Sopo 2 - Tosi Tapu

Papala o Sopo

¹ I se aso, na au loa a vosa o le Atua ki mua o le Eteleno, ti na au foki Satana mo latou o tuu i mua o le Eteleno.

² Na pati loa le Eteleno kia Satana : Pe ke au meifea ? Ti na tali loa Satana ki le Eteleno : Mei le folii o le malama nei, o evaeva i ai.

³ Na pati loa le Eteleno kia Satana : Pe na ke tokagai laku tagata fakasausau ko Sopo ? E leaise tatau fua se tasi mo ia i le malama nei ; ko se tagata saosaoa mo agatonu, mo i ki le Atua, ti mo fakamamao mei le veli. Koi tuu makeke a ia i lona agatonu, kae na ke ekenaki au ke fakapuli a ia kae leai sona tupuaga.

⁴ Ti na tali loa Satana ki le Eteleno : Ko le kili ki le kili ! Io, e soli loa e le tagata a nea fuli ala e maua e ia o tupu ko lona mauli.

⁵ Kae ke ke falo lou lima, o fafa ki ona ivi mo lona kanofi, ti e kau iloa fakapapau e lauveli loa a ia kiate koe i ou mua.

⁶ Na pati loa le Eteleno kia Satana : Ko leinei, e kau tuku a ia ki ou lima ; ko leia fua, aua na ke fafa ki lona mauli.

⁷ Ti na mavae loa Satana mei mua o le agaiaga o le Eteleno. Ti na taai loa e ia a Sopo ki se masaki kili mamae ai, mei ona taga vae o kaku ki lona tumuaki.

⁸ Ti na too loa e Sopo se kiva o vaku ki ai lona tino, ti na tonatona loa a ia i le mugalafu.

⁹ Na pati loa lana avaga kiate ia : E ke tuu makeke aifai i lou agatonu ! Lauveli ki le Atua, kae ke mate !

¹⁰ Kae na tali loa a Sopo kiate ia : E ke masau ofaipe se fafine valea. Io ! e tou tali mei le Atua le malie, ti kolea e leaise tou tali ai foki le veli ! I nea fuli ana, na leaise agasala fua a Sopo i ona laugutu.

Taumai o kaukaunea e toka tolu o Sopo

¹¹ Ti na logo loa a kaukaunea e toka tolu o Sopo, ko Elifasi mei Temane, ko Pilitate mei Suake, ti mo Tesofale mei Naama, ki malaia fuli ala kua soko kia Sopo. Na lotou tonu tasi loa, o mavae mei olatou kaiga, ke mamae fakatasi mo ia ti mo fakafimalie a ia.

¹² I lalatou tio kia Sopo mei mamao, na leaise lotou iloa a ia, ti na lotou siki loa olatou leo ki aluga o tagi. Na lotou sae loa olatou taupulupulu, ti na lotou laku loa le efu ki aluga o olatou ulu.

¹³ Ti na lotou nonofo loa ki le kele mo Sopo i aso e fitu mo po e fitu, kae na leaise fakamavaa fua olatou gutu, talie na lotou tio kua lasi ai lona mamae.