Sopo 32 - Tosi Tapu

Fakamaau o Sopo e Eliu

¹ Na tuku loa e le kau tagata lena e toka tolu le tali kia Sopo, talie na maokioki a ia ki ona mata totonu.

² Ti na malaga loa le ita o Eliu, vosa o Palakeele mei Pusi, mei le famili o Lame. Na malaga loa lona ita kia Sopo, o tupu na pati a ia e faitotonu a ia i mua o le Atua.

³ Ti na toe ita foki a ia ki ona kaukaunea e toka tolu, talie na leaise lotou maua se tali kia Sopo kae na lotou fakalakasala a ia.

⁴ O tupu na lotou matutua ake iate ia, na talitali Eliu o kaku mai ki le lakaga lena ke masau kia Sopo.

⁵ Kae i lana tio na leaise koi maua se tali i le gutu o tagata ana e toka tolu, na malaga loa le ita o Eliu.

⁶ Ti na masau loa Eliu, vosa o Palakeele mei Pusi, o pati : Koi kau muli, kae kua kotou matutua ; Koia leia na kau i ai, ti na kau tuania ai I le fakasa o laku manatu kia koutou.

⁷ Na kau pati i loku loto : E masau loa a aso, E tuku loa le poto e leia kua lasi o fetuu.

⁸ Kae kua kau iloa maoki nei, i le tagata, ko le laumalie fakaatua, Ko le matagi o le gutu o le Mafimafi leia e soli ia le atamai.

⁹ E leaise ko le lasi o fetuu leia e soli ia le poto, E leaise ko le matua leia e fakaliliu ia le tagata o poto i le fakamaau.

¹⁰ Koia e kau pati ai : fakalogo mai ! Ko au foki, e kau tuku loa laku manatu.

¹¹ Na kau talitali ke oki akoutou masau, Na kau mulii fuli akoutou fakakaukau, Mo akoutou tali fuli ala na kotou fai kia Sopo.

¹² Na kau tokaga ki nea fuli ala na kotou masau ki ai ; Ti ko leinei, na leaise mafai e se fa toka tasi fua ia koutou ke fulusi ia le manatu a Sopo, Na leaise mafai e se fa toka tasi ke tali ki ana masau.

¹³ Aua na kotou pati loa : Kua motou maua iate ia le poto ; Ko le Atua toka tasi leia e mafai ke fakalakasala ia a ia, e leaise ko se tagata !

¹⁴ Na leaise masau fakaagatonu mai a ia kiate au : Koia e kau tali ai kiate ia, o kese ake ia koutou.

¹⁵ Kua lotou i, e leaise koi lotou tali ! Kua momotu olatou alelo !

¹⁶ Na kau talitali ke oki alatou masau, Ti ko leinei kua gato alatou masau, ti e leaise koi iloa salatou tali.

¹⁷ Koia ko le temi leinei o oku, e kau loto foki ke kau tali, E kau loto foki ke kau fakasa le nea leia e kau manatu ki ai.

¹⁸ Talie kua apele loku loto i masau ; Kua ekenaki au e le laumalie ke masau ;

¹⁹ Kua pula loku loto ofaipe se vino Leia na fakamaumau i ni utele foou ti kua aga o maumaui latou.

²⁰ E kau masau loa ke kau fimalie, E fakamavaa loa oku laugutu ti e kau tali loa.

²¹ E leaise kau toe malualoi loa ki se tasi, Ti e leaise kau viki loa se tasi ;

²² Talie e leaise kau poto i fakalapulapu, Talie e too fakatavili loa au e loku Atua, leia na fakatupu ia au.