Sopo 33 - Tosi Tapu

Kia Eliu e masau le Atua i le mamae

¹ Koia i le lakaga nei, Sopo, fakalogo mai ki aku masau, Tokaga mai lou taliga ki aku masau fuli !

² Ko leinei, kua kau fakamavaa loku gutu, Ti kua taugaoi loku alelo i loto.

³ E kau masau loa kiate koe i se loto sako, Ti e fakasa loa e oku laugutu le maoki katoa :

⁴ Na fakatupu au e le Laumalie o le Atua, Ti na soli e le tukumanava o le gutu o le Eteleno le mauli kiate au.

⁵ Kapau e ke mafai a ia, tali mai kiate au, Puipui a koe, tuu teuteu !

⁶ I mua o le Atua e kau tatau mo koe, Na fau au ofaipe koe mei le pela ;

⁷ Koia aua na ke i loa kiate au, Pe ke manatu loa e kau fia takafi a koe.

⁸ Kae na ke pati ki oku taliga, Ti na kau logo ki au masau :

⁹ E kau mea, e leaise kau agasala, e kau saosaoa, e leaise maua iate au se agaveli.

¹⁰ Kae kua maua e le Atua ni nea ke tuku veli ai au, Kua fai e ia kiate au ofaipe ki sona fili ;

¹¹ Kua saisai e ia oku vae ki le tafito vite, Ti kua leoleo e ia aku nea fuli e fai.

¹² E kau fakasa kiate koe e ke faisala i le nea lena, ei Sopo ; Talie e taualuga ake le Atua i le tagata.

¹³ Pe ke fia visi loa mo ia, Talie e leaise fakamatala e ia ana nea ala e fai ?

¹⁴ Kae e masau le Atua, i leia faasiga mo leia faasiga, Ti e leaise tou tokaga fua ki ai.

¹⁵ E masau a ia i moe miti, mo nea ala e tio ki ai i le pouli, I le temi leia e moe mate ai a tagata, I le temi leia e lotou momoe ai i olatou moeaga.

¹⁶ E tuku loa e ia se levelasio kia latou Ti e fai loa e ia valoki fakaoki,

¹⁷ O tupu ke tafoki le tagata i le veli ti ke puipui a ia i le fia nealasi,

¹⁸ O tupu ke saofaki lona laumalie i le popoko Mo lona mauli i le seleta.

¹⁹ E ako foki e le Atua le tagata i lona moeaga i le mamae, I le temi leia e lulu katoa ai lona tino i le vela.

²⁰ I le temi leia e fakalialia ai a ia ki nea kai, Ki nea kai malilie foki ala na uakai a ia ki ai.

²¹ E teifo lona tino o kala, Ti e sa ona ivi ala na leaise tio ki ai.

²² E fakafeofi lona laumalie ki le popoko, Ti mo lona mauli kia latou ala e fakasa ia le mate.

²³ Kae kapau e maua loa e ia se aselo ulufaga i ona tafa, Se tasi o tino afe Ala e fakasa ia ki le tagata le ala leia e tonu ke muli ai,

²⁴ E alofa loa le Atua kiate ia, ti e pati loa a ia ki le aselo : Saofaki a ia, ke aua na vilo a ia ki le popoko ; Kua kau maua se totogi kiate ia !

²⁵ Ti e toe mauli loa lona tino ofaipe tino koi muli, E toe liliu loa a ia ki aso o lona tupulaga.

²⁶ E fai loa e ia lana kole ki le Atua, ti e tali loa le Atua kiate ia ; E tuu loa a ia i mua o le Atua mo ni kalaga fakafiafia, Ti e liufaki loa e le Atua kiate ia lona faitotonu.

²⁷ E sua loa a ia o fakasa ki tagata fuli : Na kau agasala, na kau maumaui le lao, kae na leaise fakatua au o mulimuli ki laku agaveli ;

²⁸ Na saofaki e le Atua loku laumalie ke aua na ulu ki le popoko, Ti kua tio loku mauli ki le malama.

²⁹ E fai a nea fuli ana e le Atua ki le tagata, O tua lua, mo tua tolu,

³⁰ Ke taaki lona laumalie mei le popoko, Ke fakamalama a ia ki le malama o le mauli.

³¹ Tokaga, ei Sopo, fakalogo mai kiate au ! Fakaleemu, ti e kau masau loa !

³² Ti kapau e i ai se nea leia e ke fia masau ki ai, ti ke tali mai kiate au ! Masau, talie e kau loto ke kau fakamaoki kiate koe.

³³ Ti kapau e leai sau tali, ti ke fakalogo mai ! Fakalologo, ti e kau ako loa kiate koe le poto.