Sopo 42 - Tosi Tapu

Fakasemala o Sopo mo lona fakataulalo

¹ Na tali loa a Sopo ki le Eteleno, o pati :

² E kau fakamaoki e ke mafai a nea fuli, Ti e leaise fakafesagai se nea ki au manatu.

³ Ko ai leia e valea o fakaliliu aku fakatuutuu ke fakapouli ? Io, na kau masau, kae na leaise kau matala kia latou, Ki ni nea lalasi ala e fakalaka iate au ti e leaise kau iloa,

⁴ Fakalogo mai kiate au, ti e kau masau loa ; E kau fakavesili loa a koe, ti e ke ako mai loa kiate au,

⁵ Na logo loku taliga ki masau kiate koe ; Kae i le lakaga nei, kua tio oku mata kiate koe.

⁶ Koia kua kau iloa ai laku sala, ti kua kau fakasemala ai, O tonatona ki le efu mo le mugalafu.

Le toe maua e Sopo o lona malolo mo ona koloa

⁷ I le oki o le folafola a le Eteleno kia Sopo, na pati loa a ia kia Elifasi mei Temane : Kua vilo loku sausau kiate koe mo ou kaukaunea e toka lua, talie na leaise kotou masau kiate au i le maoki ofaipe laku tagata fakasausau ko Sopo.

⁸ Kotou too i le lakaga nei ni pipi tagata e fitu mo ni akeno tagata e fitu, ti kotou ano ki laku tagata fakasausau ko Sopo, ti kotou momoli se failaulau o tupu ko koutou. E faikole loa laku tagata fakasausau ko Sopo o uiga mo koutou, ti ko loku alofa kia Sopo toka tasi leia e leaise kau tautea ai loa koutou o mulimuli ki lokoutou valelea ; talie na leaise kotou masau kiate au i le maoki, ofaipe laku tagata fakasausau ko Sopo.

⁹ Na ano loa a Elifasi mei Temane, mo Pilitate mei Suake, ti mo Tesofa mei Naama, ti na lotou fai loa le nea leia na pati ki ai le Eteleno ; ti na tali loa e le Eteleno le kole a Sopo.

¹⁰ Na toe fakanofo loa e le Eteleno a Sopo ki lona mauli i mua, i le oki o lana faikole ki ona kaukaunea ; ti na toe soli loa e le Eteleno kia Sopo a nea fuli ala na maua e ia i mua o liuga lua.

¹¹ Na au loa a fetaina, mo tuagaane, ti mo kaukaunea mago o Sopo o fakatele mai kiate ia, ti na lotou kakai fakatasi loa mo ia i lona fale. Na lotou aloalofa loa kiate ia mo fakafimalie a ia i malaia fuli ala na teki e le Eteleno kiate ia, ti na lotou tasi soli loa kiate ia se potu aulo mo se mama aulo.

¹² I le lolotoga o fetuu fakaoki ana, na maua loa e Sopo mei le Eteleno ni tapuakina o lasi ake i tapuakina ala na maua e ia i mua. Na maua loa e ia se kau ovi fafine e kau agafulu tupu fa afe, mo se kau kamelo e afe ono, mo ni soa pipi tagata e afe, ti mo se kau asino fafine e afe.

¹³ Na toe maua foki e ia mo ni vosa e toka fitu mo ni taineliki e toka tolu :

¹⁴ Na fakaigoa loa e ia le uluaki ko Semima, le lua ko Ketesia, le tolu ko Kelene-Apuke.

¹⁵ Na leaise toe maua i le fenua katoa ni fafine fulumalilie o tatau mo taineliki o Sopo. Na soli loa e lolatou tamana kia latou ni olatou vaega i le tofiga o tatau mo olatou tuagaane.

¹⁶ Na mauli loa a Sopo i le oki o nea ana i fetuu e kau lelau kau fa, ti na tio loa a ia ki ona vosa mo ona makopuna o kaku ki le tautupu fa.

¹⁷ Ti na mate matua loa a Sopo, kua makona i fetuu.