Sosue 24 - Tosi Tapu

Masau a Sosue ki le kakai i Siseme

¹ Na tanaki loa e Sosue a faasiga fuli o Iselaele i Siseme. Ti na kakau loa e ia ke nake kiate ia a kau fakamatuatua o Iselaele, mo ona pule, mo ona tui fakamaau ti mo ona ofisa. Ti na lotou ano loa ki mua o le Atua.

² Na pati loa Sosue ki le kakai katoa : Ko leinei le folafola a le Eteleno, le Atua o Iselaele : Na nonofo okoutou tamana, a Telake, tamana o Apalaamo mo tamana o Nakole, i mua i le kauvai o le vaitafe lasi ko le Eufalate, ti na lotou tausi ki ni atua kese.

³ Na kau too loa lokoutou tamana ko Apalaamo i le kauvai o le vaitafe ti na kau fakafoli a ia i le fenua katoa o Kanaane ; na kau soli loa kiate ia se sakoga mauke, ti na kau soli loa kiate ia Isaake.

⁴ Na kau soli loa kia Isaake a Sakopo mo Esau ; na kau soli loa kia Esau le mauga o Seili, kae na ifo loa Sakopo mo ona vosa ki Esipito.

⁵ Na kau kakau loa Moisese mo Alone, ti na kau taai loa Esipito ki ni malaia na kau fai i loto malie o le fenua ; ti na kau fakamavae loa koutou mei ai.

⁶ Na kau fakamavae loa okoutou tamana mei Esipito, ti na kotou kaku loa ki le tai Kula. Na tuli loa e le kau Esipito okoutou tamana o kaku ki le tai Kula, ki ni saliote ti mo ni tagata ekeosi.

⁷ Na tagi loa okoutou tamana ki le Eteleno. Ti na tuku loa e le Eteleno se fakapouli i le vasa o koutou mo le kau Esipito, ti na aumai loa e ia kia latou le tai, o lotou lomakia ai loa. Na tio okoutou mata ki le nea leia na kau aga o fai ki le kau Esipito. Ti na kotou nonofo loa i le toafa o fualoa.

⁸ Na kau taki loa koutou ki le fenua o le kau Amole, leia na nofo i le fetuu esite o Solotane, ti na lotou tau loa kia koutou. Kae na kau tuku loa latou ki okoutou lima, ti na kotou too loa lolatou fenua, ti na kau maumaui loa latou i okoutou mua.

⁹ Na tuu ake loa Palaki, vosa o Tesipoli, sau o Moape, o tau ki Iselaele. Ti na kole loa e ia kia Palaami, vosa o Peoli, ke fakamalaia e ia koutou.

¹⁰ Kae na leaise kau fia logo fua kia Palaami ; ti na tuku loa e ia kia koutou se tapuaki, ti na kau saofaki loa koutou mei le lima o Palaki.

¹¹ Na kotou fakalaka loa i le Solotane ti na kotou kaku loa ki Seliko. Na tau loa kia koutou le kakai o Seliko, mo le kau Amole, mo le kau Eti, mo le kau Kilikasi, mo le kau Evi, ti mo le kau Sepusi. Kae na kau tuku loa latou ki okoutou lima,

¹² ti na kau kakau loa i okoutou mua ni lago utiuti, ala na kapu ia loa latou o mamao mei okoutou mata, ofaipe sau e lua o le kau Amole : na leaise fai a nea ana e okoutou seleta mo okoutou kalolo.

¹³ Na kau soli loa kia koutou se fenua leia na leaise kotou pakia ki ai, mo ni kolo ala na leaise kotou fakatuu ia kae kua kotou nofo ai, mo ni vite ti mo ni olive ala na leaise kotou to ia kae kua kotou kai olatou fua.

Ke kotou filifili i le aso nei…

¹⁴ I le aso nei, ke kotou i ki le Eteleno ti ke kotou tausi kiate ia i lokoutou loto katoa mo le loto agatonu. Ke kotou maumaui a atua ala na tausi ki ai okoutou tamana, i leia fetuu o le vaitafe ko le Eufalate ti mo Esipito, kae ke kotou tausi ki le Eteleno.

¹⁵ Ti kapau e leaise kotou fia tausi loa ki le Eteleno, ke kotou filifili loa i le aso nei leia e kotou fia tausi ki ai : pe ko atua ala na tausi ki ai okoutou tamana i leia fetuu o le Eufalate, pe ko atua o le kau Amole i lolatou fenua leia e kotou nonofo ai nei. Ko au mo loku famili, e motou tausi loa ki le Eteleno.

¹⁶ Na tali loa le kakai, o pati : E mamao ia matou le manatu ke tiaki le Eteleno ti ke tausi ki ni atua kese !

¹⁷ Talie ko le Eteleno ko lomatou Atua ; ko ia leia na fakamavae ia matou mei Esipito, mei le fale o le popula, matou mo omatou tamana ; ko ia leia na fakasoko ia i omatou mua a milakulo lalasi ana, ti na taupau ia matou i le ala katoa leia na motou saele ai, ti na puipui ia matou mei puleaga ala na motou fakalaka ai.

¹⁸ Na kapu e ia i mua o tatou a puleaga fuli, ti mo le kau Amole leia na nofo i le fenua leinei. Ko matou foki, e motou tausi loa ki le Eteleno, talie ko ia ko lomatou Atua.

¹⁹ Na pati loa Sosue ki le kakai : E leaise kotou maua ia loa le makeke ke tausi ki le Eteleno, talie ko se Atua maokioki a ia, ko se Atua fuaa ; e leaise fakamolemole loa e ia akoutou patigataa mo akoutou agasala.

²⁰ Kapau e kotou tiaki loa le Eteleno ti kapau e kotou tausi loa ki ni atua kese, e maliu atu loa a ia kia koutou o tautea koutou ti mo tamate koutou, ti e maumaui loa e ia koutou i le oki o lana tapuaki kia koutou.

²¹ Na pati loa le kakai kia Sosue : Leai ! talie e motou tausi loa ki le Eteleno.

²² Na pati loa Sosue ki le kakai : E kotou fakamaoki kia koutou totonu ko koutou ala na filifili ia le Eteleno ke tausi kiate ia. Ti na lotou tali loa : E motou fakamaoki !

²³ Ke kotou tiaki loa i le aso nei a atua kese ala e maua ia koutou, ti ke kotou afei okoutou loto ki le Eteleno, le Atua o Iselaele.

²⁴ Na pati loa le kakai kia Sosue : E motou tausi loa ki le Eteleno, lomatou Atua, ti e motou fakalogo loa ki lona leo.

²⁵ Na fai loa e Sosue i le aso lena se sai mo le kakai, o tuku loa kiate ia ni lao mo ni lekula, i Siseme.

²⁶ Na tosi loa e Sosue a nea ana i le tosi lao a le Atua. Na too loa e ia se fatu lasi, o fakatuu i lena i lalo o le Sene leia na tuu i le ganea tapu o le Eteleno.

²⁷ Ti na pati loa Sosue ki le kakai katoa : Ko leinei : e tuu loa le fatu leinei pe se fakamaoki kia koutou, talie na logo a ia ki folafola fuli ala na fakasa e le Eteleno kia koutou. Io, e tuu loa le fatu leinei ko se fakamaoki kia koutou o tupu ke aua na kotou agatuu loa ki lokoutou Atua.

²⁸ Ti na kakau loa e Sosue le kakai ke tasi ano ki lona tofiga.

Mate o Sosue

²⁹ I le oki o nea ana, na mate loa Sosue, vosa o Nune, tagata fakasausau a le Eteleno, i lona fetuu kau lelau kau agafulu.

³⁰ Na tanu loa a ia i le fenua o lona tofiga, i Timinati-Sela, i le mauga o Efalaimi, i le potu noleto o le mauga o Kaasi.

³¹ Na tausi Iselaele ki le Eteleno i le lolotoga o le mauli katoa o Sosue ti mo le lolotoga o le mauli o le kau matua ala na mauli i le oki o le mate o Sosue ti na tio ki gaoiaga fuli ala na fai e le Eteleno ki Iselaele.

³² Ko ivi o Sosefo, ala na avake e fanau a Iselaele mei Esipito, na tanu loa i Siseme, i le ga kele leia na totogi e Sakopo ki vosa o Amole, tamana o Siseme, ki ni fa kesita e kau lelau. Na kau le ganea lena ki le tofiga o vosa o Sosefo.

³³ Na mate foki mo Eleasale, vosa o Alone, ti na tanu loa a ia i Kipea-Finesi, leia na soli ki lona vosa ko Finesi, i le mauga o Efalaimi.