Sopo 20 - Tosi Tapu

Masau a Tesofale ki le tagata agaveli mo lona tautea

¹ Na masau loa Tesofale mei Naama, o pati :

² E fakamakeke au e aku manatu, ke kau tali, Ti e leaise koi mafai ke kau taofi le nea i loku loto.

³ Kua kau logo ki ni masau ala e leaise mafai ke kau kataki ; Ti kua tuku mai kiate au e le laumalie o loku atamai le tali ke fai.

⁴ Pe leaise ke iloa, talu mei mua, Talu mei le aso leia na fakanofo ai le tagata i le kele,

⁵ E toetoe fua le malo a le tagata agasala, Ti e leaise fualoa le fiafia a le tagata agaveli ?

⁶ E logo ai sona taualuga o kaku ki le lagi, Ti mo le kaku o lona fa ulu ki ao,

⁷ Kae fakaoki loa a ia ofaipe ona faikauga totonu, Ti ko latou ala na tio kiate ia e vesili loa : Kofea a ia ?

⁸ E lele loa a ia ofaipe se moe miti, ti e leaise toe maua loa a ia ; E puli noa loa a ia ofaipe se tio i le pouli ;

⁹ Ko le fa mata leia na tio kiate ia e leaise toe tio loa kiate ia, Ti ko le ganea leia na nofo ai a ia e leaise toe tio loa kiate ia.

¹⁰ E afa loa ona vosa e le kau mativa, Ti e liufaki loa e ona lima a koloa ala na too fakamakeke e ia.

¹¹ Na logoi e ia koi apele a ia i le makeke mo le tupulaga, Kae kua moe a nea fuli ana mo ia i le tanuma.

¹² I lona gutu e sua malie le veli, Ti e fufu e ia a ia i lalo o lona alelo,

¹³ E taupau e ia a ia o fualoa, Ti e leaise toe tiaki e ia a ia, kae tuku e ia a ia i loto o lona gutu.

¹⁴ Kae e fetogi loa lana nea kai i lona manava, Ti e liliu loa a ia i lona tino ko se gata uti kona.

¹⁵ Na folo e ia ni koloa, e luluai loa e ia latou ; E kapu loa latou e le Atua mei lona manava.

¹⁶ Na mimiti e ia le kona o le gata uti kona, Ti e tamate loa a ia e le alelo o le gata uti kona.

¹⁷ E leaise toe tio loa a ia ki ni liua liliki, mo ni liua lalasi, Mo ni vaitafe ala e tafe ai le meli mo le sua manu.

¹⁸ E liufaki loa e ia le fua o lana gaoi, kae e leikiaise maua e ia lona malie ; Ti e liufaki loa e ia a nea fuli ala na too e ia, kae e leikiaise maua e ia se fiafia.

¹⁹ Talie na fakamakeke e ia ti na tiaki e ia le kau mativa ; Ti na maumaui e ia olatou fale, kae na leaise fakatuu e ia se fale kia latou.

²⁰ O tupu na leaise iloa e lona manumanu koloa sona gatoaga, E leaise saofaki loa e ia le nea leia na mauiga lasi kiate ia.

²¹ Na leaise sao fua se tasi i lona uakai, Koia e leaise fualoa ai loa lona fiafia.

²² I loto malie o lona mou koloa, e mamae loa a ia ; Ti e siki loa kiate ia le lima o le kau mativa fuli.

²³ Ti ko leinei, e kakau mai loa e le Atua kiate ia le afi o lona sausau, Ke fakaapele ia lona manava, Ti e fakamakona loa e ia a ia ki se ua gasau.

²⁴ Kapau e sao a ia i masafu ukamea, Kae lavea loa a ia i le kalolo sila.

²⁵ E tatai e ia le gasau gigila i lona tua, leia e fakalaka loa i lona ate ; Ti e vilo fakapunamauli loa kiate ia a fakaii o le mate.

²⁶ Kua taofi a malaia fuli ki ona koloa ala na fufu ; Ti e tutu loa a ia e se afi leia na leaise tutu e le tagata, Ti e kai loa e le afi le nea leia e toe i lona falela.

²⁷ E fakasa loa e le lagi lana agaveli, Ti e tuu ake loa le kele kiate ia.

²⁸ E ave loa a koloa o lona fale, Ti e lotou pupuli loa i le aso o le sausau o le Atua.

²⁹ Ko lena le vaega leia kua teuteui e le Atua ki le tagata agaveli, Ko lena le tofiga leia kua tuku e le Atua kiate ia.