Sosue 10 - Tosi Tapu

Malo lasi i tafa o Kapaone

¹ Na logo loa Atoni-Seteki, sau o Selusalemi, kua maua e Sosue a Ai ti kua maumaui e ia le kolo katoa, ti kua fai e ia ki Ai mo lona sau le nea leia na fai e ia ki Seliko mo lona sau. Na toe logo foki a ia kua fai e le kau Kapaone se sai mo fanau a Iselaele ti kua lotou nonofo i loto malie o Iselaele.

² Ti na i lasi ai a ia, talie ko se kolo lasi a Kapaone, na fai a ia pe se kolo sau, o lasi ake foki i le kolo ko Ai, ti na toa ona tagata fuli.

³ Koia na kakau loa e Atoni-Seteki, sau o Selusalemi, ni tagata ke fakasa kia Soami, sau o Epelone, mo Pileame, sau o Salamuti, mo Safia, sau o Lakisi, ti mo Tepile, sau o Ekeloni :

⁴ Ke kotou pale mai kiate au, ke tou tautea Kapaone, talie kua fai e ia le tokamalie mo Sosue ti mo fanau a Iselaele.

⁵ Koia na fakatasi ai loa a sau e lima o le kau Amole, le sau o Selusalemi, mo le sau o Epelone, mo le sau o Salamuti, mo le sau o Lakisi, ti mo le sau o Ekeloni. Na lotou fakatasi loa ti na lotou pale loa mo alatou kau tau ; na lotou ano loa o fakatuu lolatou nofolaga tau i mua o Kapaone, ti na lotou taui loa a ia.

⁶ Na kakau loa e le kakai o Kapaone ke fakasa kia Sosue, i le nofolaga o Kilikale : Ke aua na ke tiaki au tagata fakasausau, kae ke ke pale fakavilivili mai kia matou, ke ke saofaki matou, ti ke ke tokoi mai kia matou ; talie kua kau fakatasi mai kia matou a sau fuli o le kau Amole, ala e nonofo i le mauga.

⁷ Na pale loa Sosue i Kilikale mo lana kau tau ti mo ana tagata toa fuli.

⁸ Na pati loa le Eteleno kia Sosue : Ke aua na ke i kia latou, talie e kau tuku loa latou ki ou lima, ti e leaise toe tuu loa se toka tasi o latou i ou mua.

⁹ Na kaku fakapunamauli loa Sosue kia latou, i le oki o lana saele i le po katoa mei Kilikale.

¹⁰ Na veuki loa latou e le Eteleno i mua o fanau a Iselaele ; ti na tamate loa e Iselaele le kau Amole o lava veli ai i mua o Kapaone, ti na tuli loa e ia latou i le ala leia e pale ki Pete-Oloni, ti na tamate loa e ia latou o kaku ki Aseka mo Maketa.

¹¹ I le temi na lotou sosola ai i mua o fanau a Iselaele, ti na lotou ifo ai ki Pete-Oloni, na fakato loa e le Eteleno mei le lagi se ua fatu fualalasi kia latou o kaku ki Aseka, ti na lotou mamate ai loa. Na lasi ake latou ala na mamate i le ua fatu ia latou ala na tamate ki le seleta e fanau a Iselaele.

¹² Ti na masau loa Sosue ki le Eteleno, i le aso leia na tuku ai loa e le Eteleno le kau Amole ki fanau a Iselaele, ti na pati loa a ia i mua o Iselaele : Laa, ke ke tuu mau i aluga o Kapaone ! Ti mo koe, Masina, ke ke talitali i aluga o le vaivailiua o Asaloni !

¹³ Ti na tuu mau loa le laa, ti na talitali loa le masina, O kaku ki le oki o le totogi o fanau a Iselaele ki ona fili. Pe leaise tosi le nea lena i le tosi o le tagata faitotonu ? Na tuu mau loa le laa i lotomalie o le lagi, Ti na leaise fakatavili loa a ia o ifo ki le toaga o le laa i se aso katoa.

¹⁴ Na leaise toe soko loa se aso o tatau mo le aso lena, i mua atu mo muli mai, leia na fakalogo ai loa le Eteleno ki le leo o se tagata ; talie na tau loa le Eteleno o tupu ko Iselaele.

¹⁵ Ti na toe liliu loa Sosue mo fanau fuli a Iselaele ki le nofolaga i Kilikale.

¹⁶ Na sosola loa a sau e toka lima o le kau Amole o mumuni i le ana o Maketa.

¹⁷ Ti na fakasa loa le nea lena kia Sosue, o pati : ko leinei e mumuni a sau e toka lima o le kau Amole i le ana o Maketa.

¹⁸ Na pati loa Sosue : Ke kotou tekai loa ni fatu lalasi ki le uluaga o le ana, ti ke kotou fakatuu loa i ai ni tagata ke leo ia latou.

¹⁹ Kae ko koutou, ke aua na kotou toe tuu, ke kotou soko atu le tuli o okoutou fili, ti ke kotou tuuti le siku o le fili. Ke aua na kotou tuku latou ke ulu ki olatou kolo, talie kua tuku atu latou e le Eteleno, lokoutou Atua, ki okoutou lima.

²⁰ I le oki o le tuku e Sosue mo fanau a Iselaele se lava lasi kia latou, ti mo lalatou tamate latou o veli ai, ko latou ala na feala loa ke sao na sosola loa ki kolo tau,

²¹ ti na toe liliu loa le kakai katoa kia Sosue i Maketa i le fimalie. Na leaise toa fua se tasi o le fenua o masau veli ki fanau a Iselaele.

²² Ti na pati loa Sosue : Kotou fakamavaa le uluaga o le ana ti kotou fakaulu ake ki fafo a sau e lima o le kau Amole, ti kotou aumai latou kiate au.

²³ Na lotou fai ki ai, ti na lotou ave loa kiate ia a sau e lima ala na lotou fakaulu ake ki fafo mei le ana, le sau o Selusalemi, mo le sau o Epelone, mo le sau o Salamuti, mo le sau o Lakisi, ti mo le sau o Ekeloni.

²⁴ I le kaku ake o sau ana ki mua o Sosue, na fakatotonu loa e Sosue ke fakatasi ake kiate ia a tagata fuli o Iselaele, ti na pati loa a ia ki pule o le kau tau ala na ano mo ia ki le tau : Kotou fakafeofi mai, ti kotou teki okoutou vae ki ua o sau anei. Na lotou fakafeofi ake loa, ti na lotou teki loa olatou vae ki ua o sau.

²⁵ Na pati loa Sosue : Ke aua na kotou i, ti ke aua na kotou tuania, kae ke kotou fakaloto makeke ti ke kotou fia tagata, talie e feneeki loa le fai e le Eteleno ki okoutou fili fuli ala ka kotou taui ia loa.

²⁶ I le oki le nea lena, na taai loa latou e Sosue, o lotou mamate ai loa ; na tautau loa e ia latou ki ni laakau e lima, ti na lotou tautau loa i ai o kaku ki le afiafi.

²⁷ I le vilo o le laa, na fakatotonu loa e Sosue ke tatala a tino mei laakau, ti na ti loa latou ki le ana leia na lotou mumuni ai, ti na tapono loa le uluaga o le ana ki ni fatu lalasi, ala koi tuku ai o kaku mai ki le aso nei.

²⁸ Na too loa e Sosue a Maketa i le aso lena, ti na tamate loa e ia ki le mata o le seleta le kakai o le kolo mo lona sau ; na maumaui loa e ia le kolo mo kakai fuli na nofo i ai. Na leaise toe sao loa se fa toka tasi, ti na fai loa e ia ki le sau o Maketa le nea leia na fai e ia ki le sau o Seliko.

Malo i le potu saute

²⁹ Na mavae loa Sosue mo fanau fuli o Iselaele i Maketa, o ano ki Lipina o taui a ia.

³⁰ Na toe tuku loa e le Eteleno a Lipina mo lona sau ki lima o fanau a Iselaele. Ti na lotou taai a ia ki le mata o le seleta ti mo le kakai fuli na nofo i ai. Na leaise lotou tuku ke sao se fa toka tasi, ti na lotou fai loa ki lona sau le nea leia na lotou fai ki le sau o Seliko.

³¹ Na mavae loa Sosue mo fanau fuli o Iselaele i Lipina o ano ki Lakisi : Na lotou fakatuu loa lolatou nofolaga i mua o le kolo, ti na lotou taui loa a ia.

³² Na tuku loa e le Eteleno a Lakisi ki lima o fanau a Iselaele. Ti na lotou too loa a ia i le lua o aso, ti na lotou taai loa ki le mata o le seleta le kakai fuli na nofo i ai, o leaise toe sao se fa toka tasi, ofaipe le nea na lotou fai ki Lipina.

³³ Na pale loa Olami, sau o Kesele, o tokoi kia Lakisi. Kae na tamate a ia mo lona kakai, o leaise toe sao se fa toka tasi.

³⁴ Na mavae loa Sosue mo fanau a Iselaele i Lakisi o ano ki Ekeloni. Na lotou fakatuu loa lolatou nofolaga i mua o le kolo ti na lotou taui loa a ia.

³⁵ Ti na lotou too loa a ia i le aso e tasi, ti na lotou taai loa ki le mata o le seleta le kakai fuli na nofo i le kolo. Na fai loa e Sosue ki Ekeloni le nea leia na fai e ia kia Lakisi.

³⁶ Na mavae loa Sosue mo fanau fuli o Iselaele i Ekeloni o ano ki Epelone, ti na lotou taui loa a ia.

³⁷ Ti na lotou too loa a ia, ti na lotou taai loa ki le mata o le seleta le kolo, mo lona sau, mo kolo fuli na fakalogo ki ai ti mo kakai fuli na nofo i ai ofaipe le nea leia na fai e ia ki Ekeloni. Na maumaui loa e Sosue le kolo katoa, ti na tamate loa e ia le kakai fuli na nofo i ai, o leaise toe sao se fa toka tasi.

³⁸ Na maliu loa Sosue mo fanau fuli o Iselaele ki Tepile o taui a ia.

³⁹ Ti na lotou too loa le kolo mo lona sau, ti mo kolo ala na feofi ki ai. Na lotou tamate loa le kakai fuli, o leaise toe sao se fa toka tasi. Ti na fai loa e Sosue ki Tepile mo lona sau o tatau mo lana fai ki Epelone ti mo lana fai ki Lipina mo lona sau.

⁴⁰ Na taai loa e Sosue ki le mata o le seleta a sau o le fenua katoa : le fenua o mauga, le fenua o le toafa, le fenua taulalo ti mo le fenua o mauga liliki. Na leaise toe fakamauli loa e ia se fa toka tasi, kae na tamate loa e ia a nea fuli na mauli, o mulimuli ki le fakatotonu a le Eteleno, Atua o Iselaele.

⁴¹ Na taui loa e Sosue le fenua o kamata mei Katesi-Palenea mo Kasa, i le potu saute, o kaku ki le fenua o Koseni mo Kapaone, i le potu noleto.

⁴² Na malo loa Sosue i sau fuli ana, ti na too loa e ia olatou fenua i le tau e tasi, talie na tau le Eteleno, le Atua o Iselaele, o tupu ko Iselaele.

⁴³ Ti na toe liliu loa Sosue mo fanau fuli a Iselaele ki le nofolaga i Kilikale.