Sopo 41 - Tosi Tapu

¹ Ko ai e ulu vale loa, o tapo le kolokotile ki se matau ; Ti ko ai loa e toe valea ake o fakatutuu mai kiate au ?

² Ko ai leia e kau tuu maua ki ai ? E kau totogi loa a ia. Ko nea fuli i le malama nei a aku.

³ E kau toe fia masau ki ona koga tino, Mo lona makeke, mo le fulumalie o lona fau.

⁴ Ko ai e sufegi ia loa lona kofu ? Ko ai e ulu loa ki ona kaugutu ?

⁵ Ko ai e fakamavaa ia loa a matapa o lona gutu ? E nofo le fakaii i le takatakai o ona nifo.

⁶ E pipiki fakatasi ona paletau fulumalilie mo makeke, o sakinake kua fakamaumau latou e se fa mama.

⁷ E lotou pipiki leia ki leia, Ti e leaise toe ulu le aele i olatou vasa.

⁸ E lotou faipe ni fetaina ala e fesogiaki, mo fekukumiaki, Ti mo nonofo e leaise toe mavete.

⁹ Ka mafatua a ia, e gigila le malama, Ti e fai ona mata pe laumata o le mafoata.

¹⁰ E mapusi ni ulai afi mei lona gutu Ti e mafitifiti mei ai ni masikai afi.

¹¹ E ulu se afu mei ona pogoiisu, Ofaipe se kulo vai leia kua pula, ofaipe se kulo kua kaka.

¹² E fakakaka e lana tukumanava a malala, Ti e ulu se afi mei lona gutu.

¹³ E nofo lona makeke i lona ua, Ti e sopo le lulu i ona mua.

¹⁴ E tuu fakatasi ona koga kanofi, Ti e gaegae lolatou lolomi e leaise se mafai se nea.

¹⁵ E fefeka lona mafu ofaipe le fatu, Ofaipe le fatu fakamaluu fulumeto ikiiki.

¹⁶ Ka mafuta a ia, e lulu le kau toa, Ti e lotou sosola i le lasi o lolatou i.

¹⁷ E laulaunoa lona taai ki le seleta ; Ti e leaise aoga le tao, mo le savelo, mo le kofu tau.

¹⁸ E tio a ia ki le ukamea ofaipe lana tio ki se ga penu, Ti e tio a ia ki le sila pe se laakau palavaia.

¹⁹ E leaise sola a ia i le gasau, Ti e fai a fatu o le makamaka kiate ia pe se mutie.

²⁰ E tio a ia ki le potu laakau ofaipe se ga mutie malo, Ti e kata a ia ki le logoa o gasau.

²¹ I lalo o lona manava e tuu ai ni tala matakakai mo sukisuki : E lotou faipe se nea fakamaluu kele leia e toso i le pela o le liua.

²² E fakapiau e ia le takele o le tai ofaipe se kulo vai vela kua pula, Ti e luui e ia a ia ofaipe se fagu kua apele i le kaloni.

²³ E tuku e ia i ona muli se ala malama ; E too e le loloto le lau ulu sina o se matua.

²⁴ I le malama nei e leaise pule se tasi kiate ia ; Na fakatupu a ia ke aua na i a ia ki se nea.

²⁵ E tio fianealasi a ia ki nea fuli e taualuga, Ko le sau a ia o manu fia tagata fuli.