Sopo 38 - Tosi Tapu

Tali a le Eteleno kia Sopo

¹ Na tali loa le Eteleno kia Sopo mei loto malie o le asesio :

² Ko ai leia e fakapouli ia aku fakatuutuu Ki ni masau sala atamai ?

³ Toi lou kilii pipi ki ou vakavaka ofaipe se tagata toa ; E kau fakavesili loa a koe, Ti e ke ako mai loa kiate au.

⁴ Pe na ke nofo ifea i le temi leia na kau teki ai a fakatafito o le malama nei ? Fakasa a ia, mo kapau e ke atamai.

⁵ Ko ai leia na fakakaukaui ia ona fuafua, pe ke iloa a ia ? Ti ko ai leia na fua ia le kele ki le meta ?

⁶ Pe teki ona fakatafito kilea ? Ti ko ai leia na teki ia lona fatu agele,

⁷ Kae pasipasi mo sua fiafia a fetuu o le mafoata, kae kalaga fiafia a vosa fuli o le Atua ?

⁸ Ko ai leia na tapono ia le tai ki ni matapa, I le temi na mafuta ake ai i le loloto o le kele ;

⁹ I le temi leia na kau fakakofu ai a ia ki ni ao, Ti na kau kofukofu ai a ia ki le fakapouli ;

¹⁰ I le temi leia na kau tuku ai kiate ia laku lao, Ti na kau fakatuu ai i ona mua ni kaua mo ni matapa ;

¹¹ I le temi na kau pati ai : E ke au loa o kaku mai ki leinei, e leaise ke toe fakalaka atu loa ki leia ; E gato loa i leinei le fia nealasi o ou galu ?

¹² Talu mei le aso leia na ke tupu ai, pe kua ke lagiaki ki le usu ? Pe kua ke fakasa ia ki le mafoata lona tuuaga,

¹³ Ke kaku ai a ia ki potupotu o le kele, Ti ke lulu ai le kau agaveli ;

¹⁴ Ke liliu ai le kele ofaipe se kele kula leia kua fakamailoga, Ti ke teuteui ai a ia ofaipe se kofu ;

¹⁵ Ke too ai le malama i le kau agaveli, Ti ke fatii ai le lima leia e siki ki aluga ?

¹⁶ Pe kua ke ulu o kaku ki matapuna o le tai ? Pe kua ke evaeva i le loloto o le vanu ?

¹⁷ Pe na fakamavaa atu kiate koe a matapa o le mate ? Pe kua ke tio ki matapa o le malu o le mate ?

¹⁸ Pe kua tio ou mata ki le malama nei katoa i se lakaga e tasi ? Masau mai, mo kapau e ke iloa a nea fuli ana.

¹⁹ Kofea le ala leia e ano ki le nofoaga o le malama ? Ti kofea le ganea leia e nofo ai le fakapouli ?

²⁰ Pe ke ma too ia laua i ola gatoaga, Pe ke iloa a ala ki ola nofoaga ?

²¹ E ke iloa a ia, talie kua fualoa lou tupu ! Talie kua lasi ai ou fetuu !

²² Pe kua ke ano o kaku ki le ganea leia e tanaki ai le nive ? Pe kua ke tio ki le tanakiaga o fuai aisi,

²³ Ala e kau taofi ki le temi o le mamae, Ki aso o tau mo velo ?

²⁴ Ko le ala fea leia e mavaelua ai le malama, Ti e mafola ai le matagi mei le potu esite ki le kele ?

²⁵ Ko ai leia na fakamavaa ia se ala ki le ua, Ti na tofa ia le alaaga o le uila mo le mana,

²⁶ Ke to ai le ua ki se fenua lavaki, Ki se toafa leia e leaise nofo ai fua se tagata,

²⁷ Ke fakavai ai a ganea kele malo mo toafa, Ti ke somo ake ai le vao mo le mutie ?

²⁸ Pe i ai se tamana o le ua ? Ko ai leia e fakatupu ia a motii vai o le sasau o le mafoata ?

²⁹ Ko le manava o ai leia e au mei ai le aisi, Ti ko ai leia e fanaui ia le kokofu matotolu o le lagi,

³⁰ Ke aisi ai le vai ofaipe le fatu, Ti ke pipiki fuli ai a vai ko se nea e tasi ?

³¹ Pe feala lau nonoa fakatasi a fetuu o le Peleiate, Mo lau tatala a maea ala e taofi ia a fetuu o le Olione ?

³² Pe mafai ke ke fakasa i lona temi totonu a fakamailoga o le Sotiake, Ke ke taki a fetuu ko le Uluso Lasi mo ona fetuu liliki ?

³³ Pe ke iloa a lao o le lagi ? Pe ko koe leia e fakafuafua ia lana gaoi i le malama nei ?

³⁴ Pe mafai ke ke kalaga ki ao Ke lotou liligi atu kiate koe ni vai ofaipe ni liua ?

³⁵ Pe ko koe leia e fakatapa ia a uila ? Pe lotou ano ? Pe lotou pati atu kiate koe : Ko leinei matou ?

³⁶ Ko ai leia na tuku ia le poto ki le loto, Ko ai leia na soli ia le atamai ki le ipisi ke iloa e ia ka puke le Nile ; Ti mo le atamai ki le moatoa ke iloa e ia ka to le ua ?

³⁷ Ko ai leia e poto i le lau o ao, Ti mo le liligi o utele o le lagi,

³⁸ Mo ka fefeka le kele o fai se potu ukamea, Mo ka pipiki le kele o faisaga ofaipe ni fatu ?