Sosue 17 - Tosi Tapu

Tofiga o le vaelua o Manase

¹ Na i ai foki se tofiga na tuku e le toso ki le faasiga o Manase, talie ko le uluaki a ia o Sosefo. Ko Makile, ko le vosa uluaki o Manase ti ko le tamana o Kalaate, na maua ia a Kalaate mo Pasani, talie ko se tagata tau a ia.

² Na soli loa ki le toso se tasi vaega ki la ake a vosa o Manase, o mulimuli ki olatou famili : ki vosa o Apiesele, ki vosa o Eleki, ki vosa o Aseliele, ki vosa o Siseme, ki vosa o Efele, ki vosa o Semita : Ko na vosa o Manase, vosa o Sosefo, o mulimuli ki olatou famili.

³ Ko Selofate, vosa o Efele, vosa o Kalaate, vosa o Makile, vosa o Manase, na leaise maua ia loa se vosa kae na maua loa e ia ni taineliki, ti ko nei olatou igoa : ko Mala, mo Noa, mo Okala, mo Milika ti mo Tilitesa.

⁴ Na lotou ano loa ki mua o le tagata faisakilifisio ko Eleasale, mo mua o Sosue, vosa o Nune, ti mo mua o pule, o pati : Na fakatotonu loa e le Eteleno kia Moisese ke soli mai kia matou se tofiga i loto malie o omatou tuagaane. Ti na soli loa kia latou, o mulimuli ki le fakatotonu a le Eteleno, se tofiga i loto malie o fetaina o lolatou tamana.

⁵ Na soli loa e ia kia Manase ni iki ake vaega e kau agafulu, o kese fai le fenua o Kalaate mo Pasani, ala na maua e ia i le fetuu esite o le Solotane.

⁶ Talie na maua loa e taineliki o Manase se tofiga i loto malie o olatou tuagaane. Na maua loa le fenua o Kalaate e la ake a vosa o Manase.

⁷ Na ano loa le koiga o Manase mei Asele i Mikemetati, leia e ofi i Siseme, o kaku ki Samine ki le kakai o Ene-Tapuake.

⁸ Na maua loa le fenua o Tapuake e vosa o Manase, kae na maua loa le kolo o Tapuake i le koiga e vosa o Efalaimi.

⁹ Na ifo loa le koiga ki le liua o Kana, i le saute o le liua. Na maua loa a kolo ana e vosa o Efalaimi, i loto malie o kolo o Manase. Na kaku loa le koiga o Manase i le noleto o le liua ki le tai Metitelanea.

¹⁰ Na maua loa le fenua o le saute e Efalaimi, ko leia o le noleto e Manase, ti na tuu loa le tai Metitelanea ko lola koiga. Na la lave loa kia Asele i le fetuu noleto ti mo Isakale i le esite.

¹¹ Na maua loa e Manase i le tofiga o Isakale mo Asele : a Pete-Seani mo ona kolo liliki, mo Sipeleami mo ona kolo liliki, mo Tole mo ona kolo liliki, mo Ene-Toli mo ona kolo liliki, mo Taanaki mo ona kolo liliki, mo Mekito mo ona kolo liliki : ko fenua e tolu.

¹² Na leaise mafai loa e vosa o Manase ke lotou too a kolo ana, ti na loto loa le kau Kanaane ke nonofo i le fenua lena.

¹³ I le temi leia na makeke ai a fanau a Iselaele, na lotou teki loa ki le kau Kanaane ni tukusau mo ni gaoi, kae na leaise lotou kapu loa latou.

¹⁴ Na masau loa a vosa o Sosefo kia Sosue, o pati : Kolea na ke tuku ai loa kia matou se tofiga e tasi, kae ko leinei e motou api, talie na tapuaki le Eteleno kia matou o kaku mai ki le aso nei ?

¹⁵ Na pati loa Sosue kia latou : Kapau ko koutou ko se kakai api, ke kotou pale loa ki le vaomatua, ti ke kotou faala loa se ganea i le fenua o le kau Pelesi mo le kau Lefaimi, mo kapau e ikiiki le mauga o Efalaimi kia koutou.

¹⁶ Na tali loa a vosa o Sosefo : E leaise feauga loa le mauga kia matou, ti e i ai ni saliote ukamea i le kau Kanaane fuli ala e nonofo i le vaivailiua, mo latou ala e nonofo i Pete-Seani mo ona kolo liliki, ti mo latou ala e nonofo i le vaivailiua o Siseleele.

¹⁷ Na pati loa Sosue ki le fale o Sosefo, mo Efalaimi ti mo Manase : Ko koutou ko se kakai api, ti e lasi lokoutou makeke, e leaise kotou maua loa se tofiga e tasi i le fenua.

¹⁸ Kae e kotou maua loa le mauga, talie ko se vaomatua leia e kotou faala loa, ti e kotou maua loa ona ala fuli, ti e kotou nofoi loa a ia katoa. E kotou kapu loa le kau Kanaane, logo ai alatou saliote ukamea mo lolatou makeke.