Sosue 1 - Tosi Tapu

Fetogi o Moisese e Sosue

¹ I le oki o le mate o Moisese, tagata fakasausau a le Eteleno, na pati loa le Eteleno kia Sosue, vosa o Nune, tagata fakasausau a Moisese :

² Kua mate laku tagata fakasausau ko Moisese. I le aso nei, tuu ki aluga o fakalaka i le Solotane leinei, a koe mo le kakai katoa leinei, o ulu ki le fenua leia e kau soli ki fanau a Iselaele.

³ Ko ganea fuli e tuu ki ai okoutou alofivae, e kau soli a ia kia koutou, ofaipe laku pati kia Moisese.

⁴ E kamata loa lokotou fenua mei le toafa, i le saute, o kaku ki mauga o Lipane, i le noleto, ti mei le vaitafe lasi ko le Eufalate, i le esite, o ano i le fenua katoa o le kau Eti, o kaku ki le tai lasi ko le Metitelanea, i le uesite.

⁵ E leaise tuu loa se tasi i ou mua, i le temi o lou mauli. E kau nofo loa mo koe, ofaipe laku nofo mo Moisese : E leaise kau tukunoa loa a koe, e leaise kau tiaki loa a koe.

⁶ Ke ke fakamakeke mo ke loto toa, talie ko koe leia e ave ia loa le kakai leinei ki le fenua leia na kau fakapapau ki olatou tamana ke soli kia latou.

⁷ Ko leia fua ke ke fakamakeke, mo ke loto toa lasi, o agatonu ki le lao katoa leia na kau tuku kia Moisese, laku tagata fakasausau : Ke aua na ke maliu ki le fetuu atamai pe ko le fetuu sema, o tupu ke ke manuia i ganea fuli e ke ano loa ki ai.

⁸ Ke aua na mamao loa mei lou gutu le tosi leinei o le lao ; kae ke ke metitasio a ia i le ao mo le pouli, o tupu ke ke agatonu ki nea fuli e tuu i ai ; talie koia e ke manuia ai loa i ou ala, koia e ke poto ai loa.

⁹ Pe na leaise kau tuku atu kiate koe le fakatotonu leinei : Ke ke fakamakeke mo ke loto toa ? Ke aua na ke i, ti ke aua na ke loto gaegae, talie ko le Eteleno, lou Atua, e nofo mo koe i ganea fuli ala e ke ano loa ki ai.

¹⁰ Na tuku loa e Sosue le fakatotonu leinei ki le kau ofisa o le kakai :

¹¹ Ke kotou folii le nofolaga, ti ko leinei le nea ke kotou fakatotonu loa ki le kakai : Ke kotou teuteu loa ni nea kai, talie ka oki loa a aso e tolu, e kotou fakalaka loa i le Solotane leinei, o ano o too le fenua leia na soli atu kia koutou e le Eteleno, lokoutou Atua.

¹² Na pati loa Sosue ki le kau Lupeni, mo le kau Kate ti mo le vaelua o le kau Manase :

¹³ Ke kotou manatui le nea leia na fakatotonu atu kia koutou e Moisese, tagata fakasausau a le Eteleno i le aso leia na pati ai : kua soli atu e le Eteleno, lokoutou Atua, kia koutou le malolo ; kua soli atu e ia kia koutou le fenua leinei.

¹⁴ E nonofo loa okoutou fafine, mo okoutou fanau liliki ti mo okoutou kau manu i le fenua leinei na tuku atu kia koutou e Moisese i le fetuu leinei o le Solotane. Kae ko koutou fuli, ala ko tagata tau loto toa, ke kotou fakalaka loa mo akoutou masafu i mua okoutou fetaina, ti ke kotou tokoi loa kia latou,

¹⁵ o kaku ki le temi e tuku ai loa e le Eteleno le malolo ki okoutou fetaina ofaipe koutou, ti ke lotou maua foki le fenua leia e soli loa kia latou e le Eteleno, lokoutou Atua. Kao oki loa a ia, ti o kotou liliu mai loa o nofo i le fenua leia na tuku atu kia koutou e Moisese, tagata fakasausau a le Eteleno, i le fetuu leinei o le Solotane, i le sopoaga o le laa.

¹⁶ Na lotou tali loa kia Sosue, o pati : E motou fai loa a nea fuli ala na ke tuku mai kia matou, ti e motou ano loa ki ganea fuli ala e ke kakau loa matou ki ai.

¹⁷ E motou fakalogo atu loa kiate koe i nea fuli, ofaipe lamatou fakalogo kia Moisese. Ko leia fua ke nofo mo koe le Eteleno, lou Atua, ofaipe lana nofo mo Moisese !

¹⁸ E tautea loa ki le mate a tagata fuli e fakatutuu loa ki lau lagiaki, ti e leaise fakalogo loa ki nea fuli e ke fakatotonu loa ki ai. Ko leia fua ke ke fakamakeke, ti mo ke loto toa !