Sosue 22 - Tosi Tapu

Liliu o Lupeni, Kate, vaelua o Manase

¹ Ti na kalagai loa e Sosue a faasiga o Lupeni, mo le faasiga o Kate, ti mo le vaelua o le faasiga o Manase.

² Na pati loa a ia kia latou : Kua kotou fai a nea fuli ala na fakatotonu kia koutou e Moisese, tagata fakasausau a le Eteleno, ti kua kotou fakalogo ki loku leo i nea fuli ala na kau fakatotonu kia koutou.

³ Na leaise kotou tiaki loa okoutou fetaina lolotoga se temi fualoa o kaku mai ki le aso nei, ti na kotou fai le fakatotonu leia na tuku kia koutou e le Eteleno, lokoutou Atua.

⁴ I le aso nei kua soli ai e le Eteleno, lokoutou Atua, le malolo ki okoutou fetaina, o fai ki le nea leia na pati a ia kia latou, kotou toe liliu la o ano ki okoutou falela, i le fenua leia kua kotou maua, leia na soli atu kia koutou e Moisese, tagata fakasausau a le Eteleno i le fetuu esite o le Solotane.

⁵ Ke kotou tokaga fua o tausi ti mo fai a fakatotonu mo lao ala na tuku atu kia koutou e Moisese, tagata fakasausau a le Eteleno. Kotou alofa ki le Eteleno, lokoutou Atua, kotou saele i ona ala fuli, kotou tausi ana folafola, kotou pipiki kiate ia, ti kotou tausi kiate ia i lokoutou loto katoa mo lokoutou laumalie katoa.

⁶ Ti na tapuaki loa Sosue kia latou, ti na kakau loa e ia latou ke toe liliu ki olatou falela, ti na lotou ano loa.

⁷ Na soli e Moisese ki se tasi vaelua o le faasiga o Manase se tofiga i Pasani, i le fetuu esite o le Solotane, ti na soli loa e Sosue ki leia ake vaelua se tofiga i le fetuu uesite o le Solotane, i tafa o ona fetaina. I le temi leia na kakau ai loa latou e Sosue ke toe liliu ki olatou falela, na tapuaki loa a ia kia latou,

⁸ ti na pati loa a ia kia latou : Ke kotou toe liliu la ki okoutou falela mo ni koloa lasi, mo ni kau manu lasi, mo ni paaga lasi, mo ni aulo, mo ni kapa, mo ni ukamea ti mo ni teu. Ke kotou vae loa mo okoutou fetaina a koloa ala na maua mei okoutou fili.

⁹ Na toe liliu loa a vosa o Lupeni, mo Kate, mo le vaelua o Manase, ki olatou falela. Na lotou poloaki loa mo la ake fanau a Iselaele i Silo, i le fenua o Kanaane. Ti na lotou ano loa ki le fenua o Kalaate, fenua leia na soli kia latou, o mulimuli ki le fakatotonu a le Eteleno leia na tuku e Moisese.

Le aletale i le kauvai o le Solotane

¹⁰ I lalatou kaku loa ki le kauvai o le Solotane, leia e kau ki le fenua o Kanaane, na fakatuu loa e vosa o Lupeni, mo Kate, ti mo le vaelua o Manase, se aletale i tafa o le Solotane, se aletale leia na lasi ai ki mata.

¹¹ Na logo loa a fanau a Iselaele ki le masau : Ko leinei kua fakatuu loa e fanau o Lupeni, mo Kate, ti mo le vaelua o Manase, se aletale i le kauvai o le Solotane, i lotatou fetuu, i le fenua o Kanaane.

¹² I le logo lena, na fakatasi loa a fanau fuli o Iselaele i Silo ke ano o taui latou ala e nonofo i le fetuu esite o le Solotane.

¹³ Na kakau loa e fanau a Iselaele a Finesi, vosa o le tagata faisakilifisio ko Eleasale, ke ano ki le fenua o Kalaate o masau ki vosa o Lupeni, mo Kate, ti mo le vaelua o Manase,

¹⁴ ti na ano loa mo ia ni tagata pule e tino agafulu, ko le tagata e tasi i le faasiga ; na lotou pule famili fuli i faasiga o Iselaele.

¹⁵ Na lotou ano loa ki le fenua o Kalaate ki vosa o Lupeni, mo vosa o Kate, ti mo vosa o le vaelua o Manase, ti na lotou masau loa, o pati :

¹⁶ Ko leinei le nea leia na fakasa e le fono katoa a le Eteleno : Kolea kua kotou fai ai le sala lasi leinei ki le Atua o Iselaele ? Kolea kua kotou tiaki ai i le aso nei le Eteleno, o kotou fakatuu se aletale ke kotou fakafesagai ai i le aso nei ki le Eteleno ?

¹⁷ I Peoli, na tou fai ai se sala leia koi tou lolotoga kai nei foki ona fua i le aso nei, logo ai le malaia leia na tuku e le Eteleno i le aso lena ki lona kakai katoa ! Pe leaise feauga i ai ?

¹⁸ Ko leinei kua kotou tiaki le Eteleno ! Kapau e kotou fakafesagai i le aso nei ki le Eteleno, i apogipogi e ita loa a ia ki le kakai katoa o Iselaele.

¹⁹ Kapau e kotou tio e kelekele lokoutou tofiga ki le Eteleno, ti ke kotou au ki le fenua totonu o le Eteleno, leia e tuu ai le nofoaga o le Eteleno, ti ke kotou maua i ai se tofiga i loto malie o matou. Kae ke aua na kotou fakafesagai ki le Eteleno, ti ke aua na kotou fakafesagai kia matou, o fakatuu se aletale kese kia koutou kae tiaki le aletale o le Eteleno, lokoutou Atua.

²⁰ I le aso leia na fai ai e Akane, vosa o Sela, se sala lasi o uiga mo koloa ala na tapu lona too, na vilo le sausau o le Eteleno ki le kakai katoa o Iselaele. Talie na leaise mate loa Akane toka tasi i lana sala !

²¹ Na tali loa a vosa o Lupeni, mo Kate, mo le vaelua o Manase ki pule o tino afe o Iselaele, o pati :

²² Atua, Atua, le Eteleno, Atua, Atua, e iloa e le Eteleno, ti e iloa loa e Iselaele le tupuaga o le nea leia na matou aga o fai. Kapau na motou fai ia se patigataa, pe ko se agatuu ki le Eteleno, ti ke aua na toe fakamauli e ia matou i le aso nei !

²³ Kapau na motou fakatuu ia se aletale kia matou ke motou agatuu ai ki le Eteleno, o momoli i ai ni failaulau, mo ni moliga nea kai, ti mo ni sakilifisio fakafetai, ke totogi loa e le Eteleno kia matou !

²⁴ Kae e leaise ko lena lona tupuaga ! Talie na motou fai le nea lena o tupu na motou tuania ia loa le temi ki muli, o uiga mo amatou fanau. E feala loa ke pati okoutou vosa ki omatou vosa i se aso : Kolea e kotou kau ai ki le Eteleno, Atua o Iselaele ?

²⁵ Talie kua fakatuu e le Eteleno totonu le Solotane ko le koiga ia matou mo koutou, vosa o Lupeni mo vosa o Kate ; e leaise kotou kau fua ki le Eteleno ! Ti e feala loa i se aso ki okoutou fanau ke lotou kapu omatou fanau ke aua na lotou toe tausi ki le Eteleno.

²⁶ Koia na motou pati ai loa : Ke tou fakatuu se aletale, o leai ki ni failaulau ti mo ni sakilifisio,

²⁷ kae ke tuu ko se fakamaoki, kia koutou mo matou, ki okoutou sakoga mo omatou sakoga ki muli, e motou fia tausi ki le Eteleno i ona mua ki ni failaulau, mo ni sakilifisio fakamalie, mo ni sakilifisio fakafetai, ti mo ni moliga nea kai, ti ke aua na pati loa okoutou vosa ki omatou vosa i se aso ki muli : E leaise kotou kau ki le Eteleno !

²⁸ Na motou pati loa : kapau, i se temi ki muli, e lotou fai loa le pati lena kia matou mo amatou fanau, e motou tali loa kia latou : Ke kotou tio ki le paaki o le aletale o le Eteleno, leia na fai e omatou tamana, o leai ki ni failaulau ti mo ni sakilifisio, kae ofaipe se fakamaoki kia matou mo koutou.

²⁹ Ke mamao ia matou le manatu ke motou patigataa ki le Eteleno ti ke motou tiaki le Eteleno i le aso nei, o fakatuu se aletale ke momoli ai ni failaulau, mo ni moliga, ti mo ni sakilifisio, kae tiaki le aletale o le Eteleno, lotatou Atua, leia e tuu i mua o lona nofoaga !

³⁰ I le logo a le tagata faisakilifisio ko Finesi, mo pule o le kakai, ti mo pule o tino afe o Iselaele ala na ano mo ia, ki masau ala na fakasa e vosa o Lupeni, mo vosa o Kate, ti mo vosa o Manase, na latou tokamalie katoa loa.

³¹ Ti na pati loa Finesi, vosa o le tagata faisakilifisio ko Eleasale, ki vosa o Lupeni, mo vosa o Kate, ti mo vosa o Manase : E motou iloa i le aso nei e nofo le Eteleno i loto malie o tatou, talie ko lena na leaise kotou fai ia se agatuu ki le Eteleno. Ti kua kotou saofaki a fanau a Iselaele mei le lima o le Eteleno.

³² Na mavae loa Finesi, vosa o le tagata faisakilifisio ko Eleasale, ti mo pule mei vosa o Lupeni mo vosa o Kate, ti na lotou toe liliu loa mei le fenua o Kalaate ki le fenua o Kanaane, ki fanau a Iselaele, o lotou fakamatala loa kia latou a nea fuli.

³³ Na tokamalie loa a fanau a Iselaele ; ti na lotou fakafetai loa ki le Atua, ti na leaise lotou toe masau loa ke pale mo alatou masafu o maumaui le fenua leia na nofo ai a vosa o Lupeni mo vosa o Kate.

³⁴ Na fakaigoa loa e vosa o Lupeni mo vosa o Kate le aletale ko Ete, talie na lotou pati loa, ko le fakamaoki a ia ia tatou ko le Eteleno e Atua !