Sosue 20 - Tosi Tapu

Kolo ulufaga e ono

¹ Na masau loa le Eteleno kia Sosue, o pati :

² Masau ki fanau a Iselaele, o pati kia latou : Kotou filifili loa kia koutou, o fai ki laku fakatotonu kia Moisese, ni kolo ulufaga,

³ ala ke feala loa ke sola ki ai le tagata tukipo leia na tamate ia loa se tasi kae na leaise loto a ia ki ai. E kotou sosola loa ki ai ke kotou sao mei le tagata totogi toto.

⁴ E sola loa le tagata tukipo ki se kolo i kolo ana. E tuu loa a ia i le matapa o le kolo lena, ti e fakamatala loa e ia lona anoaga ki le kau fakamatuatua o le kolo lena. E lotou fakaulu loa a ia ki le kolo, ti e lotou soli loa kiate ia se ganea ke nofo ai mo latou.

⁵ Kapau e tuli loa a ia e le tagata totogi toto, e leaise lotou tuku loa a ia ki lima o le tagata totogi toto ; talie na tukipooi e ia lona oloi kae na leaise loto a ia ki ai, ti na leaise fili a ia kiate ia i mua.

⁶ E nofo loa a ia i le kolo lena o kaku ki le aso leia e fakamaaui ai loa a ia i mua o le fono, o kaku ki le mate o le tagata faisakilifisio lasi leia e gaoi i le temi lena. I le temi lena, e toe liliu loa le tagata tukipo o toe ulu ki lona kolo ti mo lona fale, i le kolo leia na sola mei ai.

⁷ Na lotou filifili loa Ketesi i Kalilea, i le mauga o Nefetali ; mo Siseme, i le mauga o Efalaimi ; mo Kiliate-Alepa, leia ko Epelone, i le mauga o Suta.

⁸ I leia ake fetuu o le Solotane, i le fetuu esite o Seliko, na lotou filifili loa Petesele, i le toafa leia e kau ki le faasiga o Lupeni, mo Lamoti, i Kalaate, leia e kau ki le faasiga o Kate, ti mo Kolani i le fenua o Pasani, leia e kau ki le faasiga o Manase.

⁹ Ko na loa a kolo ala na filifili loa ki fanau a Iselaele mo matapule ala e nonofo mo latou, o tupu ke sola ki ai a tagata fuli ala na tukipooi ia se tasi tagata kae na leaise lotou loto ki ai, ti ke aua na mate a ia i le lima o le tagata totogi toto i mua o lona fakamaaui i le fono.