Sopo 31 - Tosi Tapu

Masau a Sopo o fakasa lona saosaoa

¹ Na kau fai se fakapapau mo oku mata, E leaise kau tio manumanu loa ki se taine taupoou.

² Kolea le vaega e tuku loa e le Atua mei aluga kiate au ? Kolea le tofiga e aumai loa e le Mafimafi mei aluga kiate au ?

³ Pe leaise ko le vaega o le kau agasala ko le maumau ? Pe leaise ko le vaega o latou ala e fai ia le agaveli ko le malaia ?

⁴ Pe na leaise iloa e le Atua oku ala ? Pe na leaise lau e ia oku lakaaga fuli ?

⁵ Kapau na kau saele i le loi, Ti kapau na makape loku vae i le kaka,

⁶ Ke fua au e le Atua i se fua leia e totonu, Ti e iloa loa e ia loku agatonu !

⁷ Kapau na mavae kese loku vae mei le ala totonu, Ti kapau na mulimuli loku loto ki oku mata, Ti kapau na pipiki se nea kelekele ki oku lima,

⁸ Ke kau muluki ti ke utu e se tasi, Ti ke taaki oku uli i le kele !

⁹ Ti kapau na sese loku loto i se fafine, Ti kapau na kau lamalama a ia i le matapa o loku oloi,

¹⁰ Ti ke gaoi laku avaga ki se tasi ake tagata, Ti ke faitalisa ni iki kiate ia !

¹¹ Talie e kau fai loa i ai se veli mateia, Io, se agasala leia e tonu ke fakatua e le kau tui fakamaau ;

¹² E tatau loa laku sala mo se afi, leia e kai ia loa au o kaku ki le maumau, Ti e tutu ia loa aku nea fuli.

¹³ Kapau na leaise kau fai le nea leia e totonu ki laku tagata fakasausau pe ko laku fafine fakasausau I le aso leia na la au ai o tagi mai kiate au ki se nea,

¹⁴ Ti kolea loa ka kau fai i le aso leia e tuu ai le Atua ki aluga ? Ti kolea loa laku tali i le aso leia e teki ai e ia le tua ?

¹⁵ Ko leia na fakatupu ia au i le manava o loku tinana, pe na leaise fakatupu foki e ia mo laua ? Pe leaise ko le Atua fai e tasi leia na fakatupu ia matou fuli i le manava o omatou tinana ?

¹⁶ Kapau na leaise kau soli ki le kau mativa le nea leia na lotou kole mai ki ai, Ti kapau na kau fakamamae a mata o le fafine lokonui,

¹⁷ Ti kapau na kau kai toka tasi laku nea kai, Kae na leaise kau soli se vaega ki le toe sala tamana,

¹⁸ Talie talu mei laku lasi ake na kau taupau a ia ofaipe se tamana, Talie talu mei laku lasi ake na kau tokoi ki le fafine lokonui ;

¹⁹ Ti kapau na kau tio e sala lava le tagata mativa, Ti e sala tupenu kafu le tagata fakaaloalofa,

²⁰ Ti kapau na leaise kau teki ki ola tua se kie leia na lalaga ki fulu o aku manu, Ti kapau na leaise la fakamalo mai kiate au ;

²¹ Ti kapau na kau siki loku lima ki le toe sala matua Talie na kau fanaki ki le tokoi a le kau tui fakamaau ;

²² Ke mataaki loku tuauma i loku tino, Ti ke vilo loku lima o fatifati !

²³ Talie e fakaii ai le tua a le Atua kiate au, Ti e leaise mafai ke kau fai se nea i mua o lona agai.

²⁴ Kapau na kau tuku laku fanaki ki le aulo, Kapau na kau pati ki le aulo : ko loku amanaki malie a koe ;

²⁵ Kapau na kau fiafia i le lasi o oku koloa, I le lasi o koloa kesekese ala na kau maua i laku gaoi ;

²⁶ Kapau na kau tio ki le laa i lona gigila, Ti mo le masina i lona sopo ake i lona fulumalie katoa,

²⁷ Ti kapau na sese loku loto, Ti na kau atolasio fakafufu ki nea ana ofaipe ni atua ;

²⁸ Ko le tasi foki lena sala fakalialia e tonu ke fakatua e le kau tui fakamaau, Talie kua kau fakafiti loa ki le Atua i aluga !

²⁹ Ti kapau na kau fiafia i le malaia o loku fili, Ti kapau na kau soposopo i le temi o lona malaia,

³⁰ A au leia na leaise fakataga ia fua ki loku alelo ke agasala, Ti ke kole ia ki le Atua lona mate ;

³¹ Ti kapau na leaise pati latou o loku falela : Ko ai leia na leaise makona i lana inati ?

³² Kapau na moe le matapule i fafo i le pouli, Ti kapau na leaise kau fakamavaa loku matapa ki le tagata fanoga ;

³³ Ti kapau, ofaipe tagata fuli, na kau fufu aku sala, Ti na kau kofu aku agaveli i loku manava,

³⁴ Talie na kau i ki le toka api, Ti na vesia mai kiate au ni famili, Ti na leaise kau masau ai, kae kau nofo i loku fale…

³⁵ Oi, ko ai e maua ia loa se tagata ke fakalogo mai kiate au ? Ko lena laku tagi fakaoki : Ke tali mai le Atua mafimafi kiate au ! Ko ai e tuku ia mai loa kiate au le tali a leia e visi mo au ?

³⁶ E kau amo fakasasa loa lana tosi i loku tuauma, E kau sai loa a ia i loku lae ofaipe soku pala ;

³⁷ E kau fakasa loa kiate ia oku lakaaga fuli, E kau fakafeofi loa kiate ia ofaipe se tama aliki.

³⁸ Ti kapau e kalaga loku kele kiate au, Talie na kau gaoi fakaveliveli ki ai ;

³⁹ Ti kapau na kau kai noa ona fua kae e leaise kau totogi a ia, Ti na kau fakamamae a loto o ona uluaki pule ;

⁴⁰ Ke somo i ai ni vao sukisuki o fetogi le fulumeto, Mo se sisania o fetogi le olese ! Oki o masau a Sopo.