Sopo 35 - Tosi Tapu

Faiga a Eliu ke afa e Sopo le Atua

¹ Na toe soko atu e Eliu lana masau, o pati :

² Sopo, pe ke manatu e ke maoki i mua o le Atua, Pe ke manatu e ke maokioki i mua o le Atua,

³ Talie e ke pati : Kolea lona aoga kiate au, Kolea laku nea e maua i laku agatonu ?

⁴ Ko koe leia e kau tali ki ai, Ti mo ou kaukaunea i se temi e tasi.

⁵ Tio ki le lagi, o tio ! Tio ki ao, ala e taualuga ake iate koe !

⁶ Kapau e ke agasala, kolea lona veli kiate ia ? Ti kapau kua tupu o lasi au patigataa, kolea e ke fai kiate ia ?

⁷ Ti kapau e ke maokioki, kolea e ke soli kiate ia ? Kolea e maua loa e ia mei lou lima ?

⁸ E veli fai lau agasala ki le tagata leia e tatau mo koe ; Ti e aoga fai lou maokioki ki le vosa o le tagata.

⁹ E tagi i le api o le kau fakamakeke ; E lauga i le agaveli a se kakai toka api ;

¹⁰ Kae e leaise pati fua se tasi : Kofea le Atua, loku tupuaga, Leia e tuku ia ki loku loto ni sua fiafia i le pouli,

¹¹ Leia e ako ia tatou o lasi ake i manu o le kele, Ti e soli ia kia tatou le atamai o lasi ake i manu lele o le lagi ?

¹² Koia e kalaga ai loa, kae e leaise tali loa le Atua, O tupu ko le fia nealasi o le kau agaveli.

¹³ E maumau noa le tagi, e leaise logo le Atua, Ti e leaise tokaga le Mafimafi.

¹⁴ Logo ai e ke pati e leaise ke tio kiate ia, E tuku lau tagi i ona mua : talitali kiate ia !

¹⁵ Kae, o tupu e leikiaise kaku lona sausau ki lona gatoaga, E leaise tonu ke ke pati e leaise tokaga a ia ki le agatuu.

¹⁶ Koia e fakamavaa noa e Sopo lona gutu, Ti e liuliuga e ia ana masau agatuu ki le Atua.