Sopo 40 - Tosi Tapu

Le ipopotame mo le kolokotile

¹ Na tali loa le Eteleno kia Sopo mei loto malie o le afa, o pati :

² Toi lou kilii pipi ki ou vakavaka ofaipe se tagata toa ; E kau fakavesili loa a koe, ti e ke tali mai loa kiate au.

³ Pe ke loto ke fakapuli laku faitotonu ? Pe ke fakalakasala au o tupu ke fakatonuia a koe ?

⁴ Pe makeke lou lima ofaipe le lima o le Atua, Mo lou leo ofaipe lona leo ?

⁵ Ke ke kofu ki le fulumalie mo le mauiga, Io, ke ke kofu ki le gigila mo le kololia !

⁶ Ke ke liligi a galu o lou ita ; Ti ke ke tuku ki lalo le kau fia nealasi i sau fa tio e tasi !

⁷ I sau fa tio e tasi, ke ke peesi ki lalo latou ala e fia taualuga, Ti ke ke takatakafi le kau agaveli,

⁸ O fufu fakatasi fuli latou i le kele, Ti mo tapono olatou lae i le fakapouli !

⁹ Ti e kau fakavikiviki loa Ki le makeke o lou lima atamai.

¹⁰ Ko leinei le ipopotame, leia na kau soli ki ai le mauli ofaipe koe ! E kai e ia le mutie ofaipe le pipi.

¹¹ Ko leinei a ia ! E maua lona makeke i ona vakavaka, Ti e maua lona makeke i ua o lona manava ;

¹² E peluki e ia lona siku o makeke ofaipe le sete ; E feuluaki a ua o ona alaga.

¹³ E fai ona ivi pe ni pou sila, Ti e fai ona vae pe ni pou ukamea !

¹⁴ Ko le uluaki a ia o gaoiaga a le Atua ; Ko leia na fakatupu ia a ia, na soli ia kiate ia se seleta.

¹⁵ E maua e ia lana nea kai i mauga, I ganea ala e manonogi ai a manu fuli o le vao.

¹⁶ E moe a ia i lalo o lotusi sesega o le vai, I loto malie o u mo le pela ;

¹⁷ E uufi a ia e le lotusi ki ona lau, Ti e fakamalumalu a ia e sole o le liua.

¹⁸ Ka puke le vaitafe, e leaise sola a ia ; Ti ka tafe le Solotane o ulu ki lona gutu, e nofo fimalie fai a ia.

¹⁹ Ko ai leia e mafai ke tapo ia a ia mo ka alaala ona mata ! Pe tapo ia a ia ki se kupega ke puui ai lona isu ?

²⁰ Pe tapo le kolokotile ki le matau ? Pe nonoa lona alelo ki se maea ?

²¹ Pe mafai ke tui se potu laakau i ona pogoiisu ? Pe mafai ke fakaulu se ukamea i ona kaugutu ?

²² Pe kolekole atu loa a ia kiate koe ? Pe masau fakamaluu atu loa a ia kiate koe ?

²³ Pe fai loa e ia se sai mo koe Ke liliu ai a ia o popula tuumau kiate koe ?

²⁴ Pe ke manogi loa mo ia ofaipe lau manogi mo se manu lele ? Pe mafai loa ke ke sai a ia ke fakamanogi ai ou taineliki ?

²⁵ Pe feala ke faikoloa le kau faifeua ki ai ? Pe lotou vaevae a ia i le kau faikoloa ?

²⁶ Pe mafai ke ulu ni gasau i lona kili, Mo ni velo i lona ulu ?

²⁷ Fafa lou lima kiate ia, Ti e leaise ke toe fia osoi loa a ia.

²⁸ Ko leinei, e lasi le faisala kiate ia ; Kae i le tio fai kiate ia, e lasi le solomuli.