Sopo 6 - Tosi Tapu

Mamae o Sopo

¹ Na masau loa a Sopo, o pati :

² Oi, kanapau e feala ke fuafua le mamafa o loku mamae, Ti kanapau e mafai ke teki oku malaia ki aluga o se fua,

³ E lotou mamafa ake loa i le one fuli o le tai ; Koia leia kua foliga ai aku masau ki le valea !

⁴ Talie kua kau pupu i gasau a le Mafimafi, Ti e inu e loku laumalie lona kona ; Kua tuu mai kiate au a nea fakaii fuli a le Atua.

⁵ Pe tagi le asino vao mo ka kai e ia se mutie foou ? Pe tagi le pipi tagata mo ka tuku kiate ia lana nea kai ?

⁶ Pe mafai ke kai le nea leia e kano veli ti e sala patai ? Pe kano malie le tea o le fuai moa ?

⁷ Ko le nea leia e kau loto ke aua na kau fafa ki ai, Ko lena laku nea kai, logo ai pe fakalialia a ia !

⁸ Ke soko laku kole, Ti ke alofa le Atua o tuku mai le nea leia e kau amanaki malie ki ai !

⁹ Io, ke malie ki le Atua lana tamate au, Ke falo lona lima o fakapuli au !

¹⁰ Talie e toe loa kiate au se fimalie e tasi, Se fiafia i loto malie o malaia ala e tuku e ia kiate au : Na leaise kau maumaui fua i se aso a fakatotonu a le Maokioki.

¹¹ Kolea le uiga o laku amanaki malie, kae kua oki katoa loku makeke ? Kolea le uiga o laku talitali, kae kua gato loku mauli ?

¹² Pe tatau loku makeke mo leia o le fatu ? Pe tatau loku tino mo le sila ?

¹³ Pe koi maua soku makeke ? Pe leaise kua mamao iate au le fakamauli ?

Fakasa e Sopo kua puli le alofa i ona kaukaunea

¹⁴ E tonu ke maua e leia e mamae le alofa o lona kaukaunea, Tatau aifai mo ka kua tiaki e ia le i ki le Mafimafi.

¹⁵ Kua fai kaka oku kaukaunea kiate au ofaipe se liua, Ofaipe se liua kua malo lona tafeaga.

¹⁶ I le oki o le temi momoko e ave e ia ni pela, mo ka liliu loa le aisi mo le nive o vai.

¹⁷ Kae ka au a aso vevela, e masa a ia, Ti ka au a afi o le laa, e malo lona tafeaga.

¹⁸ E maliu loa a kau fanoga i le fia inu ki lona tafeaga, Ti e lotou ulu loloto ki le toafa, o pupuli ai.

¹⁹ Na afa lasi e le kakai fanoga o Tema le vai, Kua apele le kau fanoga o Sepa i le amanaki malie ;

²⁰ Kae kua lotou fakasemala i lalatou fanaki ki le liua, Talie kua lotou luma i lalatou kaku ki ai.

²¹ Ko lokotou anoaga totonu lena ki lokoutou kaukaunea ! Kua kotou tio ki loku ti ki lalo, ti kua kotou fakalialia ki ai.

²² Pe na kau pati atu kia koutou : Kotou soli mai se nea kiate au, Kotou fai mai kiate au ni nea alofa i okoutou koloa,

²³ Kotou saofaki au mei le lima o le fili, Ti kotou totogi au mei le lima o le kau agaveli ?

²⁴ Kotou fakamalamai au ti e kau fakaleemu loa ; Kotou fakamatala mai pe kolea le nea leia kua kau agasala ai.

²⁵ E leaise lavea se tasi i ni masau maoki, Kae kolea le aoga o akoutou valoki ?

²⁶ Pe kotou fia valoki aku masau ? Pe kotou tio ki se matagi ata i masau a se tagata leia kua sala amanaki malie ?

²⁷ E kotou fakamamae se toe sala matua, E kotou fakaveliveli ki lokoutou kaukaunea.

²⁸ E kau kole atu kia koutou, kotou tio mai kiate au ! Pe kau loiloisi koutou ?

²⁹ Kotou toe liliu mai kiate au, kae tuku lakoutou faisala o uiga mo au ; Kotou toe liliu mai ti kotou fakamaoki ki loku mea.

³⁰ Pe i ai se agaveli i loku alelo ? Pe leaise iloa malie e loku gutu le nea e veli ?