Sosue 7 - Tosi Tapu

Agasala a Akane, mo lona tautea

¹ Na fai loa e fanau a Iselaele se agatuu ki nea ala na fakatapui ki le Eteleno. Ko Akane, vosa o Kalemi, vosa o Sapeti, vosa o Selake mei le faasiga o Suta, na too ia loa ni nea i nea ala na fakatapui, ti na tupu ai loa le sausau o le Eteleno ki fanau a Iselaele.

² Na kakau loa e Sosue mei Seliko ni tagata ke ano ki Ai, leia na tuu i tafa o Pete-Aveni, i le fetuu esite o Petele. Na pati loa a ia kia latou : Kotou pale, ti kotou sivisivi le fenua. Na pale loa a tagata ana o sivisivi le kolo ko Ai.

³ Na lotou toe liliu ake loa kia Sosue o pati kiate ia : Ke aua na pale loa le kakai katoa ! Ke pale fai ni tino afe e lua pe tolu, ti e lotou tamate loa a Ai ! Ke aua na tuku ke pale le kakai katoa, talie e toka teiki fua le fili.

⁴ Na pale loa ki Ai ni kau tagata e tino afe tolu o le kakai, kae na lotou sosola loa i mua o le kakai o Ai.

⁵ Na tamate loa e le kakai o Ai se tino tolu tupu ono o le kakai o Iselaele, ti na lotou tuli loa le kau Iselaele mei le matapa o le kolo o kaku ki Sepalimi, ti na lotou tamate loa latou i le fakamaifo. Na luma loa le kakai i le nea lena, ti na lotou loto gaegae loa.

⁶ Na saei loa e Sosue lona kofu, ti na tutuli loa a ia ki lalo o fakatau ona mata ki le kele i mua o le aleka o le Eteleno, o kaku ki le afiafi, a ia mo le kau fakamatuatua o Iselaele. Ti na lotou laku foki mo le efu ki olatou ulu.

⁷ Na pati loa Sosue : Aliki Eteleno, kolea na ke tuku ai le kakai leinei ke fakalaka i le Solotane ke tuku matou ki lima o le kau Amole ke lotou tamate matou ? Na malie ake ke motou nofo i leia fetuu o le Solotane !

⁸ Ei Aliki, kolea loa le nea ke kau fakasa ia ki fanau a Iselaele, i le temi leinei kua lotou sosola ai i mua o olatou fili ?

⁹ E logo loa le kau Kanaane mo kakai fuli o le fenua leinei ki le nea leinei, ti e lotou fakatasi fuli loa o taui matou ke soloi lomatou igoa i aluga o le fenua ? Ti kolea loa le nea e ke fai ia loa ke fakasa ai lou igoa lasi ?

¹⁰ Na pati loa le Eteleno kia Sosue : Tuu ki aluga ! Kolea na ke fakatuu ai ou mata ki le kele ?

¹¹ Kua agasala a fanau a Iselaele : Kua lotou maumaui le fakapapau leia na kau tuku kia latou ; io, kua lotou too ni nea i nea ala na kau tapui kia latou, kua lotou kaia a nea ana, ti kua lotou fufu latou i loto malie o alatou kavega.

¹² Kapau ko lena, ti e leaise mafai loa ke tuu a fanau a Iselaele i mua o olatou fili ; e lotou sosola loa i mua o olatou fili, talie e lotou maumau tapu. E leaise kau toe kau loa mo koutou, mo kapau e leaise kotou maumaui loa a nea ala na kau tapui atu kia koutou.

¹³ Ke ke tuu ki aluga, ti ke ke fakamea le kakai. Ke ke pati loa : Ke kotou fakamea ki le aso apogipogi, talie ko leinei le folafola a le Eteleno, le Atua o Iselaele : E tuku ni nea kua fakatapui i loto malie o ou, Iselaele ! E leaise feala loa ke ke tuu i mua o ou fili mo kapau e leaise ke too a nea ana meiate koe.

¹⁴ I apogipogi usu, ke kotou fakafeofi loa ki mua o le Eteleno i faasiga. Ti ko le faasiga leia e filifili loa e le Eteleno e fakafeofi ake loa kiate ia i famili, ti ko le famili leia e filifili loa e le Eteleno e fakafeofi ake loa i tagata.

¹⁵ Ti ko leia na maua loa na too ia a nea ala na fakatapui, e tutu loa i le afi, a ia mo nea fuli na maua e ia, talie na maumaui e ia le fakapapau a le Eteleno, ti na fai e ia se agasala i Iselaele.

¹⁶ Na tuu ake loa Sosue i le mafoata, ti na fakafeofi ake loa e ia ki mua o le Eteleno a fanau a Iselaele i faasiga, ti na filifili loa e ia le faasiga o Suta.

¹⁷ Na fakafeofi ake loa a famili o Suta ti na filifili loa e ia le famili o Selake. Na fakafeofi ake loa le famili o Selake i tagata, ti na filifili loa e ia Sapeti.

¹⁸ Na fakafeofi ake loa a tagata o le famili o Sapeti, ti na filifili loa e ia Akane, vosa o Kalemi, vosa o Sapeti mei le faasiga o Suta.

¹⁹ Na pati loa Sosue kia Akane : Ei loku vosa, e kau kole atu kiate koe, ke ke fakaapaapa ki le Eteleno, le Atua o Iselaele, ti ke ke fakakololia kiate ia ! Koia ke ke fakasa mai kiate au le nea leia na ke fai, ke aua na ke toe fufu a ia kiate au !

²⁰ Na tali loa Akane kia Sosue : E maoki, ko au leia na fai ia le agasala ki le Eteleno, le Atua o Iselaele. Ko leinei katoa le nea leia na kau fai :

²¹ Na kau tio i le koloa o le tau ki se taupulupulu fulumalie mei Mesopotamia, mo ni fa sikele paaga e kau lelau lua, ti mo se potu aulo e kau lima sikele. Na kau manumanu loa ki nea ana, ti na kau too loa latou. Ko leinei latou kua tanu i le kele, i loto o loku falela, ti kua tautafa le paaga ki lalo.

²² Na kakau loa e Sosue ni tagata ke makape ki le falela o Akane. Na lotou maua loa a nea na tanu maoki i le falela o Akane, ti mo le paaga na tautafa ki lalo.

²³ Na lotou too loa a nea fuli mei loto o le falela, o lotou ave loa latou kia Sosue mo fanau fuli o Iselaele. Ti na lotou tuku loa a nea fuli ana ki mua o le Eteleno.

²⁴ Na too loa e Sosue mo fanau fuli o Iselaele a Akane, vosa o Selake, mo le paaga, mo le taupulupulu, mo le potu aulo, mo ona vosa, mo ona taineliki, mo ana pipi tagata, mo ana asino, mo lana kau ovi ti mo lana kau koti, mo lona falela, ti mo nea fuli na maua e ia. Na lotou ave loa latou ki le vaivailiua o Akolo.

²⁵ Na pati loa Sosue : Na ke fakatupu ia lomatou malaia ! E fakamalaia loa a koe e le Eteleno i le aso nei. Ti na tuki fatui loa a ia e Iselaele katoa. Ti na lotou toe tamate fenaaki loa lona famili katoa, kae na lotou tutu loa ana nea fuli.

²⁶ Ti na lotou fakatuu loa i ona aluga se tuuga fatu leia koi sa i le aso nei, ti na tafoki loa le Eteleno mei lona sausau. Koia na fakaigoa ai loa le ganea lena ko le popoko o Akole.