Sopo 24 - Tosi Tapu

Fakamatala e Sopo o le ala o le tagata agaveli

¹ Kolea e leaise fakatuutuu ai e le Mafimafi ni aso ala e fai ai loa e ia ana fakamaau ? Ti kolea e leaise tio ai latou ala e iloa ia a ia ki aso ana ?

² E siki e ni iki a koiga, E fagai e ni iki ni kau manu ala na lotou kaia.

³ E too le asino a le fanau sala matua, Ti e taofi le pipi a le fafine lokonui ;

⁴ E tulei mei le ala le kau fakaaloalofa, Ti e tonu ke mumuni le kau mativa fuli o le fenua.

⁵ Ti ko leinei, ofaipe ni asino vao o le toafa, E lotou ano i le mafoata o afa nea kai i le toafa ke fagai ai alatou fanau.

⁶ E lotou tuuti le fulumeto leia e toe i faisaga ; E lotou tae a fuai vite ala e toe i le faisaga vite o le tagata agaveli.

⁷ E lotou moe telefua i le pouli, sala kofu, Ti mo sala kie kafu ki le momoko.

⁸ E lotou susu i ua o le mauga, Ti e lotou sogi ki utu talie ko lolatou solaaga a ia e tasi.

⁹ E tosoi le toe sala tamana i le u o lona tinana. E too le taupulupulu o le tagata mativa kae fakagaoi a ia.

¹⁰ E fakasaele telefua latou, sala kofu ; E lotou pakupaku, kae lotou fetuku a fuiga fulumeto.

¹¹ E lotou tatau le lolo olive a le tagata agaveli ; Ti e lotou teuteui le vino kae lotou fia inu.

¹² I kolo e logoi ai a tukumanava a latou ala kua vave fua le mate, Ti e tauvasa le laumalie o le kau lavelavea… Kae e leaise tokaga fua le Atua ki nea fakalialia ana !

¹³ E fili a iki ki le malama, E leaise lotou iloa ona ala, E leaise lotou tausi ona ala liliki.

¹⁴ E tuu le tagata tukipo i le mafoata, O tamate le tagata mativa mo le tagata fakaaloalofa, Ti e kaia a ia i le pouli.

¹⁵ E lamalama e le mata o le tagata tono le malu o le pouli ; Ti e pati a ia : E leaise tio mai loa se tasi kiate au. Ti e puloui e ia ona mata ki se kie.

¹⁶ E lotou ulu fakamakeke ki fale i le pouli, Kae lotou fakamaumau i olatou fale i le ao. E leaise lotou iloa le malama.

¹⁷ Kia latou, ko le usu ko le malu a ia o le mate, E lotou i mate ki ai.

¹⁸ Kolea ! E tafea vave le tagata agaveli i le vai ; E liliu lona nofoaga ko se kele malaia, Ti e leaise toe ano a ia ki faisaga vite i se aso !

¹⁹ Ofaipe le taulaa mo le vevela leia e fakapuli ia a vai o le nive, E folo loa e le nofoaga o le kau mate latou fuli ala e agasala !

²⁰ Kolea ! E galoi a ia e le fafine leia na fanaui ia latou ki malama nei, Ti e liliu loa a ia ko le nea kai malie a ilo, Ti e leaise toe masau loa se tasi kiate ia. E fatii le tagata agaveli ofaipe se laakau,

²¹ Leia e fakaveliveli ki le fafine paa mo sala fanau, Leia e leaise fai ia se nea malie ki le fafine lokonui !…

²² Leai ! E fakatologa e le Atua i lona mafimafi a aso o le kau agamakeke ; Ti e lotou toe fumakeke, mo ka kua lotou loto gaegae ki lolatou mauli.

²³ E soli e le Atua kia latou le fimalie mo le fanaki, Ti e leoleo e ia olatou ala.

²⁴ E lotou malaga o taualuga, kae e lotou puli fakapunamauli loa, E lotou siga loa ki lalo, e lotou mamate loa ofaipe tagata fuli, E tuuti loa latou ofaipe taulu o fulumeto.

²⁵ Kapau e leaise ko le maoki a ia, Ti ko ai leia e pati mai loa e kau loi ? Ko ai leia e fakanoai ia loa aku masau ?