Sopo 34 - Tosi Tapu

Fakasa e Eliu e faitotonu a le Atua

¹ Na toe masau Eliu, o pati :

² Kau poto, kotou fakalogo mai ki aku masau ! Koutou ala e atamai, kotou tokaga mai kiate au !

³ Talie e asiasii e le taliga a masau Ofaipe le gutu leia e asiasii ia a nea kai.

⁴ Tou filifili le nea leia e totonu, Tou tioi fakatasi le nea leia e malie.

⁵ Na pati a Sopo : E kau saosaoa, Kae e fakafiti e le Atua le faitotonu kiate au.

⁶ E kau maoki, kae e fakaliliu au ko se tagata gutu loiloi ; E mamae loku lavea, kae e kau sala agasala.

⁷ Pe i ai se tagata e tatau mo Sopo, Leia e inu ia a nukinuki ofaipe le inu o le vai,

⁸ Leia e saele fakatasi mo latou ala e fai ia le agaveli, Ti e ano fakatasi mo latou ala e leaise tui ki le Atua ?

⁹ Talie na pati a ia : E leaise sona aoga ki le tagata Ke tuku lona fiafia ki le Atua.

¹⁰ Kotou fakalogo mai, koutou ala e maua ia se atamai malie ! E mamao ai i le Atua le nea e sala, E mamao ai i le Mafimafi le agaveli !

¹¹ E liufaki e ia ki le tagata o mulimuli ki ana gaoi, Ti e totogi e ia le tagata o mulimuli ki ona ala.

¹² E leaise fai e le Atua le nea leia e veli ; Ti e leaise maumaui e le Mafimafi le faitotonu.

¹³ Ko ai na fakanofo ia a ia ke pule i le malama nei ? Ko ai na pati kiate ia ke tokaga ki le malama nei ?

¹⁴ Kapau na tokaga fai le Atua kiate ia totonu, Kapau na taupau e ia lona laumalie mo lona mauli kiate ia toka tasi,

¹⁵ E mamate loa a nea fuli e mauli i le temi e tasi, Ti e toe liliu loa le tagata ki le kele.

¹⁶ Kapau e i ai sou atamai, ti ke ke fakalogo mai ki le nea leinei, Ke tokaga mai lou taliga ki aku masau !

¹⁷ Pe mafai ke pule se tasi leia e vesia ki le faitotonu ? Pe ke fakalakasala loa le fa toka tasi leia e faitotonu mo mafimafi,

¹⁸ Leia e fakasa ia le agaveli o sau, Ti mo le agaveli o pule,

¹⁹ Leia e leaise tokaga fua ki le mamalu o le kau lalasi, Ti e leaise fakakesekese ia le tagata mou koloa mo le tagata mativa, Talie ko latou fuli ko gaoiaga o ona lima ?

²⁰ I se kemo o le mata, e lotou mamate ; I loto malie o le pouli, e siga se puleaga, o mate ; Ti e puli le tagata makeke, sala mo le lima o se tagata.

²¹ Talie e tio le Atua ki le mauli o tagata fuli, Ti e tuku ona mata ki lakaaga o le tagata taki toka tasi.

²² E leaise mafai ke fufu e le fakapouli pe ko le malu o le mate Latou ala e fai ia le agaveli.

²³ E leaise aoga ki le Atua ke tuku logo ki le tagata mo ka kua loto a ia ke nake a ia ki lona fakamaauaga ;

²⁴ E fatii e ia le kau lalasi sala mo sakili logo, Kae toe fakanofo e ia ni iki o fetogi latou ;

²⁵ Talie e iloa e ia alatou gaoi. E fakaifo e ia latou ti e takatakafi e ia latou i se po e tasi ;

²⁶ E tamate e ia latou Ofaipe ni kau tukipo i mua o le kakai.

²⁷ Talie na lotou maliu kese iate ia, Talie na lotou tiaki ona ala,

²⁸ Na lotou fakamakeke le mativa ke tagi ki le Atua, Ti na lotou fai ke tokaga le Atua ki le tagi a le fakaaloalofa.

²⁹ Kae i le tasi anoaga, kapau e leaise loto le Atua ke fai ia se nea, ko ai e fakalakasala ia a ia ? Ti kapau e mumuni a ia, ti ko ai e feala ke toe tio kiate ia ? E fai fakatatau e ia ki se puleaga, pe ko se tagata,

³⁰ O tupu ke aua na toe pule le tagata agaveli, Ti ke aua na toe liliu a ia ko se masele ki le kakai.

³¹ Talie ko ai le tagata leia kua pati ki le Atua i se aso : Kua oki loku tautea, e leaise kau toe agasala loa ;

³² Fakasa mai kiate au le nea leia e leaise kau tio ki ai ; Kapau na kau fai ni sala, e leaise kau toe fai loa latou ?

³³ Pe fai loa e le Atua lana faitotonu ofaipe lau manatu ? Ko koe leia e tiaki, leia e filifili, kae e leaise ko au ; Ko le nea leia e ke iloa, fakasa mai a ia !

³⁴ E kau loa mo au a tagata fuli ala e atamai, ti e manatu tasi mo au le poto leia e logo ki aku masau.

³⁵ E masau a Sopo kae e leaise fakakaukau a ia, Ti e fakasa e ana masau lona valea.

³⁶ Koia ke soko atu lona asiasii, Talie e tali a ia ofaipe le tali a le kau agaveli !

³⁷ Talie e toe teki e ia ki ana agasala afea ni iki agasala foou ; E pasipasi ona lima i loto malie o tatou, E liuliuga e ia ana masau ki le Atua.