Sosue 2 - Tosi Tapu

Ko esipio mo Laape

¹ Na kakau fakafufu loa e Sosue, vosa o Nune, mei Sitime ni tagata esipio e toka lua, o pati kia laua : Ke kolua ano o tioi le fenua kae tafito a Seliko ! Na la ano loa, ti na la ulu loa ki le fale o se fafine faiaga, ti ko le igoa o le fafine lena ko Laape, ti na la momoe loa i ai.

² Na fakasa loa ki le sau o Seliko : Ko leinei, na tau mai ni tagata o Iselaele ki leinei i le po leinei o tioi le fenua.

³ Na kakau loa e le sau o Seliko ke pati kia Laape : Ke ke fakamavae a tagata ala kua au kiate koe, ti kua ulu ki lou fale, talie na la au o tioi le fenua katoa.

⁴ Na too loa e le fafine le sa tagata o fakamumuni ; ti na pati loa a ia : E maoki na au a tagata ana ki loku fale, kae na leaise kau iloa ia le ganea leia na la au mei ai ;

⁵ ti na toe ano tagata ana i le pouli, i le temi leia na tapono ai le matapa o le kolo, ti e leaise kau iloa pe na la ano ki fea. Kae kapau e kotou fakavilivili nei o tuli laua ti e kotou tapo loa laua.

⁶ Na fakakake e ia laua ki le fata o le fale ti na taotao e ia laua ki ni fuiga kaui lino ala na tanaki i le fata.

⁷ Na ano loa a tagata a le sau, o tuli le sa tagata i le ala o le Solotane, o kaku ki ona kauvai, ti na tapono loa le matapa i le mavae o le kau tuli.

⁸ I mua o le momoe o tagata esipio, na pale loa Laape kia laua i le fata,

⁹ ti na pati loa a ia ki le sa tagata : E kau iloa kua tuku atu e le Eteleno kia koutou le fenua leinei ; ti kua vilo kia matou le i kia koutou, ti kua loto gaegae le kakai fuli o le fenua leinei, o tupu ko koutou.

¹⁰ Talie kua motou logo na fakamasa e le Eteleno i okoutou mua a vai o le tai Kula, i le aso leia na kotou mavae ai i Esipito, ti mo le nea leia na kotou fai ki sau e lua o le kau Amole, ko Sioni mo Oki, ala na nonofo i le kauvai esite o le Solotane ti na kotou tamate.

¹¹ Na motou logo ki nea ana, ti kua motou loto gaegae ai, ti e leai fua se tagata koi maua ia se ga makeke ke tau kia koutou, talie ko le Eteleno ko lokoutou Atua, e Atua a ia i aluga i le lagi, ti mo le malama nei i lalo.

¹² I le aso nei, ke kolua fakapapau mai kiate au, i le suafa o le Eteleno, e kolua toe liufaki loa ki loku famili se alofa e tatau mo leia na kau maua kia koulua. Ke kolua tuku mai kiate au se fakamailoga leia e fakasa ai loa lokoulua agatonu.

¹³ Ke kolua fakapapau mai kiate au e kolua tuku loa ke mauli loku tamana, mo loku tinana, mo oku fetaina, mo oku tuagaane, mo nea fuli e lotou maua, ti e leaise kolua fakataga loa ke tamate matou.

¹⁴ Na tali loa a tagata esipio kiate ia : E ma fakapapau atu kiate koe le nea lena i oma mauli, mo kapau e leaise ke fakasa ia se nea o uiga mo maua. I le aso leia e soli ai loa e le Eteleno kia matou le fenua leinei, e ma agatonu loa kiate koe, ti e ma tuku loa kiate koe loma alofa.

¹⁵ Ti na fakaifo loa laua e le fafine ki se maea i le katupa, talie na tuu lona fale i le kaua o le kolo. Na nofo a ia i le kaua totonu.

¹⁶ Na pati loa le fafine kia laua : Ke kolua ano loa ki le fetuu o le mauga, ke aua na maua loa koulua e latou ala e afa ia koulua. Ke kolua mumuni loa i le ganea lena, i ni aso e tolu, o kaku ki le toe liliu mai o latou ana e afa ia koulua. Ka oki, tio kolua soko atu loa lokoulua fanoga.

¹⁷ Na pati loa a tagata esipio kiate ia : Ko leinei le nea leia e ma aga loa o fai ke fakasoko ai le fakapapau leia na ke kole mai ke ma fai atu kiate koe.

¹⁸ I le aso leia e motou kaku mai ai loa ki le fenua leinei, ke ke nonoa loa le va kula leinei ki le katupa leia ka ke fakaifo ai loa maua, ti ke ke fakatasii fuli loa ki ou tafa, i loto o lou fale, lou tamana, mo lou tinana, mo ou fetaina, ti mo lou famili katoa.

¹⁹ Kapau e mavae kese loa se tasi mei lou fale, ti e pule loa a ia toka tasi ki lona mate ti e ma mea loa i le nea lena. Kae kapau e fafa loa ki se tasi leia e nofo mo koe i lou loto fale, ti e vilo loa lona toto ki oma ulu.

²⁰ Kae kapau e ke fakamafola ia loa se nea o uiga mo maua, ti e ma lauatea loa i le fakapapau leia na ke kole mai ke ma fai atu kiate koe.

²¹ Na pati loa le fafine : Ke fai o mulimuli ki nea ala kua kolua pati ki ai. Ti na tuku loa e le fafine a tagata esipio ke ano, ti na la ano loa. Na nonoa loa e le fafine le va kula ki le katupa.

²² Na la ano loa, ti na la kaku loa ki le mauga, leia na la nonofo ai loa i ni aso e tolu o kaku ki le toe liliu mai o latou ala na afa ia laua. Ko latou ala na tuli ia laua na afa ia loa laua i le fenua katoa lena, kae na leaise lotou maua laua.

²³ Na toe liliu loa a tagata esipio, ti na la ifo ake loa mei le mauga, o la fakalaka loa i le Solotane. Na la kaku loa kia Sosue, vosa o Nune, ti na la fakamatala loa kiate ia a nea fuli ala na soko kia laua.

²⁴ Na la pati loa kia Sosue : kua tuku maoki e le Eteleno ki otatou lima le fenua katoa. Talie kua loto gaegae le kakai katoa o le fenua, o tupu ko tatou.