Sopo 36 - Tosi Tapu

Fakamatala e Eliu o le anoaga o le kau agatonu mo le kau agasala

¹ Na toe soko atu loa e Eliu lana masau, o pati :

² Talitali fakaikiiki, ke kau ako a koe : Talie e kau maua ni masau ke fakamaoki ki le Atua.

³ E kau aumai aku fakakaukau mei mamao, Ti e kau fakamaoki loa ki le faitotonu o loku tupuaga.

⁴ Ke ke iloa fakapapau e leaise loi aku masau, Ti e maoki aku manatu i ou mua.

⁵ E mafimafi le Atua, kae e leaise tiaki e ia se tagata ; E mafimafi a ia i le makeke o lona atamai.

⁶ E leaise tuku e ia ke mauli le tagata agaveli, Ti e fakapale e ia le tagata fakaaloalofa.

⁷ E leaise too e ia ona mata i le kau agatonu ; E fakaekeeke e ia latou ki le ekeekeaga fakasau o fakatasi mo sau, Ti e fakaekeeke e ia latou i ai o lee gato, o tupu ke siki latou ki aluga.

⁸ Kapau e lotou vilo ki le popula, Pe lotou visia i ni faigataa veli,

⁹ E fakasa e ia kia latou alatou gaoi veveli, Mo alatou patigataa, ti mo lolatou fia nealasi ;

¹⁰ E valoki e ia latou ki lana akonaki ; E kalaga a ia kia latou ke tiaki le agaveli.

¹¹ Ti kapau e lotou logo mo fakalogo, Ti e lotou fakaoki loa olatou aso i le fimalie, Ti mo olatou fetuu i le fiafia.

¹² Ti kapau e leaise lotou patigaofie, e lotou pupuli loa i le seleta, Ti e lotou mamate loa o tupu ko lolatou fakafefeka.

¹³ E itaita le kau malualoi ki le Atua, Kae e leaise lotou tagi kiate ia mo ka sai latou e ia ki ni tini.

¹⁴ E lotou mamate koi tupulaga, E lotou mamate ofaipe ni kakai fakalialia.

¹⁵ Kae e fakamauli e le Atua le tagata fakaaloalofa i lona mativa, Ti e fakatokaga a ia kiate ia i le mamae.

¹⁶ Koia e too ai loa e ia a koe mei le mamae, O tuku ki le laulasi, ki le lauatea, Ti e apele loa lou laupapa i nea kai malilie.

¹⁷ Kae kapau e ke fia puipui a koe ofaipe le tagata agaveli, Ti e leaise mavae loa le tautea iate koe.

¹⁸ Ke aua na ave a koe e lou itaita ke ke gologolo, Ti ke aua na fakasese a koe e le lasi o le totogi !

¹⁹ Pe feauga au tagi ke too ia le mamae iate koe ? Ti e tatau foki mo le makeke katoa leia e feala ke ke fakaaoga.

²⁰ Aua na ke fakaamu ki le pouli Leia e too ia le kakai mei lolatou nofoaga.

²¹ Ke ke tokaga ke aua na ke tuku a koe ki le veli, Talie ko ia leia na tupu ai lou mamae.

E pule faitalisa le Atua

²² E lasi le Atua i lona mafimafi ; Ko ai e iloa ia le akonaki ofaipe ia ?

²³ Ko ai e fakatotonu ia kiate ia ona ala ? Ko ai e toa i le pati kiate ia : E veli lau fai ?

²⁴ Ke aua na galo iate koe ke ke fakavikiviki ki ana gaoi malilie, Ala e fakavikiviki ki ai a tagata fuli i alatou sua.

²⁵ E tio ki ai a tagata fuli, E tio ki ai a tagata taki toka tasi mei mamao.

²⁶ E lasi ai le Atua, ti e leaise feala ke tou iloa lona mafimafi, E leaise mafai ke iloa le lasi o ona fetuu.

²⁷ E aumai e ia kiate ia a motii vai, Ti e fakaliliu e ia latou o ao, ke to mei ai le ua.

²⁸ E tuku loa e ao ke to le ua, Leia e mafola loa ki le kakai toka api.

²⁹ Ti ko ai e matala loa ki le saele o ao, Mo le gugulu o le mana i le lagi ?

³⁰ Ko leinei, e fakamu e ia lona malama i ona tafatafa, Ti e mumuni a ia o kaku ki le takele o le tai.

³¹ I nea ana e fakamaau e ia a puleaga, Ti e soli e ia le nea kai o lasi.

³² E too e ia le uila i lona lima, O fakaagaaga ki ona fili.

³³ E fakasa e ia lona agai i le mana, Ti e logoi foki e manu lana fakafeofi mai.