Sosue 23 - Tosi Tapu

Tokoi a Sosue ki pule o Iselaele

¹ Na sili loa se temi fualoa ki le soli e le Eteleno o le malolo ki Iselaele, o saofaki a ia mei fili fuli ala na takatakai ia a ia. Kua kaku loa Sosue o matua, ti kua lasi ai ona fetuu.

² Ti na tanaki loa e Sosue a Iselaele katoa, mo ona kau fakamatuatua, mo ona kau pule, mo ona kau tui fakamaau ti mo ona kau ofisa. Ti na pati loa a ia kia latou : Kua kau matua, ti kua lasi ai oku fetuu.

³ Kua kotou tio ki nea fuli ala na fai e le Eteleno, lokoutou Atua, ki puleaga fuli ana i okoutou mua ; talie na tau le Eteleno, lokoutou Atua, o tupu ko koutou.

⁴ Kotou tio, kua kau soli kia koutou ke kotou maua tofiga i le toso, o mulimuli ki okoutou faasiga, a puleaga ana na toe, mei le Solotane, ti mo puleaga fuli ala na kau tamate, o kaku ki le tai lasi i le viloaga o le laa.

⁵ E kapu loa latou e le Eteleno, lokoutou Atua, i okoutou mua ; ti e kotou maua loa lolatou fenua, ofaipe le pati a le Eteleno, lokoutou Atua.

⁶ Ke kotou tokaga o tausi i lokoutou loto katoa ti mo fai a nea fuli ala e tuu i le tosi lao a Moisese, ke aua na kotou se ki le fetuu atamai pe ko le fetuu sema.

⁷ Ke aua na kotou fakatasi mo puleaga ana koi nonofo ia koutou. Ke aua na kotou faikole ki olatou atua, ke aua na kotou too a igoa olatou atua i akoutou fakapapau, ti ke aua na kotou punou i olatou mua o su kia latou.

⁸ Kae ke kotou pipiki ki le Eteleno toka tasi, lokoutou Atua, ofaipe lakotou fai o kaku mai ki le aso nei.

⁹ Kua kapu e le Eteleno i okoutou mua ni puleaga lalasi mo makeke ; ti na leaise tasi fua na toe mafai ke tuu i okoutou mua.

¹⁰ Na kapu e le fa toka tasi o koutou ni fili e tino afe, talie na tau loa le Eteleno, lokoutou Atua o tupu ko koutou, o fai ki lana folafola.

¹¹ Koia ke kotou tokaga kia koutou totonu ti ke kotou alofa ki le Eteleno, lokoutou Atua.

¹² Kapau e kotou titua loa kiate ia, o pipiki loa ki le toega o puleaga ala koi nonofo ia koutou, ti kapau e kotou fakatasi loa mo puleaga ana i ni avaga, ti kapau e kotou filo loa mo latou,

¹³ ke kotou iloa fakapapau e leaise toe kapu loa e le Eteleno, lokoutou Atua, a puleaga ana i okoutou mua ; kae e liliu loa a puleaga ana kia koutou ko ni kupega mo ni masele, ko ni fue i okoutou vakavaka, ko ni laakau talatala i okoutou mata, o kaku ki lokoutou pupuli loa i le fenua malie leia na soli atu kia koutou e le Eteleno, lokoutou Atua.

¹⁴ Kiate au, kua vave fua loku mate. I le aso nei ke kotou fakamaoki i lokoutou loto katoa mo lokoutou laumalie katoa e leaise folafola fua e tasi i folafola malilie ala na fai kia koutou e le Eteleno, lokoutou Atua, na leaise fua : kua soko a folafola fuli kia koutou, ti na leai fua se folafola e tasi na tuku noa.

¹⁵ Koia e tatau mo folafola malilie ala na fai kia koutou e le Eteleno, lokoutou Atua, ti na fakasoko fuli e ia kia koutou, e toe fakasoko loa e le Eteleno kia koutou a folafola veveli fuli, o kaku ki lokoutou maumaui loa i le fenua malie lena na soli kia koutou e le Eteleno, lokoutou Atua.

¹⁶ Kapau e kotou maumaui loa le fakapapau leia na tuku e le Eteleno, lokoutou Atua, kia koutou, ti kapau e kotou ano loa o tausi ki ni atua kese mo atolasio kia latou, e vilo loa le sausau o le Eteleno kia koutou, ti e kotou pupuli vave loa i le fenua malie lena na soli e le Eteleno kia koutou.