Sosue 3 - Tosi Tapu

Ko le fakalaka i le Solotane na malo

¹ Na tuu ake loa Sosue i le mafoata, a ia mo fanau fuli o Iselaele. Ti na lotou mavae loa i Sitime, o lotou ano loa o kaku ki le Solotane. Ti na lotou nonofo loa i ai i le pouli, i mua o le fakalaka i le Solotane.

² I le sili o aso e tolu, na ano loa ni tagata ofisa i loto o le nofolaga,

³ ti na lotou tuku loa le fakatotonu leinei ki le kakai : ka kotou tio loa ki le aleka o le fakapapau o le Eteleno, lokoutou Atua, kua amo e le kau Levi faisakilifisio, ke kotou mavae loa i le ganea leia e kotou nofo ai, ti ke kotou saele loa i ona muli.

⁴ Kae ke i ai loa se vasa ia koutou mo le aleka, ko ni tukilima e lua afe : ke aua na kotou fakafeofi ki ai. E fakasa atu loa e ia kia koutou le ala leia ke kotou ano ai, talie e leikiaise kotou ano i le ala lena.

⁵ Na pati loa Sosue ki le kakai : Ke kotou fakamea, talie i apogipogi e fai loa e le Eteleno ni nea fakaofolele i loto malie o koutou.

⁶ Na pati loa Sosue ki le kau tagata faisakilifisio : Ke kotou amo le aleka o le fakapapau ti ke kotou saele i mua o le kakai. Na lotou amo loa le aleka o le fakapapau ti na lotou saele loa i mua o le kakai.

⁷ Na pati loa le Eteleno kia Sosue : I le aso nei e kau kamata loa le fakamakeke o lou pule i mata o fanau fuli a Iselaele, talie ke lotou iloa e kau nofo mo koe ofaipe laku nofo mo Moisese.

⁸ Ke ke tuku loa le fakatotonu leinei ki tagata faisakilifisio ala e amo ia le aleka o le fakapapau : Ka kotou ulu loa ki le vai o le Solotane ti ke kotou tutuu loa i loto o le Solotane.

⁹ Na pati loa Sosue ki fanau a Iselaele : Ke kotou fakafeofi mai ki leinei ti ke kotou fakalogo ki folafola a le Eteleno, lokoutou Atua.

¹⁰ Na pati loa Sosue : E kotou iloa loa i le nea leinei e nofo le Atua mauli i loto malie o koutou, ti e kapu loa e ia i okoutou mua le kau Kanaane, mo le kau Eti, mo le kau Evi, mo le kau Pelesi, mo le kau Kilikasi, mo le kau Amole, ti mo le kau Sepusi :

¹¹ Ko leinei, e fakalaka loa le aleka o le fakapapau o le Aliki o le malama nei katoa i le Solotane i mua o koutou.

¹² I le aso nei, ke kotou filifili ni tagata e tino agafulu tupu lua i faasiga e kau agafulu tupu lua o Iselaele, se fa tagata e tasi i le faasiga.

¹³ I le temi e tuu ai loa ki le vai o le Solotane a vae o le kau tagata faisakilifisio ala e amo ia le aleka o le Eteleno, Aliki o le malama nei katoa, e mavae lua loa a vai o le Solotane, e tanaki fakatasi loa a vai ala e tafe mei mua ofaipe se kaua.

¹⁴ Na mavae loa le kakai mei olotou falela ke fakalaka i le Solotane, ti na saele loa le kau tagata faisakilifisio ala na amo ia le aleka i mua o le kakai.

¹⁵ Na apele pipi le Solotane ti na mafola ona vai i ona kauvai fuli i le temi katoa o le tau fulumeto. I le lakaga na kaku ai ki le Solotane le kau tagata faisakilifisio ala na amo ia le aleka, ti na susu ai olatou vae i le kauvai,

¹⁶ na tuu loa a vai ala na tafe mei mua, o tanaki pe se kaua i se ganea leia na mamao meia latou i mua, i Atama, kolo leia e tuu i tafa o Salatani ; ti na masa katoa loa le vai leia na tafe ki le tai Mate. Na fakalaka loa le kakai i le Solotane i mua o Seliko.

¹⁷ Na tutuu loa a tagata faisakilifisio ala na amo ia le aleka o le fakapapau o le Eteleno i le kele malo, i loto malie o le Solotane, i le temi katoa leia na fakalaka ai a fanau a Iselaele i le malo, o kaku ki le oki o le fakalaka o le puleaga katoa i le Solotane.