki loa le kakai katoa leia na nofo i le kolo ke tuli ia latou : na lotou tuli loa a Sosue, ti na lotou ano loa o mamao mei le kolo.

¹⁷ Na leaise toe nofo fua se tagata e toka tasi i Ai mo Petele. Na lotou ano fuli loa o tuli Iselaele. Na lotou tuku mavaa loa le kolo, kae lotou tuli loa Iselaele.

¹⁸ Na pati loa le Eteleno kia Sosue : Ke ke siki le tao leia e ke too i lou lima o fakaaga ki Ai, talie e kau tuku loa a ia ki ou lima. Na siki loa e Sosue lana tao leia na too i lona lima o fakaaga ki Ai.

¹⁹ I le temi fai lena na siki ai lona lima, na malaga ake loa a tagata ala na mumuni, o ulu fakatavili mai loa mei lolatou mumuniaga ; na lotou ulu loa ki le kolo, o too a ia, ti na lotou fakatavili loa o tutu a ia ki le afi.

²⁰ Na tagaki loa a tagata o Ai ki muli, ti na lotou tio loa ki le afi leia kua pale ake i lolatou kolo. Na leaise lotou toe maua ia loa se ganea leia ke lotou sosola ki ai, talie kua maliu ake loa le kakai o Iselaele leia na sola ki le toafa, o tau kia latou.

²¹ Talie i le temi leia na tio ai loa Sosue mo Iselaele katoa kua ulu ki le kolo tagata ala na mumuni talie kua sa le afu i aluga o le kolo, na lotou maliu loa o taui le kakai o Ai.

²² Ti ko tagata tau o Iselaele, ala na ulu ki le kolo, na ulu ake loa mei le kolo o toe taui le kakai o Ai. Na piki ia loa le kakai o Ai i loto malie o Iselaele leia na tamate loa latou o leaise toe sao fua se tasi.

²³ Na lotou too mauli loa le sau o Ai, o ave kia Sosue.

²⁴ I le oki loa o le tamate e Iselaele o le kakai fuli o Ai o kaku ki le fakamulimuli, i fafo o le kolo, i le toafa leia na lotou tuli ki ai le kakai o Iselaele, na toe liliu loa Iselaele ki Ai o tamate latou fuli ala na toe i ai.

²⁵ Na tamate loa i le aso lena le kakai katoa o Ai, ko le tino agafulu tupu lua afe, tagata mo fafine.

²⁶ Na leaise toe tuku ki lalo e Sosue lona lima leia na siki ia lana tao o fakaaga ki Ai, o kaku ki le tamate o le kakai katoa o le kolo.

²⁷ O mulimuli ki le fakatotonu leia na tuku e le Eteleno kia Sosue, na too loa e fanau a Iselaele kia latou a koloa mo manu ala na maua i le kolo.

²⁸ Na tutu loa e Sosue a Ai, ti na fakaliliu loa e ia le kolo ko se tuuga fatu lavaki leia koi tuu i le aso nei.

²⁹ Na tautau e ia ki se laakau le sau o Ai, o tuku a ia i ai o kaku ki le afiafi. I le vilo o le laa na tuku loa e Sosue le fakatotonu ke tatala le tino mei le laakau. Ti na ti loa a ia ki tafa o le matapa o le kolo, ti na fakatuu loa i ona aluga se tuuga fatu lasi, leia koi tuu i le aso nei.

Lau o tapuakina mo malaia

³⁰ Ti na fakatuu loa e Sosue se aletale ki le Eteleno, le Atua o Iselaele, i le mauga ko Epale,

³¹ o mulimuli ki le nea leia na fakatotonu e Moisese, tagata fakasausau a le Eteleno, ki fanau a Iselaele, nea kua tuu i le tosi o le lao a Moisese : ko se aletale na fau ki ni fatu katoa, ala na leaise siki ki ai le ukamea. Na lotou momoli loa i ai ni failaulau ki le Eteleno mo ni sakilifisio fakafetai.

³² Ti na tosi loa e Sosue i le ganea lena ki ni fatu se tasi a tosi o le lao leia na tosi e Moisese, i mua o fanau a Iselaele.

³³ Ko Iselaele katoa, ona kau tagata fakamatuatua, mo ona pule, mo ona tui fakamaau, na tutuu loa i fetuu e lua o le aleka, i mua o le kau tagata faisakilifisio, mo le kau Levi, ala na amo ia le aleka o le fakapapau a le Eteleno, a matapule ofaipe fanau a Iselaele, na lotou tutuu fuli i ai, ko le tasi vaelua i le fetuu o le mauga ko Kalisimi, ko le tasi vaelua i le fetuu o le mauga ko Epale, o mulimuli ki le fakatotonu leia na tuku i mua e Moisese, tagata fakasausau a le Eteleno, ke tapuakii le kakai o Iselaele.

³⁴ Ti na lau loa e Sosue a folafola fuli o le lao, a tapuakina mo malaia, o mulimuli ki nea fuli kua tosi i le tosi o le lao.

³⁵ Na lau e Sosue a folafola fuli a Moisese, o leaise puli fua se folafola e tasi, i mua o le fakatasiga katoa o Iselaele, mo fafine, mo toe ti mo matapule ala na saele i loto malie o Iselaele.