Sopo 39 - Tosi Tapu

Tokaga o le Atua ki manu

¹ Pe ko koe leia e afa ia se nea kai ki le laione fafine ? Pe ko koe leia e fagai ia a uviki laione o makokona,

² Mo ka lotou momoe i lolatou nofoaga, Mo ka lotou mumuni i muli o se ulu vao, o lamalama ?

³ Ko ai leia e teuteui ia ki le kolopo lana nea kai, Mo ka tagi ona uviki ki le Atua, Mo ka lotou taka noa mo fia kai ?

⁴ Pe ke iloa le temi leia e fanaui ai e koti vao olatou uviki ? Pe kua ke tio ki le temi leia e fananau ai a tia ?

⁵ Pe kua ke lau a masina ala e lotou tinanae ai ? Pe ke iloa le temi leia e lotou fananau ai ?

⁶ E lotou mapelu, ti e lotou tuku ke vilo olatou uviki, Ti e fimalie loa olatou mamae.

⁷ E liliu loa olatou uviki o asilisili makeke, Ti e lotou lalasi ake i le lauatea, Ti e lotou fakamamao i lolatou tinana, Ti e leaise lotou toe liliu mai kiate ia.

⁸ Ko ai leia e tuku ia ke faitalisa le asino vao, Mo fakalauatea ia a ia i kavega fuli ?

⁹ Ko au leia na tuku ia le asino ke nofo i le toafa, Ti na soli ia kiate ia le kele kona ko lona fale.

¹⁰ E kata a ia ki le logoa o kolo, E leaise logo a ia ki le kalaga a se pule.

¹¹ E taka a ia i mauga o afa lana nea kai, Ti e afa e ia a nea fuli e sesega.

¹² Pe fia tausi se pipi vao kiate koe ? Pe fakamoe a ia i le pouli i le fale manu ?

¹³ Pe ke sai a ia ki se maea ke fakamaluu ia lau faisaga ? Pe muli a ia iate koe o fakamaluu le kele i le potu laumalie ?

¹⁴ Pe ke fanaki kiate ia o tupu ko lona makeke lasi ? Pe ke tuku ke tokaga a ia ki au gaoi ?

¹⁵ Pe ke fanaki kiate ia ki le tanaki o lau fulumeto ki fale ? Pe ko ia leia e tonu ke tanaki ia le fulumeto i lou ganea sasa fulumeto ?

¹⁶ E mafola fakafiafia a kapakau o le otulusi ; E fai a ia pe le kapakau mo le fulu o le sikoni.

¹⁷ Kae e tiaki e le otulusi ona fua i le kele, Ke fakamafana e le efu o le kele ;

¹⁸ E leaise toe manatu a ia e mafai ke takafi ona fua e le vae, ti ke takatakafi latou e se manu o le vao.

¹⁹ E itaita a ia ki ona uviki o sakinake e leaise ko ni ona uviki totonu ; E leaise patipati a ia ki le ano noa o lana fanau.

²⁰ Talie na leaise soli e le Atua kiate ia le poto, Na leaise soli e ia ki le otulusi sona vaega i le atamai.

²¹ Ka tuu ake a ia o makape, E kata a ia ki le osi mo leia e eke i le osi.

²² Pe ko koe leia e soli ia ki le osi le makeke, Ti e teuteui ia lona ua ki se fulu loloa ?

²³ Pe ko koe leia e fakasopo ia a ia ofaipe le seseivaka ? E fakaii ai lana tagi fia tagata.

²⁴ E kenu e ia le kele ti e fiafia a ia i lona makeke, Ti e oso a ia ki mua o masafu ;

²⁵ E kata a ia ki le i, e leaise iloa e ia a ia, E leaise solomuli a ia i mua o le seleta.

²⁶ I ona fetuu e fetati a taga gasau, Ti e malipolipo le tao mo le savelo.

²⁷ I le makeke o lona oli, e kai e ia le kele, Ti e leaise mafai ke toe nofo noa a ia mo ka kua logo a ia ki le tagi o le fakatagi pupusi.

²⁸ I le tagi o le fakatagi pupusi, e pati a ia : Ke ano ki mua ! Mei mamao e saugai e ia le tau, mo le kalaga a le kau pule, ti mo kalaga tau.

²⁹ Pe ko lou atamai leia e lele ai le epelevie, Leia e folasi ai ona kapakau ki le potu saute ?

³⁰ Pe ko koe leia e fakatotonu ia ki le akuila ke lele O fakatuu lona ofaga i ganea taualuga ?

³¹ E nofo a ia i utu, e tuu lona nofoaga I tumutumu o utu, i tumutumu o mauga.

³² Mei ai e leoleo e ia lana nea kai, E tio a ia ki mamao.

³³ E inu e ona uviki le toto, Ti ko ganea fuli e tuku ai se manu mate e maua ai le akuila.

Fakamaoki a Sopo ki lona noa

³⁴ Na masau loa le Eteleno kia Sopo, o pati :

³⁵ Ko leia e fakavisi ki le Mafimafi pe kua fakamaoki a ia ? Ko leia e fakavisi ki le Atua pe i ai sana tali ?

³⁶ Na tali loa a Sopo ki le Eteleno, o pati :

³⁷ Ko leinei, ko au ko se nea noa, kolea ka kau tali atu loa kiate koe ? E kau teki loku lima ki loku gutu.

³⁸ Na kau masau tua tasi, e leaise kau toe tali loa. Na tua lua foki, e leaise kau toe pati loa ki se nea.