Sosue 21 - Tosi Tapu

Kolo e kau valu o le kau Levi

¹ Na fakafeofi ake loa a pule famili o le kau Levi ki le tagata faisakilifisio ko Eleasale, mo Sosue, vosa o Nune, ti mo pule o famili o faasiga o fanau a Iselaele.

² Na lotou masau loa kia latou i Silo, i le fenua o Kanaane, o pati : Na fakatotonu e le Eteleno ia Moisese ke tuku mai kia matou ni kolo ke motou nonofo ai ti mo ni faisaga i olatou tafatafa ke fagai ai amatou kau manu.

³ Ti na soli loa e fanau a Iselaele ki le kau Levi, i olatou tofiga, a kolo anei ti mo faisaga i olatou tafatafa, o mulimuli ki le fakatotonu a le Eteleno.

⁴ Na fai loa le toso ki famili o le kau Keati ; ti na tuku loa e le toso ki le kau Levi, vosa o le tagata faisakilifisio ko Alone, a kolo e kau agafulu tupu tolu o le faasiga o Suta, mo le faasiga o Simeone ti mo le faasiga o Pesamino.

⁵ Na tuku loa e le toso ki la ake a vosa o Keati a kolo e kau agafulu o famili o le faasiga o Efalaimi, mo le faasiga o Tane ti mo le vaelua o le faasiga o Manase.

⁶ Na tuku loa e le toso ki vosa o Kelesoni a kolo e kau agafulu tupu tolu o le faasiga o Isakale, mo le faasiga o Asele, mo le faasiga o Nefetali, ti mo le vaelua o le faasiga o Manase i Pasani.

⁷ Na maua loa e vosa o Melali a kolo e kau agafulu tupu lua o le faasiga o Lupeni, mo le faasiga o Kate, ti mo le faasiga o Sapulone.

⁸ Na soli loa e fanau a Iselaele ki le kau Levi, i le toso, a kolo ana mo olatou takatakai, o mulimuli ki le fakapapau leia na tuku e le Eteleno kia Moisese.

⁹ Ko nei loa a igoa o kolo o le faasiga o vosa o Suta mo le faasiga o vosa o Simeone ala na soli loa

¹⁰ ki vosa o Alone, mei le faasiga o Keati, vosa o Levi. Talie ko latou ala na uluaki filifili loa e le toso.

¹¹ Na lotou soli loa kia latou Kiliate-Alepa, leia ko Epelone, i le mauga o Suta, ti mo faisaga ala na tuu i olatou tafatafa. Ko Alapa ko le tamana o Anake.

¹² Kae na soli loa a kele o le kolo mo kolo liliki ala na fakalogo ki ai, kia Kalepo, vosa o Sefune.

¹³ Ti na lotou soli loa ki vosa o le tagata faisakilifisio ko Alone le kolo ulufaga o tagata tukipo, ko Epelone mo ona tua kolo, mo Lipina mo ona tua kolo,

¹⁴ mo Satili mo ona tua kolo, mo Esetemoa mo ona tua kolo ;

¹⁵ mo Oloni mo ona tua kolo, mo Tepile mo ona tua kolo ;

¹⁶ mo Aine mo ona tua kolo, mo Suta mo ona tua kolo, ti mo Pete-Semesi mo ona tua kolo, kolo e iva o faasiga ana e lua.

¹⁷ Mei le faasiga o Pesamino, na lotou soli loa ki le kau Levi, a Kapaone mo ona tua kolo, mo Kepa mo ona tua kolo ;

¹⁸ mo Anatote mo ona tua kolo, ti mo Alemone mo ona tua kolo, kolo e fa.

¹⁹ Ko le fakatasi o kolo o tagata faisakilifisio, vosa o Alone, ko kolo e kau agafulu tupu tolu mo olatou tua kolo.

²⁰ Na maua loa i le toso e le kau Levi ala na kau ki famili o la ake a vosa o Keati ni kolo i le faasiga o Efalaimi.

²¹ Na soli loa kia latou le kolo ulufaga ki le kau tukipo, ko Siseme mo ona tua kolo, i le mauga o Efalaimi, mo Kesele mo ona tua kolo,

²² mo Kipisaimi mo ona tua kolo, ti mo Pete-Oloni mo ona tua kolo, kolo e fa ;

²³ Mei le tofiga o Tane, na lotou maua loa Eleteke mo ona tua kolo, mo Kipetoni mo ona tua kolo ;

²⁴ mo Asaloni mo ona tua kolo, ti mo Kate-Limoni mo ona tua kolo, kolo e fa.

²⁵ I le tofiga o le vaelua o le faasiga o Manase, na lotou maua loa Tanake mo ona tua kolo, ti mo Kate-Limoni mo ona tua kolo, kolo e lua.

²⁶ Ko le fakatasi o kolo : ko le kau agafulu, mo olatou tua kolo, ki famili o la ake a vosa o Keati.

²⁷ Na soli loa ki vosa o Kelesoni, i famili o le kau Levi : mei le vaelua o le faasiga o Manase, le kolo ulufaga ki le kau tukipo, ko Kolani i Pasani mo ona tua kolo, ti mo Peesetela mo ona tua kolo, kolo e lua ;

²⁸ mei le faasiga o Isakale, Kisioni mo ona tua kolo, mo Tapalati mo ona tua kolo ;

²⁹ mo Salamuti mo ona tua kolo, ti mo Ene-Kanimi mo ona tua kolo, kolo e fa ;

³⁰ mei le faasiga o Asele, ko Miseali mo ona tua kolo, mo Apitoni mo ona tua kolo ;

³¹ mo Elekati mo ona tua kolo, ti mo Leopi mo ona tua kolo, kolo e fa ;

³² mei le faasiga o Nefetali, le kolo ulufaga ki le kau tukipo ko Ketesi i Kalilea mo ona tua kolo, mo Amote-Tesoa mo ona tua kolo, ti mo Kalatani mo ona tua kolo, kolo e tolu.

³³ Ko le fakatasi o kolo o le kau Kelesoni, o mulimuli ki olatou famili ko kolo e kau agafulu tupu tolu mo olatou tua kolo.

³⁴ Na soli loa ki le toe o le kau Levi, ala na kau ki famili o vosa o Melali : mei le faasiga o Sapulone, ko Sokeneami mo ona tua kolo, mo Kaleta mo ona tua kolo ;

³⁵ mo Timina mo ona tua kolo, ti mo Naalali mo ona tua kolo, kolo e fa ;

³⁶ mei le faasiga o Lupeni, ko Peteseli mo ona tua kolo, mo Saatesa mo ona tua kolo,

³⁷ mo Ketemoti mo ona tua kolo, ti mo Mefaati mo ona tua kolo, kolo e fa ;

³⁸ mei le faasiga o Kate, le kolo ulufaga ki le kau tukipo ko Lamoti i Kalaate mo ona tua kolo, mo Maanaimi mo ona tua kolo,

³⁹ mo Eseponi mo ona tua kolo, ti mo Saesele mo ona tua kolo, kolo e fa.

⁴⁰ Ko le fakatasi o kolo na tuku loa e le toso ki vosa o Melali, o mulimuli ki olatou famili ko kolo e kau agafulu tupu lua.

⁴¹ Ko le fakatasi o kolo o le kau Levi i loto malie o tofiga o fanau a Iselaele : ko kolo e kau fa tupu valu, mo olatou tua kolo.

⁴² Na soli loa kia latou a kolo fuli ana mo olatou tua kolo.

Na soko fuli a fakapapau a le Eteleno

⁴³ Na soli loa e le Eteleno ki Iselaele le fenua katoa leia na fakapapau e ia ke soli ki olatou tamana ; na lotou too loa a ia ti na lotou nonofo loa i ai.

⁴⁴ Na tuku loa e le Eteleno kia latou le malolo i olatou koiga fuli, o fai ki lana fakapapau ki olatou tamana. Na leaise toe tuu se tasi o ona fili i olatou mua : talie na tuku loa latou e le Eteleno ki olatou lima.

⁴⁵ Na leaise tiaki noa loa se nea fua e tasi i folafola malilie ala na fai e le Eteleno ki le fale o Iselaele, na lotou soko fuli loa.