Sosue 14 - Tosi Tapu

Vae o le fenua i le uesite o le Solotane

¹ Ko nei a tofiga na maua loa e fanau a Iselaele i le fenua o Kanaane, ala na tufa e le tagata faisakilifisio ko Eleasale, mo Sosue, vosa o Nune, ti mo pule o famili o faasiga o Iselaele ki fanau a Iselaele.

² Na fai le tufa ki le toso, o mulimuli ki le nea na fakatotonu e le Eteleno kia Moisese, ki faasiga e iva ti mo le vaelua.

³ Talie kua soli e Moisese ni tofiga ki faasiga e lua ti mo le vaelua i le fetuu esite o le Solotane ; kae na leaise soli loa e ia se tofiga ki fanau o Levi.

⁴ Na nofo a vosa o Sosefo mo faasiga e lua, ko Manase mo Efalaimi. Ti na leaise soli loa se vaega ki le kau Levi i le fenua, gato fai ki kolo ala ke lotou nonofo ai, ti mo olatou tafatafa ki alatou kau manu mo alatou koloa.

⁵ Na mulimuli loa a fanau a Iselaele ki fakatotonu ala na tuku e le Eteleno kia Moisese, ti na lotou vae loa le fenua.

Kole a Kalepo

⁶ Na fakafeofi ake loa a vosa o Suta kia Sosue, i Kilikale ; ti na pati loa Kalepo, vosa o Sefune, tagata Kenasi, kiate ia : E ke iloa ia le nea leia na fakasa e le Eteleno kia Moisese, tagata a le Atua, o uiga mo au ti mo koe, i Katesi-Palenea.

⁷ Na kau fetuu kau fa i le temi lena na kakau ai au e Moisese, tagata fakasausau a le Eteleno, mei Katesi-Palenea, ke ano o sivisivi le fenua, ti na kau fai kiate ia se fakamatala o mulimuli ki le nea leia na maua i loku loto.

⁸ Na fakalotogaegae loa e oku fetaina ala na pale mo au le kakai, kae ko au, na kau saele katoa i le ala o le Eteleno, loku Atua.

⁹ Ti na fakapapau loa Moisese i le aso lena, o pati kiate au : E maoki, ko le fenua leia na takafi e lou vae e liliu loa ko lou tofiga ti mo le tofiga o ou vosa o lee gato, o tupu na ke mulimuli katoa i le ala o le Eteleno, lou Atua.

¹⁰ Ko leinei kua fakatologa e le Eteleno loku mauli o kaku mai ki le aso nei, o fai ki le nea leia na fakasa e ia kiate au. Kua oki fetuu e kau fa tupu lima ki le fakapapau lena na fai e le Eteleno kia Moisese, i le temi leia na saele ai a Iselaele i le toafa ; ti ko leinei kua kau fetuu kau valu tupu lima i le aso nei.

¹¹ Koi kau makeke ofaipe le aso leia na kakau ai au e Moisese ; koi kau nofo nei mo loku makeke katoa leia na kau nofo mo ia i le temi lena, tatau pe ke ano o tau, pe ke ulu ki fafo, pe ke ulu ki loto.

¹² Koia ke ke soli mai kiate au le mauga leinei na masau ki ai le Eteleno i le aso lena ; talie na ke iloa i le aso lena na nofo i ai ni fanau a Anake, ti na tuu i ai ni kolo tau lalasi mo makeke. Ko leia fua ke nofo le Eteleno mo au, ti e kau kapu ia loa latou, o mulimuli ki le nea leia na fakasa e le Eteleno.

¹³ Na tapuaki loa Sosue kia Kalepo, vosa o Sefune, ti na tuku loa e ia kiate ia le kolo ko Epelone, ko lona tofiga.

¹⁴ Koia na maua ai loa e Kalepo, vosa o Sefune, tagata Kenati, le kolo ko Epelone, ko lona tofiga, o tupu na mulimuli katoa a ia i le ala o le Eteleno, le Atua o Iselaele.

¹⁵ Na igoa Epelone i le temi mua ko Kiliate-Alepa : ko Alapa, ko le tagata na logologona lasi ai i fanau a Anake. Ti na malolo loa le fenua i le tau.