Sopo 19 - Tosi Tapu

Lauga a Sopo, kae iloa e ia e mauli lona Fakamauli

¹ Na tali loa a Sopo, o pati :

² E kaku loa kiafea lakoutou fakamamae loku loto, ti mo lakoutou takatakafi au ki akoutou akonaki ?

³ Ko le tua kau agafulu leinei o lakoutou lauveli kiate au ; Pe leaise kotou luma i loku fakamamae ?

⁴ Kapau kua kau agasala maoki, Ti ko laku agasala toka tasi.

⁵ Pe kotou loto ke takafi au ki lalo, kae kotou malaga ki aluga ? Pe kotou loto ke fakamaoki na kau agasala ?

⁶ Ke kotou iloa ko le Atua leia na tuku ia kiate au le malaia leinei, Ti na fui ia au ki lona kupega.

⁷ Ko leinei, e kau tagi o tupu ko le fakamakeke, kae e leaise tali mai se tasi kiate au ; E kau tagi ki le fakamaau, kae e leaise fakamaau !

⁸ Na tapono e ia a ala fuli kiate au, ti e leaise koi mafai ke kau fakalaka. Na folasi e ia le fakapouli i oku ala.

⁹ Na fakamativa e ia au i loku kololia, Ti na too e ia le pala mei loku fa ulu.

¹⁰ Na fatifatii e ia au i potu fuli, ti na kau siga ki lalo ; Na taaki e ia loku amanaki malie ofaipe se laakau.

¹¹ Na fakaula e ia lona sausau kiate au, ti na lau e ia au i ona fili.

¹² Na fakatasi e ia lana kau solia kiate au, Ti na lotou fakamavaa se ala o kaku mai kiate au, Ti na lotou takatakai loku falela.

¹³ Na fakamamao e ia meiate au oku fetaina, Ti na maliu kese oku kaukaunea iate au.

¹⁴ Kua tiaki au e loku famili totonu, Ti kua galoi au e oku kaukaunea totonu.

¹⁵ Kua kau liliu ko se matapule ki aku tagata fakasausau mo aku fafine fakasausau, Kua lotou tio mai kiate au ofaipe se tagata kese.

¹⁶ E kau kalaga ki laku tagata fakasausau, kae e leaise koi logo mai a ia kiate au ; E kau kolekole kiate ia, kae e noa aifai.

¹⁷ Kua fakalialia laku avaga ki laku tukumanava, Logo ai laku tagi o tupu ko vosa o loku manava.

¹⁸ Kua gologolo foki mo toe liliki kiate au ; Kapau e kau tuu ki aluga, e lotou lauveli mai kiate au.

¹⁹ Kua vesia kiate au oku kaukaunea ala na kau fanaki ki ai, Ti kua agatuu mai kiate au latou ala na kau alofa ki ai.

²⁰ Kua pipiki oku ivi ki loku kili ofaipe loku kanofi, Ti koi toe fai kiate au le kili o oku nifo.

²¹ Kotou alofa mai, kotou alofa mai kiate au, ei oku kaukaunea ! Talie kua taai au e le lima o le Atua.

²² Kolea e kotou fakaveliveli ai kiate au, ofaipe loku fakaveliveli e le Atua ? Kolea e leaise kotou makona ai i loku kanofi ?

²³ Io, amusia ake ke tosi aku masau, Ke tosi latou i se tosi.

²⁴ E kau loto loa ke togi aku masau i se fatu Ki se siso ukamea mo se pulu, ke tuu o lee gato.

²⁵ Kae e kau iloa e mauli loku fakamauli, Ti e tuu fakamuli ake loa a ia i le malama nei.

²⁶ Ka maumau loa loku kili, e tuu ake loa a ia ki aluga ; Ka oki loa le maumau o loku kili, e kau tio loa, a au totonu, ki le Atua.

²⁷ E kau tio loa kiate ia, ti e fiafia loa a ia kiate au. Io, e tio loa oku mata totonu kiate ia, kae e leaise ko se tasi ake ; E pakia loku loto i le talitali ki le aso a ia.

²⁸ E kotou pati loa : Kolea e tou fakamamae ai a ia ? Talie e fakamaoki loa a ia ki loku agatonu.

²⁹ Ke kotou i ki le seleta : Talie e fakaii ai a tautea a le seleta ! Ti ke kotou iloa e i ai se fakamaau.