Sopo 28 - Tosi Tapu

Afa o le poto e Sopo

¹ E maua ke i ai se lameni leia ke too mei ai le paaga, Ti mo se ganea leia ke too mei ai le aulo o fakamea.

² E too le ukamea mei le efu, Ti e saka le fatu ke maua ai le sila.

³ I loto o le kele, e fakagato e le tagata le fakapouli i lana ave ki ai le malama ; Ti e afa e ia o kaku ki ganea loloto oki, A fatu ala e fufu i le fakapouli mo le malu o le mate.

⁴ E kenu e ia se sosoni o mamao mei ganea ala e nofoi ; E leaise koi tokoi ona vae kiate ia, Ti e tautau a ia, o kalu, mo mamao mei tagata.

⁵ Ko le kele, leia e maua mei ai le pane, E maveuveu i lalo o sakinake na maumaui a ia e le afi.

⁶ Ko fatu o le kele ko le nofoaga a ia o le safile Ti e maua i ai le aulo.

⁷ E leaise iloa e le manu lele fekai le ala ki ai, Ti e leaise tio ki ai a mata o lulu ;

⁸ Na leaise takai fua a ia e manu fia nealasi, Ti na leikiaise saele le laione i ai i se aso.

⁹ E teki e le tagata lona lima ki le fatu fefeka, Ti e soloi e ia a mauga o kaku ki olatou tafito ;

¹⁰ E foa e ia ni ala i loto o le fatu, Ti e tio lona mata ki nea fuli e mauiga.

¹¹ E taofi e ia le sali o vai, Ti e avake e ia ki le malama le nea leia na fufu.

¹² Kae ko le poto, e maua a ia ifea ? Ti kofea le nofoaga o le atamai ?

¹³ E leaise iloa e le tagata lona totogi ; Talie e leaise maua a ia i le kele o le kau mauuli.

¹⁴ E pati le vanu : E leaise maua a ia iate au ; Ti e pati le tai : E leaise nofo a ia mo au.

¹⁵ E leaise totogi a ia ki le aulo mea, Tti e leaise fetogi a ia ki le paaga mamafa.

¹⁶ E leaise fua a ia ki le aulo o Ofile, Pe ko le onise mauiga, pe ko le safile ;

¹⁷ E leaise mafai ke fakatatau a ia ki le aulo pe ko le tiloata, Ti e leaise feala ke fetogi a ia ki se ipu aulo mea.

¹⁸ Ko le feo mo le kilisitale ko nea noa latou i ona tafa : E mauiga ake le poto i fuai kasoa.

¹⁹ E leaise feala ke fakatatau ki ai le topasi o Etiopia, Ti e leaise mafai ke fakatatau mo ia le aulo mea.

²⁰ Ti e au loa meifea le poto ? Kofea le nofoaga o le atamai ?

²¹ E fufu a ia ki mata o nea fuli ala e mauli, Ti e fufu a ia ki manu lele o le lagi.

²² E pati le popoko mo le mate : Na ma logo ki lona masaui.

²³ Ko le Atua leia e iloa ia lona ala, Ko ia leia e iloa ia lona nofoaga ;

²⁴ Talie e tio a ia o kaku ki potupotu o le malama nei, E tio a ia ki nea fuli i lalo o le lagi.

²⁵ I le aso leia na fuafua ai e ia le mamafa o le matagi, Ti na fakatuutuu ai e ia le lasi o vai,

²⁶ I le aso leia na soli ai e ia a lao ki le ua, Ti na fai ai e ia le ala o le uila mo le mana,

²⁷ Na tio loa a ia ki le poto ti na fakasa loa e ia a ia ; Na teki loa e ia a fakatafito o le poto ti na asiasii loa e ia lona mauiga.

²⁸ Ti oki, na pati loa a ia ki le tagata : Ko leinei, ko le i ki le Eteleno ko le poto ; Ko le fakamamao mei le veli ko le atamai.