Sosue 13 - Tosi Tapu

Vae o le fenua : le potu na toe

¹ Kua matua loa Sosue ti kua lasi ai ona fetuu. Ti na pati loa le Eteleno kiate ia : Kua ke matua ai ti kua lasi ai ou fetuu, ti e lasi ai le fenua leia koi toe ke ke taui.

² Ko leinei le fenua leia koi toe : ko fenua fuli o le kau Filisitini ti mo le fenua katoa o le kau Kesuli,

³ mei Sikole leia e tafe i mua o Esipito o kaku ki le koiga o Ekeloni i le noleto, fenua o le kau Kanaane, ti e nofoi e sau e lima o le kau Filisitini, le sau o Kasa, mo le sau o Asetoti, mo le sau o Asekaloni, mo le sau o Kati, ti mo le sau o Ekeloni, ti mo le kau Avi.

⁴ I le saute, koi toe le fenua katoa o le kau Kanaane, ti mo Meala, leia e maua e le kau Sitone, o kaku ki Afeke, ki le koiga o le kau Amole,

⁵ mo le fenua o Kipiloti, ti mo le Lipane i le sopoaga o le laa, mei Paale-Kati i vae o le mauga ko Elemoni, o kaku ki le matapa o Amati ;

⁶ mo le kakai katoa o le mauga, mei le Lipane o kaku ki Misilefoti-Maimi, le kau sitonia fuli. E kau kapu loa latou i mua o fanau a Iselaele. Soli fua le fenua leinei ki Iselaele ki le toso ke lotou maua tofiga, o mulimuli ki le nea leia na kau fakatotonu atu kiate koe ;

⁷ ti ke ke vae loa i le aso nei le fenua lena ki faasiga e iva mo le vaelua o le faasiga o Manase.

Vae o le potu esite o le Solotane

⁸ Na maua e le faasiga o Lupeni, mo Kate, mo le tasi vaelua o le faasiga o Manase olatou tofiga i le fetuu esite o le Solotane, leia na soli kia latou e Moisese, tagata fakasausau a le Eteleno :

⁹ mei Aloele i kauvai o le liua ko Alenone, ti mei le kolo leia e tuu i loto malie o le vaivailiua, le fenua katoa o Metepa o kaku ki Tiponi ;

¹⁰ mo kolo fuli o Sioni, sau o le kau Amole, leia na sau i Eseponi, o kaku ki le koiga o vosa o Amone ;

¹¹ mo Kalaate, mo le fenua o le kau Kesuli mo le kau Maaka, mo le mauga katoa o le Elemoni, ti mo le Pasani katoa, o kaku ki Salaka ;

¹² mo le puleaga o Oki i Pasani, leia na sau i Asataloti ti mo Etelei, leia na kau ki le kau tagata lalasi fakamuli o le kau Lefaimi. Na tamate e Moisese a sau ana, ti na kapu loa e ia latou.

¹³ Kae na leaise kapu loa e fanau a Iselaele le kau Kesuli ti mo le kau Maaka, ala na nonofo loa i loto malie o Iselaele o kaku mai ki le aso nei.

¹⁴ Ko le faasiga o Levi toka tasi na leaise soli ki ai se tofiga e Moisese ; ko sakilifisio tutu e le afi i mua o le Eteleno, le Atua o Iselaele, ko lena lona tofiga, o mulimuli ki le nea leia na fakasa kiate ia.

¹⁵ Na soli loa e Moisese ki le faasiga o Lupeni se vaega o mulimuli ki olatou famili.

¹⁶ Na lotou fakakoiga i le fetuu saute e le kolo ko Aloele i le Alenone ti mo le kolo leia e tuu i loto malie o le vaivailiua, mo le fenua katoa o Metepa,

¹⁷ mo Eseponi ti mo ona kolo fuli i le laumalie : Tiponi, mo Pamoti-Paale, mo Pete-Paale-Meoni,

¹⁸ mo Saatesa, mo Ketemoti, mo Mefaati,

¹⁹ mo Kiliataimi, mo Sipima, mo Seleti-Asaali i le mauga o le vaivailiua,

²⁰ mo Pete-Peoli, i le ifo ki Pisika, mo Pete-Asekimoti ;

²¹ mo kolo fuli o le fenua loto, ti mo le puleaga katoa o Sioni, sau o le kau Amole, leia na sau i Eseponi : na tamate a ia e Moisese, a ia mo sau o Matiane, ko Evi, mo Lekeme, mo Tesule, mo Uli, ti mo Lepa, ko sau ana na fakalogo kia Sioni ti na nonofo i le fenua.

²² Ia latou ala na tamate e fanau a Iselaele ki le seleta, na kau i ai le polofeta ko Palaami, vosa o Peoli.

²³ Ko le koiga o le kau Lupeni ko le Solotane mo lona kauvai, i le fetuu uesite. Ko lena le tofiga o vosa o Lupeni o mulimuli ki olatou famili ; a kolo lalasi mo kolo liliki.

²⁴ Na soli loa e Moisese ki le faasiga o Kate, ki vosa o Kate, se vaega o mulimuli ki olatou famili.

²⁵ Na lotou maua loa Saesele, mo kolo fuli o Kalaate, mo le vaelua o le fenua o le kau Amone o kaku ki Aloele, i mua o Lapa,

²⁶ mei Eseponi ki Lamati-Misipe mo Petonimi, mei Maanaimi o kaku ki le koiga o Tepile,

²⁷ ti, i le vaivailiua o le Solotane, mo Pete-Nimila, mo Sukoti, mo Tesafoni, ko le toe o le puleaga o Sioni, leia na sau i Eseponi, mo le Solotane, leia na tuu ko le koiga o kaku ki le vai ko Senesaleti, i le potu esite.

²⁸ Ko lena le tofiga o vosa o Kalaate, o mulimuli ki olatou famili ; a kolo lalasi mo olatou kolo liliki.

²⁹ Na soli loa e Moisese ki le vaelua o le faasiga o Manase, ki vosa o Manase, se vaega o mulimuli ki olatou famili.

³⁰ Na lotou maua loa, o kamata atu i Maanaimi, le Pasani katoa, mo kolo fuli o Saili i Pasani, kolo e kau ono ;

³¹ mo le vaelua o Kalaate, mo Asetaloti mo Etelei, kolo o le puleaga o Oki i Pasani, ala na soli loa ki vosa o Makile, vosa o Manase, ki le vaelua o vosa o Makile, o mulimuli ki olatou famili.

³² Ko na a vaega ala na fai loa e Moisese i le temi na nofo ai i le toafa o Moape, i leia fetuu o le Solotane, i mua o Seliko, i le esite.

³³ Na leaise soli loa e ia se tofiga ki le faasiga o Levi ; ko le Eteleno, ko le Atua o Iselaele, ko lena lona tofiga, ofai ki lana fakasa kiate ia.