Sopo 30 - Tosi Tapu

Fakaaloalofa mo le fakataulaloi o Sopo

¹ Kae i le aso nei !… Kua kau liliu ko le nea fakagologolo a latou ala na muli iate au, A latou ala na leaise kau tali ke tuku olatou tamana Ke kau i le kau kuli leo o aku kau manu.

² Ti kolea le aoga o le makeke o olatou lima kiate au ? E leaise mafai ke lotou kaku ki lolatou temi matua.

³ Kua lotou kala iviivi i le mativa mo le fia kai, ti e lotou afa se nea kai i ganea toafa, Ala kua fualoa lona tiaki, ti e leaise koi nofoi.

⁴ E lotou afa ni mutie konakona i tafa o ganea vaoa, Ti ko lalatou pane ko aka o le sene.

⁵ E kapu latou e fenua fuli, Ti e kalaga leo lasi i olatou muli ofaipe ni nea kaia,

⁶ E lotou nonofo i ni vaivailiua fakaii, I ni ana i le kele, ti mo ni pu o utu.

⁷ E lotou kalaga pe ni manu i ulu vao, Ti e lotou fakatasi i lalo o vao talatala.

⁸ Ko ni kakai valelea mo vesiainai, Ti e kapu latou ke mavae i le fenua.

⁹ Ti ko leinei, kua kau liliu ko le nea sua a alatou fanau, Io, ko lalatou nea masau fakagologolo.

¹⁰ E lotou fakalialia kiate au, e lotou mafuli kese iate au, Ti e lotou anusi oku mata.

¹¹ Talu mei le too e le Atua o loku makeke ti mo lana tuku au ki lalo, E leaise koi lotou fakaapaapa fua kiate au !

¹² Kua malaga ki aluga a nea fakaaloalofa ana i loku fetuu atamai, ti e lotou selei oku vae. E lotou lauveli kiate au ke kau siga.

¹³ E lotou maumaui loku ala, e lotou gaoi ki loku malaia, Latou ala e leaise tokoi fua ki ai se tasi.

¹⁴ Kua lotou maua se faigamalie ke lotou oso ai kiate au, Ti kua lotou makape mai kiate au i loto malie o maumau.

¹⁵ Kua takatakai au e ni nea fakaii ; Kua ave loku kololia ofaipe le matagi ; Kua puli loku fiafia ofaipe se ao.

¹⁶ I le aso nei, kua tagi loku laumalie iate au, Kua too au e aso o le mamae.

¹⁷ I le pouli, e ulu a mamae i loku tino o kaku ki loto o oku ivi, E lotou tafi au, e leaise kau maua fua se ga fimalie i se temi.

¹⁸ Kua too fakamakeke e le Atua loku kofu, Ti kua kukumi e ia loku tino ofaipe se kofu leia e ikiiki ai.

¹⁹ Kua ti e ia au ki le pela, Ti kua kau tatau mo le efu ti mo le mugalafu.

²⁰ E kau tagi kiate koe, kae e leaise ke tali mai kiate au ; E kau tuu ki aluga i ou mua, kae e leaise ke tokaga mai kiate au.

²¹ Kua ke liliu o itaita kiate au ; Ti kua ke taai au ki le makeke katoa o lou lima.

²² E ke siki au ki aluga, ti e ke ti au ke agina i aluga o le matagi, Ti e ke lu fakaveliveli au ki le afa.

²³ Talie e kau iloa e ke taki au ki le mate, Ki le ganea leia e fakatasi ai latou fuli e mauuli.

²⁴ Kae ko leia e ano ki le mate, pe leaise falo e ia ona lima ? Ko leia e nofo i le tutamaki, pe leaise tagi a ia ki se tokoi ?

²⁵ Pe na leaise kau tagi ki leia na mamae ? Pe na leaise alofa loku laumalie ki le kau mativa ?

²⁶ Na kau talitali ki le manuia, ti na soko mai le malaia ; Na kau amanaki malie ki le malama, ti na soko mai le fakapouli.

²⁷ Kua pula loku manava i temi fuli, Talu mei le aso leia na vilo ai le malaia kiate au.

²⁸ E kau saele i le mamae, e leaise laa kiate au ! E kau tuu ki aluga i loto malie o le fakatasiga, o kole se tokoi.

²⁹ Kua kau liliu ko le taina o kuli vao, Ko le kaukaunea o otulusi.

³⁰ Kua uli loku kili ti kua maluku a ia, Kua vela oku ivi ti kua lotou malo.

³¹ Kua tagi laku alepe ; Ti kua mamae laku salumo.