Sosue 5 - Tosi Tapu

¹ Na logo loa a sau fuli o le kau Amole ala na nonofo i le fetuu uesite o le Solotane, ti mo sau o le kau Kanaane ala na nonofo i le mata tai o le Metitelanea ki le fakamasa e le Eteleno o le Solotane ke fakalaka ai a fanau a Iselaele. Ti na lotou loto gaegae loa ti na leaise lotou toe maua fua se ga makeke ke tau ki fanau a Iselaele.

Silikosisio o Iselaele i Kilikale

² I le temi a ia, na pati loa le Eteleno kia Sosue : Ke ke teuteui ni sele fatu ti ke ke silikosisio loa le tautupu foou leinei o fanau a Iselaele.

³ Na teuteui loa e Sosue ni sele fatu ti na silikosisio loa e ia a fanau a Iselaele, i le mauga ko Alaloti, leia ko le mauga o le silikosisio.

⁴ Ko leinei le tupuaga o lolatou silikosisio e Sosue : I le mavae o le kakai o Iselaele i Esipito, na silikosisio fuli a tagata na aoga ki le tau, kae na mamate fuli le tautupu lena i le toafa.

⁵ Kae na leai fua se silikosisio se fa toka tasi i tamaliki tagata fuli ala na tupu i le lolotoga o le fanoga i le toafa : Koia na tonu ai ke fai e Sosue le nea lena.

⁶ Talie na saele a fanau a Iselaele i le toafa i le fetuu e kau fa o kaku ki le maumaui o le puleaga katoa o tagata tau ala na mavae mei Esipito ti na leaise fakalogo ki le leo o le Eteleno ; na fakapapau loa e le Eteleno kia latou ke aua na fakatio latou ki le fenua leia na fakapapau e ia ki olatou tamana ke soli kia tatou, fenua leia e tafe ai le sua manu mo le sua meli.

⁷ Ko olatou fanau ala na fakanofo loa e ia ke fetogi ia latou ; ti na silikosisio loa latou e Sosue, talie na leikiaise silikosisio latou.

⁸ I le oki o le silikosisio o le puleaga katoa, na lotou nonofo loa i le ganea lena o kaku ki le mafo o olatou lavea.

Pasikate i le fenua o Seliko

⁹ Na pati loa le Eteleno kia Sosue : I le aso leinei kua kau tatala loa ia koutou le luma o Esipito. Ti na fakaigoa loa le ganea lena ko Kilikale o kaku mai ki le aso nei.

¹⁰ Na nofo loa a fanau a Iselaele i Kilikale ti na lotou fai loa le Pasikate i le aso kau agafulu tupu fa o le masina, i le afiafi, i le fenua o Seliko.

¹¹ Na lotou kai loa le fulumeto o le fenua i le apogipogi ake o le Pasikate, mo ni pane sala fakatupu, ti mo ni fuai fulumeto tunu. Na lotou kai a nea fuli ana i le aso lena.

¹² I le aso totonu lena na lotou kai ai a fua o le fenua, na gato ai loa le mane. Na leaise toe sa loa se mane, ti na kai loa e fanau a Iselaele a fua o le fenua o Kanaane i le fetuu lena.

Le pule o le kau tau a le Eteleno

¹³ I le tuu a Sosue o feofi ki Seliko, na siki ake loa ona mata ki aluga ti na tio a ia ki se tagata leia na tuu i ona mua mo lana seleta kua kukumi i lona lima. Na fakafeofi ake loa Sosue kiate ia, o pati : Pe ke kau mo matou pe ke kau mo omatou fili ?

¹⁴ Na tali loa le tagata : Leai, kae ko au ko le pule o kau tau a le Eteleno, e kau kaku mai nei. Na punou loa Sosue o fakatau ona mata ki le kele, o su, mo pati : Kolea le nea leia e fakasa e loku aliki ki lana tagata fakasausau ?

¹⁵ Na pati loa le pule o le kau tau a le Eteleno kia Sosue : Tatala ou taka i ou vae, talie e maokioki le ganea leia e ke tuu ai. Ti na fai loa a Sosue ki ai.