Sopo 37 - Tosi Tapu

¹ Kua lulu katoa loku mafu, Kua masau a ia mei lona nofoaga.

² Kotou fakalogo, kotou fakalogo ki le mumusu o lona leo, Ki le gugulu leia e au mei lona gutu !

³ E fakateka e ia le mana i le lagi katoa, Ti e tapa lana uila o kaku ki potupotu o le malama nei.

⁴ Ti sili a ia, e paa loa se gugulu lasi : E masau a ia i le mana ki lona leo mamalu ; E leaise toe taofi e ia le uila, mo ka gugulu lona leo.

⁵ E masau fakamakeke a ia i le mana, Ti e tio tagata fuli ki lona fulumalie : Ko se milakulo lena e leaise feala ke matala ki ai.

⁶ E pati a ia ki le nive : To ki le kele ! E toe pati fenaaki a ia ki le ua, mo ua lalasi.

⁷ E taofi e ia a gaoi fuli a le tagata, O tupu ke lotou iloa ko latou fuli ko nea na fakatupu e ia.

⁸ E ulu le manu vao ki se ana, O moe i lona nofoaga.

⁹ E au le asesio mei le potu saute, Ti mo le momoko mei matagi o le potu noleto.

¹⁰ E fakatupu e le Atua a aisi ki lana tukumanava, Ti e fakalauikiiki e ia le ganea e mafola ai le vai.

¹¹ E fakaapele e ia a ao ki vai, Ti e veteki e ia latou ke gigila i ganea fuli.

¹² E lotou feanoaki o mulimuli ki ana fakatuutuu, O fakasoko a nea fuli ala na fakatotonu e ia kia latou, i aluga o le malama nei.

¹³ E fakasoko e le Atua lona finegalo ki le malama nei, O tautea, pe fakasa lona alofa.

¹⁴ Sopo, tokaga ki nea fuli ana ! Toe fakakaukau ki gaoi fakaofolele a le Atua !

¹⁵ Pe ke iloa na fakatotonu latou nafea e le Atua ? Pe feaki le fakamu e ao o uila ?

¹⁶ Pe ke matala ki le feanoaki o ao i le lagi ? Mo gaoi fakaofolele a leia e malie tukupau lona poto.

¹⁷ Pe ke iloa le tupuaga o le vevela o ou kofu Mo ka malo le kele i le matagi o le potu saute ?

¹⁸ Pe ke mafai ia le folasi o le lagi ofaipe ia, Ke fefeka ofaipe se tiloata ukamea na saka ?

¹⁹ Ako mai kia matou le nea leia e tonu ke motou fakasa kiate ia ; Talie e motou valelea ai i le masau kiate ia.

²⁰ Pe fakasa loa kiate ia e kau masau loa ? Kae ko ai le tagata leia e fia mate ?

²¹ Ko leinei, e leaise feala ke tio se tasi ki le laa leia e puli i ao, Kae malaga loa se matagi, o fakamea le lagi.

²² E fakaliliu e le matagi o le potu noleto ke gigila le lagi ofaipe le aulo. Io, e fakaii ai le agai o le Atua !

²³ E leaise feala ke tou kaku ki le Mafimafi, E lasi a ia i le makeke, I le faitotonu, mo le pule. E leaise tali mai a ia !

²⁴ Koia e tonu ai ke i a tagata kiate ia ; E leaise tio ona mata ki se poto fua e tasi.