Sopo 3 - Tosi Tapu

Tagi a Sopo o tutuku lona aso tupu

¹ Ti na sili a ia, na fakamavaa loa e Sopo lona gutu, o tutukui le aso o lona tupu.

² Na masau loa a ia, o pati :

³ Ke puli oki le aso leia na kau tupu ai, ti mo le po leia na pati : Kua fanaui se toe tama !

⁴ Ko le aso lena ! Ke fakapouli le aso lena, ke aua na tokaga ki ai le Atua i le lagi, Ti ke aua na toe mu ki ai le malama !

⁵ Ke osoi a ia e le fakapouli matotolu mo le malu o le mate, Ke fakatuu e ao matotolu lolatou nofoaga i ona aluga, Ti ke tapono e le fakapouli matotolu le laa kiate ia !

⁶ Ti ko le po lena ! Ke folo a ia e le fakapouli matotolu, Ke puli a ia mei le fetuu, Ti ke aua na toe lau a ia i aso o le masina !

⁷ Io, ke paa le po lena, Ti ke aua na toe logo i ai se kalaga fakafiafia !

⁸ Ke fakamalaia a ia e latou ala e fakamalaia ia a aso, Ti mo latou ala e popoto i le fakatupu o le ita o le Levitane.

⁹ Ke aua na tio fua le po lena ki le fetuu ao, Ke ano noa lana talitali ke mafoa mai le ao, Ti ke aua na tio fua a ia ki laumata o le mafoata !

¹⁰ Talie na leaise tapono e ia le manava leia na fakatupu ia au, Ti na leaise fufu e ia le mamae ki oku mata.

¹¹ Kolea na leaise kau mate ai i le manava o loku tinana ? Kolea na leaise kau mate ai i le temi leia na kau vilo ai mei lona manava ?

¹² Kolea na kau maua ai ni tega ke fakatalitali ia au, Ti mo ni u ke fakau ia au ?

¹³ Kua kau moe loa i le aso nei, kua kau fimalie loa, Io, kua kau moe loa, kua kau malolo loa i loku tanuma,

¹⁴ O fakatasi mo sau mo le kau lalasi o le malama nei, Ala na fakatuu ia kia latou ni tanuma lalasi,

¹⁵ O fakatasi mo aliki ala na mou koloa i le aulo, Ti na fakaapele ia olatou nofoaga ki le paaga.

¹⁶ Ti kapau na leaise kau tupu fua, kae ke kau fai loa pe se toe na vilo, Pe latou ala na leaise tio ki le malama.

¹⁷ I lena, e leaise toe fai loa ni mamae e le kau agaveli, Ti e malolo loa latou ala kua gagae ti kua sala makeke ;

¹⁸ I lena e fimalie fuli loa le kau pilisoni, E leaise lotou logo loa ki le leo o le tagata fakaveliveli.

¹⁹ I lena e nonofo fakatasi leia e lasi mo leia e ikiiki, Ti e lauatea le tagata popula i lona pule.

²⁰ Kolea e soli ai e le Atua le malama ki leia e mamae, Ti mo le mauli kia latou ala e loto mamae,

²¹ Kia latou ala e oli ki le mate, Kae noa a ia, ti e lasi ake lalatou afa ki ai i lalatou afa ki se koloa fufu,

²² Kia latou ala e makape loa i le nekenekea Ti e apele loa i le fiafia lasi moka lotou maua loa le tanuma ?

²³ Ki le tagata leia e leaise iloa ia le ganea leia e ano ki ai, Ti e takatakai a ia e le Atua mei potu fuli ?

²⁴ Ko aku tukumanava ko lena laku nea kai, Ti e tafe aku tagi ofaipe le vai.

²⁵ Ko le nea leia e kau tuania ia, ko ia leia kua soko mai kiate au ; Ko le nea leia e kau i ki ai, ko ia leia kua kaku mai kiate au.

²⁶ E leaise koi kau maua fua se fimalie, pe ko se tokamalie, pe ko se malolo, Kae kua kau apele i le mamae.