Sopo 5 - Tosi Tapu

Fakamakeke o Sopo e Elifasi ke tali lona tautea

¹ Kalaga i le aso nei ! Ko ai loa leia ka tali mai kiate koe ? Ti ko ai o le kau agatonu leia e ke kalaga loa ki ai ?

² E tamate le tagata lee fakakaukau e lona ita, Ti e mate le tagata valea i le veli o lona ita.

³ Na kau tio ki le tauaka a le vale ; Kae fokifa kua tuku lona nofoaga ki le malaia :

⁴ Ke aua na toe maua e ona vosa se ulufaga, Ke fakatua latou e le fakamaau, ti ke aua na saofaki latou e se tasi !

⁵ Ke kai lana taukai e le kau pakupaku, Ke lotou ano o too a ia o kaku ki vao talatala, Ti ke too ona koloa e ni kakai manumanu koloa.

⁶ Talie e leaise somo ake le agasala mei le efu, Ti e leaise tupu ake le malaia mei le kele ;

⁷ Kae na fakatupu le tagata ke mamae, Ofaipe kalosii afi ke mafitifiti.

⁸ Kana ko au ko koe, e kau masau loa ki le Atua, Ti ko ia totonu loa leia e kau fakasa loa ki ai loku anoaga.

⁹ E fai e ia ni nea lalasi, ala e leaise feala ke matala ki ai, Ti e leaise feala ke lau ana nea fakaofolele ;

¹⁰ Ko ia leia e fakato ia a ua ke fakavai ai le kele, E tuku e ia mei le lagi le vai ke fakavai ai a faisaga.

¹¹ E siki e ia ki aluga latou ala e loto fakataulalo, Ti e fakafiafia e ia latou ala e mamae ;

¹² E motusi e ia a fakatuutuu a le kau kaka, Ti e fatifatii e ia alotou fakatuutuu i olatou lima ;

¹³ E maselei e ia le kau poto ki lalatou fia poto, Ti e fulusi e ia a fakatuutuu a tagata pikopiko :

¹⁴ E lotou felavei mo le fakapouli ka koi ao, Ti e lotou saele taufa i le lalatea ofaipe le pouli.

¹⁵ Kae e taupau e le Atua leia e gaegae mei le seleta o olatou gutu, Ti e saofaki e ia le mativa mei le lima o le kau makeke ;

¹⁶ Koia e toe tuku e ia le amanaki malie ki le kau mativa, Kae e tapono e ia le gutu o le kau agaveli.

¹⁷ Manuia le tagata leia e tautea e le Atua ! Aua na ke fakanoai le tautea mei le Mafimafi.

¹⁸ E fai e ia le mamae, kae toe fakamauli foki e ia ; E fai e ia le lavea, kae toe faitoo a ia e lona lima.

¹⁹ E fakamauli loa e ia a koe i le mamae o tua ono, Ti e leaise lave loa le veli kiate koe o tua fitu.

²⁰ E saofaki loa e ia a koe mei le mate i le temi o le oge, Ti mo lou mauli mei le makeke o le seleta i le tau.

²¹ E fufu loa e ia a koe mei le malaia o le alelo veli, Ti ka au le maumau e leaise ke i loa.

²² E ke kata loa ki le maumau mo le oge, Ti e leaise ke toe tuania loa a manu fekai o le kele ;

²³ Talie e ke kaukaunea loa mo fatu o faisaga, Ti e ke tokamalie loa mo manu o le kele.

²⁴ E ke maua loa le fiafia i lou falela, Ti e ke toe maua katoa loa au kau manu fuli.

²⁵ E ke tio loa ki le api o lou sakoga, Ti e fai loa a uli o lou sakoga pe le mutie i faisaga.

²⁶ E ke ulu loa ki le tanuma i le matua malie, ofaipe le ave o le fuiga fulumeto i lona temi totonu.

²⁷ Ko lena le nea leia kua motou fakamaoki ki ai, Ko lena le nea leia e soko ; A au le logo ki ai mo lona fakaaoga.