Sopo 26 - Tosi Tapu

Fakasa o le mafimafi o le Atua e Sopo

¹ Na masau loa a Sopo, o pati :

² E ke poto ai i le tokoi ki leia kua gaegae ! E ke poto ai i le fakamauli o le lima o leia kua puli lona makeke !

³ E ke poto ai i le soli o ni tokoi malilie ki leia e leaise poto ! E lasi ai lou poto kua ke fakasa ia !

⁴ Ko ai leia e ke fai ki ai au masau ? Ko ai leia e tuku atu ia kiate koe au masau ?

⁵ I mua o le Atua e lulu a ata Mo latou ala e nonofo i le loto moana.

⁶ I ona mua e telefua le nofoaga o le kau mate, Ti e leaise kie lava o le vanu ki ona mata.

⁷ E folasi e ia le potu noleto o le lagi i aluga o le aele noa, Ti e tautau e ia le kele i aluga o le aele noa.

⁸ E kofukofu e ia a vai i ana ao, Ti e leaise masaesae a ao i le mamafa o le vai.

⁹ E uufi e ia a mata o lana masina, O tosoi e ia se ao matotolu i ona mua.

¹⁰ Kua tosi e ia se laini takafuafua i aluga o atu vai, Ke koiga i le malama mo le fakapouli.

¹¹ E galulu a pou o le lagi, Ti mo ofolele i lana valoki.

¹² E lagai e ia le tai ki lona makeke, Ti e fatii e ia lona fia nealasi ki lona atamai.

¹³ E tuku e lana tukumanava le gigila ki le lagi, Ti e sukii e lona lima le gata pikopiko.

¹⁴ Ko potupotu ana o ona ala, Ko le ga logoa noa leia e kaku mai kia tatou. Kae ko ai e logo loa ki le mana o lona mafimafi ?