Sopo 7 - Tosi Tapu

Mamae mo le fakafesagai o Sopo

¹ E fai le mauli o le tagata i le malama nei pe leia o se tagata solia, Ti e tatau ona aso mo la o se tagata solia gaoi totogi.

² Ofaipe le fakaamu a le tagata popula ki le malumalu, Ofaipe le talitali a le tagata gaoi ki lona totogi,

³ Ko lena foki loku mauli : ko ni masina i le tuania, Ko lena loku vaega : ko ni pouli i le mamae.

⁴ Ka kau moe, e kau pati : Ko afea e kau ala ai loa ? Ko afea e oki ai loa le pouli ? Kua kau makona i le taugaoi o kaku ki le mafoata.

⁵ Kua kofu loku tino e ilo ti kua pakupakua katoa a ia ; Kua mafaafaa a ia ti kua apele a ia i ni papala fakalialia.

⁶ Kua gasolo ake oku aso i le taula a le tagata lalaga kie, Ti kua lotou kaku ki le gatoaga, e leaise koi maua se amanaki malie !

⁷ Ei Atua, manatui ko loku mauli ko se ga matagi noa ! E leaise toe tio loa oku mata ki le fiafia.

⁸ Ko le mata leia e tio mai kiate au e leaise toe tio loa kiate au ; E afa loa au e lou mata, kae kua kau puli loa.

⁹ Ofaipe se ao leia e mavetevete o puli, E leaise toe pale ake loa leia e ifo ki le nofoaga o le kau mate ;

¹⁰ E leaise toe liliu mai loa a ia ki lona fale, Ti e leaise toe iloa loa a ia e le ganea leia na nofo ai.

¹¹ Koia e leaise kau toe tapono loa loku gutu, E kau masau loa i le lasi o le mamae o loku loto, E kau tagi loa i le lasi o le kona o loku laumalie.

¹² Pe ko se tai au, pe ko se tafolaa au, Ke ke fakanofo ai se kau leoleo kiate au ?

¹³ Ka kau pati : E kau moe loa ki loku moeaga, Ke kau maua ai se ga fimalie pe ko se ga siasiaa o oku mamae,

¹⁴ E ke fakaii au ki ni moe miti, E ke fakatio au ki ni nea fakaii.

¹⁵ Oiau, e kau loto ke kukumi loku ua ! E malie ake kiate au le mate i ivi anei.

¹⁶ E kau fakalialia kia latou !… E leaise kau mauli loa o lee gato !… Tuku noa au, talie ko loku mauli ko se ga matagi noa.

¹⁷ Kolea le tagata, ke ke fakamauiga a ia, ke ke tokaga kiate ia,

¹⁸ Ke ke fakatele kiate ia i usu fuli, Ti ke ke asiasi kiate ia i lakaga fuli ?

¹⁹ E gato loa afea lau tio mai kiate au ? Ko afea e ke tuku ai loa ke kau folo mua loku savale ?

²⁰ Kapau kua kau agasala, ti kolea leia na kau fai kiate koe, tagata leoleo o tagata ? Kolea e ke fakatusitusi ai kiate au au gasau ? Kolea kua kau liliu ai ko se kavega kiate koe ?

²¹ Kolea e leaise ke fakamolemole ai laku agasala, Ti e leaise ke fakamolemole ai laku agaveli ? Talie ka kau moe loa ki le kele ; E ke afa loa au, kae e kau puli loa.