Sosue 6 - Tosi Tapu

Ko le too o Seliko

¹ Na tapotapono a matapa o Seliko ti na fakamaumau latou o tupu ko fanau a Iselaele. Na leaise ulu se tasi ki fafo, pe ulu ki loto.

² Na pati loa le Eteleno kia Sosue : Tio, e kau tuku ki ou lima a Seliko, mo lona sau, ti mo ona tagata tau loto toa.

³ Ko koe mo au tagata tau fuli, ke kotou fai loa le foli takatakai o le kolo ; ke kotou fai loa le foli takatakai o le kolo o tua tasi. Ke ke fai felaaki loa i aso e ono.

⁴ E ano loa a tagata faisakilifisio e toka fitu mo ni fakatagi pupusi, ko tagata e fitu i mua o le aleka. I le fitu o aso, ke kotou fai loa le foli takatakai o le kolo o tua fitu, ti ke pupusi loa e tagata faisakilifisio a fakatagi pupusi.

⁵ Ka kaku loa ki le temi leia e lotou pupusi ai loa se nota fakaloaloa, e fakamapa loa e le kakai se kalaga tau ti e sosolo loa a kaua o le kolo ki lalo. Ti ke pale loa a fanau a Iselaele ki le kolo, o tasi ano fakasako i ona mua.

⁶ Na kalagai loa e Sosue, vosa o Nune, le kau tagata faisakilifisio, o pati kia latou : Ke kotou amo ki okoutou tuauma le aleka o le fakapapau ti ke too e ni tagata faisakilifisio e toka fitu ni fakatagi pupusi, o saele i mua o le aleka o le Eteleno.

⁷ Ti na pati loa a ia ki le kakai : Ke kotou saele ! Ke kotou fai le foli takatakai o le kolo. Ti ke saele, i mua o le aleka o le Eteleno, a tagata tau mo alatou masafu.

⁸ Na fai loa a nea fuli o mulimuli ki le fakatotonu a Sosue. Na saele loa a kau tagata faisakilifisio e toka fitu, ala na ano mo fakatagi pupusi e fitu, i mua o le aleka o le Eteleno, o pupusi alatou fakatagi pupusi. Na muli loa le aleka o le fakapapau o le Eteleno ia latou.

⁹ Na ano loa le uluaki kau tagata too masafu i mua o le kau tagata faisakilifisio ala na pupusi ia a fakatagi pupusi. Ti na ano loa le lua kau tagata too masafu i muli o le aleka ; na pupusi loa a fakatagi pupusi i le lolotoga o le saele.

¹⁰ Na tuku loa e Sosue le fakatotonu leinei ki le kakai : Aua na kotou kalaga, aua na kotou fakaea lokoutou leo, aua na sa se masau mei lokoutou gutu o kaku ki le aso leia e kau pati atu ai loa kia koutou : Kotou fai ni kalaga ! Ti kotou fai loa ni kalaga !

¹¹ Na fai loa e le aleka o le Eteleno le foli takai o le kolo ; na fai e ia o tua tasi, ti na lotou toe liliu loa ki le nofolaga, ti na lotou nonofo ai loa i le pouli.

¹² Na tuu ake loa Sosue i le mafoata, ti na toe amo loa e le kau tagata faisakilifisio le aleka o le Eteleno.

¹³ Na saele loa a tagata faisakilifisio e toka fitu ala na ano mo fakatagi pupusi i mua o le aleka o le Eteleno, o pupusi alatou fakatagi pupusi. Na ano loa le uluaki kau tagata too masafu i mua o latou, ti na ano loa le lua kau tagata too masafu i muli o le aleka o le Eteleno. Na pupusi loa a fakatagi pupusi i le lolotoga o le saele.

¹⁴ Na lotou fai loa le foli takai o le kolo o tua tasi, i le lua aso ; Ti na lotou toe liliu loa ki le nofolaga. Na lotou fai felaaki i aso e ono.

¹⁵ I le fitu o aso, na lotou tutuu ake loa i le mafoata, ti na lotou fai loa le foli takai o le kolo o mulimuli ki le fakaanoano masani, o tua fitu. Ko le aso lena e tasi na lotou fai ai loa o tua fitu le foli takai o le kolo.

¹⁶ I le tua fitu, i le temi leia na pupusi ai loa e le kau tagata faisakilifisio se nota fakaloaloa, na pati loa Sosue ki le kakai : Ke kotou fakamapa loa ni kalaga, talie kua soli atu loa e le Eteleno le kolo kia koutou !

¹⁷ Ke maumaui loa le kolo mo nea fuli e maua i ai, talie kua fakatapui a ia ki le Eteleno. Kae e tuku loa le mauli ki le fafine faiaga ko Laape ti mo latou fuli ala e nonofo loa mo ia i lona loto fale, talie na fakamumuni e ia a tagata avelogo ala na tou kakau.

¹⁸ Ke kotou tokaga ai na kotou too ia loa se nea leia e tonu ke maumaui, talie e kotou aumai ia loa le malaia mo le maumau ki le nofolaga o fanau a Iselaele.

¹⁹ Ke fakatapui loa le paaga katoa, mo le aulo katoa, mo nea fuli e fau ki le kapa mo le ukamea ki le Eteleno, ti e tuku loa a nea ana ki le koloa o le Eteleno.

²⁰ Na pupusi loa a fakatagi pupusi o fakaloaloa, ti ko le kakai na logo loa ki tagi fakaloaloa o fakatagi pupusi. I le temi lena, na fakamapa loa e le kakai se kalaga tau makeke, ti na siga loa le kaua takai o le kolo ki lalo. Ti na pale loa le kakai ki le kolo, o tasi ano fakasako i ona mua. Ti na lotou too loa le kolo.

²¹ Na lotou tamate loa ki le seleta le kakai katoa o le kolo, a tagata mo fafine, a toe mo matua, mo pipi, mo ovi, ti mo asino.

²² Na pati loa a Sosue ki tagata e toka lua ala na ano o tioi le fenua : Kolua ano ki le fale o le fafine faiaga ti kolua fakamavae mei ai le fafine lena mo ana nea fuli e maua e ia, o fai ki le fakapapau leia na kolua fai kiate ia.

²³ Na ano loa a tagata esipio tupulaga ki le fale o Laape, ti na la fakamavae loa mei ai a Laape, mo lona tamana, mo lona tinana, mo ona fetaina ti mo nea fuli na maua e ia. Na la fakamavae loa mei ai lona famili katoa. Ti na la tuku loa latou ki se ganea saosaoa i tua o le nofolaga o Iselaele.

²⁴ Na lotou tutu loa le kolo mo nea fuli na maua i ai, kae na lotou tuku loa le siliva, mo le aulo, ti mo nea fuli na fau ki le kapa mo le ukamea ki le koloa o le fale o le Eteleno.

²⁵ Na tuku loa e Sosue le mauli ki le fafine faiaga ko Laape, mo lona famili katoa ti mo nea fuli na maua e ia. Na nofo loa Laape i loto malie o fanau a Iselaele o kaku mai ki le aso nei, o tupu na fakamumuni e ia a tagata ala na kakau e Sosue ke ano o tioi Seliko.

²⁶ I le aso lena, na fai loa e Sosue le fakapapau leinei : Ke malaia i mua o le Eteleno le tagata leia e tuu loa ki aluga o toe fakatuu le kolo leinei ko Seliko. E kenu loa e ia ona fakavae o totogi ki lona vosa uluaki ; ti e tau loa e ia ona matapa o totogi ki lona vosa lua.

²⁷ Na nofo loa le Eteleno mo Sosue, ti na mafola loa lona logologona i le fenua katoa.