Sopo 22 - Tosi Tapu

Fakalakasala o Sopo e Elifasi

¹ Na masau loa Elifasi mei Temane, o pati :

² Pe feala ke aoga se tagata ki le Atua ? Leai ! e aoga fai le tagata poto kiate ia totonu.

³ Kapau e ke maokioki, pe aoga a ia ki le Mafimafi ? Kapau e ke saosaoa i ou ala, pe maua e ia se nea i ai ?

⁴ Pe ko le i kiate koe leia e tautea ai e ia a koe, Leia e ave ai e ia a koe ki le fakamaau ?

⁵ Pe leaise lasi lou agaveli ? Pe leaise gato au agasala ?

⁶ Talie kua ke maua se totogi sala i lou taina ; Ti kua ke too le taupulupulu o lou taina telefua.

⁷ Na leaise ke soli se vai ki leia e fia inu, Ti na leaise ke soli se pane ki leia e fia kai.

⁸ Kae na tuku le fenua ki leia e makeke, Ti na ke tuku leia e lasi ke nofo i ai.

⁹ Na ke kakau ke ano le fafine lokonui mo ona lima ata, Ti na ke fatifatii a lima o toe sala matua.

¹⁰ Koia leia kua takatakai ai a koe e ni masele, Ti kua ke maua ai e se i lasi ;

¹¹ Kua vilo ai le pouli kiate koe, ke aua na ke tio ki se nea, Ti kua ke malemo ai i ni galu lalasi.

¹² Pe leaise agai le Atua i le lagi taualuga ? Tio ki le tumutumu o fetuu, e lotou taualuga ai !

¹³ Ti e ke pati : Kolea le nea e iloa e le Atua ? Pe mafai ke fakamaaui e ia i le matotolu o ao ?

¹⁴ E takatakai a ia e ao, ti e leaise tio a ia ki se nea ; E feanoaki fai a ia i le lagi.

¹⁵ Kolea ! Pe ke fia saele i le ala mago, Leia na saele ai le kau agaveli ?

¹⁶ Na tuuti latou kae na leikiaise tatae lolatou temi, Ofaipe se kaua leia na soloi e se vaitafe.

¹⁷ Na lotou pati ki le Atua : ano kese ia matou ; Kolea le nea e feala ke fai e le Mafimafi kia matou ?

¹⁸ Kae na fakaapele e le Atua olatou fale ki ni koloa. Ke mamao atu iate au a fakakaukau a le kau agaveli !

¹⁹ Na tio loa le kau agatonu ki lolatou vilo, Ti na lotou fiafia loa, ti na kata loa le tagata saosaoa kia latou :

²⁰ Ko na otatou fili kua pupuli ! Ko na olatou koloa kua kai e le afi !

²¹ Koia ke ke pipiki ki le Atua, ti e ke maua loa le tokamalie ; Ti e ke maua loa i ai le fiafia.

²² Ke ke tali le akonaki mei lona gutu, Ti mo ke tuku ki lou loto ana folafola.

²³ E toe fakatuu loa e ia a koe ofai pe mua Mo ka ke tafoki ki le Mafimafi, Mo ka ke fakamamao le agaveli i lou falela.

²⁴ Ke ke le aulo ki le efu, Le aulo o Ofile ki fatu o liua ;

²⁵ Ti e liliu loa le Mafimafi ko lau aulo, mo lau paaga, ti mo lou koloa fufu.

²⁶ Ti e ke fai loa ki le Mafimafi lou fiafiaaga, Ti e ke siki loa kiate ia ou mata.

²⁷ E ke faikole loa kiate ia, ti e tali atu loa a ia kiate koe, Ti e ke fakasoko loa au fakapapau.

²⁸ E manuia loa a nea fuli ala e ke loto ki ai ; Ti e mu loa le malama i ou ala.

²⁹ Talie e fakaveli e le Atua a fakatuutuu fuli ala e fia taualuga ; Kae tuku e ia lana tokoi ki leia e taulalo.

³⁰ Talie e taaki foki e ia leia e saosaoa i le veli, Leia e mauli loa o tupu ko le mea o ona lima.