Sopo 8 - Tosi Tapu

Fakamaoki a Pilitate ki le tautea o le tagata agaveli

¹ Na masau loa Pilitate mei Suake, o pati :

² E kaku loa kiafea lau masau fenaaki, Ti mo le tatau o masau o lou gutu mo se matagi makeke ?

³ Pe fulusi loa e le Atua le lao ? Pe fulusi loa e le Mafimafi le faitotonu ?

⁴ Kapau na agasala ou vosa ki le Atua, Ti kua tuku e ia latou ki lalatou agasala ?

⁵ Kae ko koe, kapau e ke afa le agai o le Atua, Kapau e ke fai lau kole ki le Mafimafi,

⁶ Kapau e ke mea mo agatonu, Ti e leaise tuvai loa lana tokaga kiate koe, Ti e toe liufaki loa e ia kiate koe le fiafia i lou nofoaga mea.

⁷ E fai loa lou mauli uluaki pe se nea noa i lou mauli foou. E lasi ake loa lou manuia foou i lou manuia afea.

⁸ Afa kia latou o tautupu mua, Tio ki mauli o olatou tamana.

⁹ Talie na tou tupu fua nanafi, e leaise tou iloa fua se nea, Ti e tatau otou aso i le malama nei mo se ga malu.

¹⁰ E lotou ako atu loa kiate koe, e lotou masau atu loa kiate koe, Ti e lotou too loa mei lolatou loto a masau anei :

¹¹ Pe feala ke tupu le kofe i se ganea leia e leaise maua ai se vai ? Pe feala ke tupu le u i se ganea leia e leaise susu ?

¹² Koi se a ia, ti na leaise tuuti a ia, kae ka sala vai, Ti e uluaki malo a ia i la ake mouku fuli.

¹³ Ko lena le nea leia e soko kia latou fuli ala e galoi ia le Atua ; E puli loa lena le amanaki malie a le tagata agaveli.

¹⁴ Kua motusi lona fanakiaga, Ti ko lona tokoi ko se pikiaga o le kaleveleve.

¹⁵ E fafanaki a ia ki lona fale, ti e matule a ia ; E tapiki a ia ki ai, kae e leaise se tuu a ia.

¹⁶ E tatau a ia mo se laakau sesega malie i le laa, Leia e fakamafola ona laa i aluga o le oloto,

¹⁷ Ti e fakaogo e ia ona aka o kaku ki le fatu, Ti e ano a ia ki loto o le utu.

¹⁸ Kae kapau e taaki loa a ia mei le ganea leia na tuu ai, Ti e pati loa le ganea lena : Na leaise kau iloa a koe !

¹⁹ Ko lena le ikuaga malie o kakai ana ! Ti e toe sosomo ake loa ni iki ake laakau i ona muli i le kele lena.

²⁰ Leai, e leaise tiaki e le Atua le tagata agatonu, Ti e leaise puipui e ia le tagata agasala.

²¹ E fakaapele loa e ia lou gutu ki ni kata fiafia, Ti mo ou laugutu ki ni kalaga fakafiafia.

²² Kae ko latou ala e vesia kiate koe e apele loa i le luma ; E puli loa le falela o le kau agasala.