Sosue 18 - Tosi Tapu

Ko tofiga o la ake faasiga e fitu

¹ Na fakatasi loa le kakai katoa o fanau a Iselaele i Silo. Na lotou fakatuu loa i ai le falela tapu. Na fakalogo le fenua katoa kia latou.

² Na toe loa a faasiga e fitu o fanau a Iselaele ala na leaise maua ia se tofiga.

³ Na pati loa Sosue ki fanau a Iselaele : E kotou talitali loa kiafea ke too le fenua leia na soli kia koutou e le Eteleno, le Atua o okoutou tamana ?

⁴ Ke kotou filifili ni tagata e toka tolu i le faasiga, ti e kau kakau loa latou. E lotou tutuu loa ki aluga, o folii loa le fenua, ti mo fai loa se paaki ki le fakavaevae o le fenua, ti e lotou toe liliu mai loa kiate au.

⁵ E lotou vae fitu loa le fenua. E nofo loa a Suta i ona koiga i le saute, ti e nofo loa a Sosefo i ona koiga i le noleto.

⁶ Ti ko koutou, e kotou fai loa se tosi o le fenua o vae fitu, ti kotou aumai loa a ia kiate au i leinei. E kau fai loa le toso kia koutou i leinei i mua o le Eteleno, lokoutou Atua.

⁷ Kae e leaise maua loa se tofiga ki le kau Levi i loto malie o koutou, talie ko lolatou tofiga ko le tuulaga fakapelepitelo a le Eteleno ; ti ko Kate, mo Lupeni ti mo le vaelua o le faasiga o Manase kua maua olatou tofiga i le fetuu esite o le Solotane : na soli e Moisese, tagata fakasausau o le Eteleno, olatou tofiga kia latou.

⁸ I le tutuu ake loa o tagata ana o ano, ke tosi se paaki o le fenua, na tuku loa e Sosue le fakatotonu leinei kia latou : Kotou ano, kotou folii le fenua, kotou tosi katoa a ia, ti kotou toe liliu mai loa kiate au ; ti e kau fai loa kia koutou le toso i mua o le Eteleno, i Silo.

⁹ Na ano loa a tagata ana, ti na lotou folii loa le fenua, ti na lotou fai loa le tosi isi o le fenua ki vaega e fitu, o mulimuli ki kolo. Ti oki, na lotou toe liliu loa kia Sosue i le nofolaga i Silo.

¹⁰ Na fai loa e Sosue kia latou le toso i Silo i mua o le Eteleno, ti na tufa loa e ia a vaega e fitu o le fenua ki fanau a Iselaele, o soli ki le faasiga taki tasi lona vaega.

Ko le tofiga o Pesamino

¹¹ Ko le uluaki vaega na toso ko le vaega o vosa o Pesamino, o mulimuli ki olatou famili, ti ko le vaega leia na soli kia latou na tuu ona koiga i loto o vosa o Suta mo vosa o Sosefo.

¹² I le fetuu noleto, na natu lolatou koiga i le Solotane, o fano i le fetuu noleto o Seliko, o pale ki le mauga i le uesite, o kaku ki le toafa o Pete-Aveni.

¹³ I ai, na ano loa a ia ki Lusi, o fakalaka i le fetuu saute o Lusi, leia na igoa foki ko Petele, ti ifo loa a ia i lena ki Ataloti-Ata i loto o le mauga leia e tuu i le fetuu saute o Pete-Oloni lalo.

¹⁴ I le fetuu uesite, na soko atu le koiga o maliu i le saute o kamata i le mauga leia e tuu i mua o Pete-Oloni ; na soko atu loa a ia ki le saute o kaku ki Kiliate-Paale, leia ko Kiliate-Sealimi, kolo o vosa o Suta. Ko lena le koiga i le fetuu uesite.

¹⁵ I le fetuu saute, na kamata loa le koiga i Kiliate-Sealimi, o ano ki le Uesite, o kaku ki matapuna o Nefetoa.

¹⁶ Na ifo loa a ia ki le taupotu o le mauga leia e tuu i mua o le vaivailiua o Pene-Inome, i le vaivailiua o le kau Lefaimi i le noleto. Na ifo loa a ia i le vaivailiua o Pene-Inome, i le fetuu saute o le kau Sepusi, o kaku ki Ene-Lokueli.

¹⁷ Na ano loa a ia ki le noleto ki Ene-Semesi mo Kelisoti, leia e tuu i mua o le paleaga o Atumimi, ti na ifo loa a ia ki le fatu o Poani, vosa o Lupeni.

¹⁸ Na ano loa a ia i le fetuu noleto i mua o Alapa, o ifo ki Alapa,

¹⁹ ti na soko atu loa a ia i le fetuu noleto o Pete-Okala, o kaku ki le potupotu noleto o le tai Mate, i le ganea leia e tau ki ai a vai o le Solotane. Ko lena le koiga saute.

²⁰ Ko le koiga esite ko le Solotane. Ko na koiga o le tofiga o vosa o Pesamino.

²¹ Ko kolo o le faasiga o vosa o Pesamino, o mulimuli ki olatou kutuga, ko Seliko, mo Pete-Okala, mo Emeki-Ketesi ;

²² mo Pete-Alapa, mo Semalaimi, mo Petele ;

²³ mo Avimi, mo Pala, mo Ofala ;

²⁴ mo Kefa-Amonai, mo Ofeni ti mo Kepa ; ko kolo e kau agafulu tupu lua mo olatou kolo liliki.

²⁵ Mo Kapaone, mo Lama, mo Peeloti ;

²⁶ mo Misipe, mo Kefila, mo Mosa ;

²⁷ mo Lekeme, mo Selepeele, mo Taleala ;

²⁸ mo Sela, mo Elefi, mo Sepusi, leia ko Selusalemi, mo Kipeati ti mo Kiliate ; kolo e kau agafulu tupu fa mo olatou kolo liliki. Ko lena le tofiga o vosa o Pesamino o mulimuli ki olatou famili.