Sopo 9 - Tosi Tapu

Fakamaoki o Sopo ki le agasala o le tagata

¹ Na masau loa a Sopo, o pati :

² E kau iloa malie e fenaaki ; Kae feaki loa le faitotonu a le tagata i mua o le Atua ?

³ Kapau e fakataupati a ia mo le Atua I ni nea e afe, e leaise feala ke tonu a ia i se nea fua e tasi.

⁴ A ana le poto mo le mafimafi : Ko ai leia e fakatutuu kiate ia kae leaise tautea a ia ?

⁵ E fokifa fai e amo e ia a mauga lalasi, E soloi e ia latou i lona ita.

⁶ E lui e ia le kele i lona fakatafito, ti e galulu ona pou.

⁷ E lagiaki a ia ki le laa, ti e leaise toe sopo a ia, Ti e tapono e ia ki le kalavi a fetuu o le lagi.

⁸ Ko ia toka tasi leia na folasi ia le lagi, Ti e saele a ia i aluga o galu o le tai.

⁹ Na fakatupu e ia le Uluso Lasi, mo le Olione ti mo le Peleiate, Ti mo fetuu o le potu saute.

¹⁰ E fai e ia ni nea lalasi ala e leaise mafai ke matala ki ai, Ti mo ni gaoi fakaofolele ala e leaise mafai ke lau.

¹¹ Ko leinei, e fakalaka a ia i oku tafa, kae e leaise kau tio kiate ia ; E ano a ia, kae e leaise kau iloa a ia.

¹² Kapau e too e ia, ko ai e fakafesagai loa kiate ia ? Ko ai e pati loa kiate ia : Kolea e ke fai ?

¹³ E leaise ma taofi le sausau o le Atua. E mapelu ki lalo i ona vae a fanakiaga o le kau fia nealasi

¹⁴ Ti ko au, e kau tali feaki loa kiate ia ? Koa masau e kau filifili loa ?

¹⁵ Pe kau agatonu loa, kae e leaise kau tali loa ; kae e kau kolekole ki loku tui fakamaau.

¹⁶ Ti e tali loa e ia laku kole, mo kapau e kau tagi kiate ia, E leaise kau tui loa kua fakalogo a ia ki loku leo,

¹⁷ A ia leia na takatakai ia au ofaipe se afa, Ti na fakalasi ia oku lavea kae leai sona tupuaga,

¹⁸ Leia e leaise tuku ia ke fakatau laku manava, Kae e fakaapele ia loku loto ki le mamae.

¹⁹ Kapau e kau afa le makeke kiate ia, ko leinei, e mafimafi a ia ! Kapau e kau ano ki le fakamaau, ko ai e ave ia loa au ?

²⁰ Kapau e kau agatonu, kae fakalakasala loa au e loku gutu totonu ; kapau e kau saosaoa, kae e fakamaoki loa a ia ki loku fakalakasala.

Fakalakasala o le Atua e Sopo

²¹ E kau saosaoa ! Io, e kau saosaoa, kae e leaise kau pipiki ki le mauli, E kau vesia ki loku mauli.

²² E tatau fai kiate au ? Koia e kau toa ai, o pati : E maumaui fakatatau e le Atua leia e saosaoa mo leia e agasala.

²³ Ka na vilo fakapunamauli le malaia o tamate leia e saosaoa ke mate !… Kae e kata le Atua ki mamae o le tagata saosaoa !

²⁴ Ka vilo se fenua ki lima o se tagata tukipo, E tapono e le Atua a mata o le kau tui fakamaau. Ti kapau e leaise ko ia, ti ko ai loa ?

²⁵ Kua gasolo ake oku aso i se tagata ave tosi, Kua lotou sosola, kae e leaise lotou tio ki se fiafia ;

²⁶ Kua lotou ano ofaipe ni vaka kofe, Ofaipe le akuila leia e oso ki lana nea kai.

²⁷ Kapau e kau pati : E tonu ke galoi oku mamae, Ke tiaki loku mafaia, kae kau mata katakata.

²⁸ Kae kau tuania oku mamae fuli. E kau iloa e leaise ke fakamaoki loa ki loku saosaoa.

²⁹ Kua fakalakasala au e ia ; Kolea le uiga o le afa ke fakamaoki ki loku saosaoa ?

³⁰ Talie kapau e kau maanu loa i le nive, Ti kapau e kau fakamea loa oku lima ki se topa,

³¹ E ke fakauku loa au ki le pela, Ti e kau fakalialia loa ki oku teu.

³² E leaise ko se tagata a ia ofaipe au, ke kau tali kiate ia, Ti ke ma ano fakatasi ki le fakamaauaga.

³³ E leaise se tagata fakatokatoka i oma vasaa, Ke teki lona lima kia maua toka lua.

³⁴ Koia ke too e ia lana laakau iate au, Ti ke aua na toe fakaii kiate au ana nea fakaii ;

³⁵ Ti e kau masau loa, ti e leaise kau toe i loa kiate ia. Kae e leaise ko nea lena e soko nei kiate au.